1 Juan 2:10 - Bible in Tzeltal de Oxchuc y Tenejapa

¹⁰ Te mach'a c'ux ya yaiy ta yo'tan te yermanoe, ainemix ta bay te saquil q'uinale. Jich ma'yuc bi ya syalesot xan ta mulil yu'un.

Nuevo Testamento Tzeltal de Amatenango

¹⁰ Te machꞌa kꞌux ya yaꞌiy te yermanoe, ayix ta sakil kꞌinal, y ni maꞌyukix te tut ya syalesot ta mulil yuꞌune.

Bible in Tzeltal Bachajón

¹⁰ Te mach'a c'ux ya ya'iy ta yo'tan te yermano, ayinemix ta sacal q'uinal soc mayuc bin ya xyahltesot ta mulil yu'un.

1 Juan 2:10 ပူးပေါင်းရင်းမြစ်များ

Salmos 119:165

Te mach'atic c'ux ya yaiy ta yo'tan te p'ijubtesel awu'un, mero lamal q'uinal ta stojolic, ma'yuc bila ya stsalot yu'un.

Oseas 6:3

Ya me jpastic tulan ta sna'beyel sba te Cajwaltique. Te Cajwaltic ya xtal ta jtojoltic, ta smelelil, jich bit'il ya xloc' tel te c'aale, ta smelelil, jich bit'il ja'al ya yajch'es te lumq'uinal ta yorail otoño soc ta primavera.

San Mateo 13:21

Ja'uc me to, ma ismajemuc ta yo'tan te bila la yaiy stojole. Teme tal woclajel soc uts'inel ta stojol ta scaj te Sc'op Diose, ya xchebaj yo'tan ta ora yu'un.

San Mateo 18:7

¡Ya me yil swocolic te mach'atic ayic ta balumilal ta scaj te ay yalesel ta mulile! Puersa ay mach'atic ya syaleswan ta mulil, ja'uc me to, ya me yil swocol te mach'a jich ya spase.

San Juan 11:9

La yal te Jesuse: —¿Ma bal lajchayeb ora yich'oj te jun c'aale? Jich yu'un te mach'a ya xbeen ta c'aaleltique, ma ba ya sc'ojch'in yacan, melel ya yil q'uinal te bit'il sacuben q'uinal ta balumilale.

San Juan 12:35

Te Jesús jich la yalbey yaiyic: —Ma ba jalix c'aal te ay saquil q'uinal ta atojolic. Jich yu'un ac'a me puersa te ya xbeenex ta bay te saquil q'uinal, swenta yu'un ma me ch'ayemuc atsaic ya staex te ijc' q'uinale. Melel te mach'a ya xbeen ta ijc' q'uinale, ma sna' te banti beil ya xbajt'e.

San Juan 8:31

Jich yu'un te Jesuse la yalbey te judioetic te xch'uunejiquixe: —Teme jc'axel ya awac' ta awo'tanic te jc'op la calbeyexe, jich me jnopojelex cu'un ta melel abi.

Romanos 14:13

Jich yu'un, ma me jech jlebey jba jmultic. Ja' lec ac'a jletic te bila ma xpejc'aj yo'tan yu'un te quermanotique soc te ma xyalesot ta mulil yu'une.

Filipenses 1:10

Jich me ya xju' awu'unic stsael spisil ora te bila lec ta pasele, jich me ma'yuc amulic te cuxulex ta q'uinale, soc ma'yuc bi quechel ta awentaic a te c'alal ya xtal te Cristoe.

2 Pedro 1:10

Jich yu'un, quermanotac, te bit'il ic'bilex yu'un te Diose soc tsabilex yu'un, jc'axeluc me ismajuc ta awo'tanic. Teme jich ya apasique, jich ma ba ya xyalex xan ta mulil.

1 Juan 2:11

Yan te mach'a yilintayej te yermanoe, yu'un nanix ainem ta ijc' q'uinal, tey yac ta beel a. Jich ma sna' te banti ya xbajt'e, melel ma'sit c'oem yu'un te ijc' q'uinale.

1 Juan 3:14

Te jo'otique jna'ojtic stojol te jilemix cu'untic ta bay te lajele, ayotiquix ta swenta cuxinel. Ja' swentail te c'ux ya caiytic ta co'tantic te quermanotactique. Te mach'a ma c'uxuc ya yaiy ta yo'tan te yermanoe, yu'un nanix jc'axel ay to ta swenta lajel a.