San Lucas 4:18 - Bible in Tzeltal Bachajón

¹⁸ Ha scuentahinejon te Espíritu yu'un te Cajwaltic, como tsahbilon yu'un yalel te lec yach'il c'op ta stojol te pobrehetique. Sticonejon tal ta scoltayel te mach'atic pich'il yo'tanic, ta yalel te libre ayic te mach'atic chuculic, soc ta sjambeyel sit ts'o'sitetic, sticonejon ta yaq'uel ta libre te mach'atic tembilic ta mosohinel,

Nuevo Testamento Tzeltal de Amatenango

¹⁸ “Te Espíritu yuꞌun te Kajwaltike julix ta jtojol, yuꞌun tsabilon ta yalel te lek achꞌ kꞌop ta stojol te meꞌbaꞌetike. Tikonbilon tal ta skoltayel te machꞌatik ay swokolik ta ajtal-oꞌtane. Sok tikonbilon tal yuꞌun tal kalbey tutꞌil ya xkolik ta libre te machꞌatik ayik ta prexoe, sok te ya jambe sitik te choketike, sok ya jkoltay te machꞌatik mosoimbile,

Bible in Tzeltal de Oxchuc y Tenejapa

¹⁸ “Te Espíritu yu'un te Cajwaltique julix ta jtojol, yu'un tsabilon yu'un ta yalel te lec yach'il c'op ta stojol te me'baetique. Ticunbilon tel ta scoltayel te mach'atic ay swocolic ya yaiyic ta yo'tanique, soc te ya calbey yaiyic te bit'il ya xcolic ta libre te mach'atic ayic ta chuquele, soc te ya jambey sitic te ma'sitetique, soc te ya jcoltay ta libre te mach'atic mosoinbilique,

San Lucas 4:18 ပူးပေါင်းရင်းမြစ်များ

Génesis 3:15

Soc ya cac' te contra yac awil aba soc te antse, soc te ats'umbal contra ya yil sba soc te sts'umbale; ha ya yehchentesbat ajol, yan te ha'ate yit nax yoc yac awehchentesbe stuquel, xchi sc'oblal.

2 Crónicas 34:27

te nihc awo'tan yu'un soc te la apehc'an aba ta stojol Dios te c'alal la awa'iy te bin ya yalbe sc'oblal te lugar ini soc te mach'atic nahinemic tey a, soc te la apehc'an aba ta jtojol, la ach'i' ac'u' yu'un soc oc'at ta jtojol, ha nix hichon la jca'iybat ac'op, xchi te Jehová.

Salmos 102:20

yu'un ya ya'iybe yahcan te jchuqueletic, yu'un ya yac' ta libre te mach'atic ac'bilic ta lajel;

Salmos 147:3

Ha ya slecubtes te mach'a pich'il yo'tan, soc ya spotsbe yehchen.

Salmos 2:2

Ya xhahchic te ajwaliletic ta q'uinal, soc te príncipaletic junax ya yac' sbahic ta schapel scontrahinel te Jehová soc te mach'a tsahbil yu'une.

Salmos 2:6

Ho'on la jcotses te ajwalil cu'un ta Sión, te ch'ul wits cu'un, xchi.

Salmos 34:18

Te Jehová nopol ay ta stojol te mach'atic ayic ta mel-o'tan, soc ya scoltay te mach'atic pich'il yo'tanique.

Salmos 45:7

C'ux ta awo'tan te bin stojil ta pasel, soc yac awihlay te bin chopole; ha yu'un la stsahat Dios, ha te Dios awu'un, la smalat ta aceite yu'un yutsil q'uinal, c'ax hich tohy ac'oblal a te bin ut'il amohloltac.

Salmos 51:17

Te mahtaniletic ya sc'an te Diose, ha te pich'il-o'tanile; ma ba yac ap'aj, Dios cu'un, te mach'a pich'il yo'tan soc te ya smel yo'tan yu'un te smule.

Isaías 32:3

Hich ma ba ya xmahc sitic te mach'atic ya yilic, soc te mach'atic ay schiquinic ya me slahman sbahic ta ya'iyel.

Isaías 35:5

Hich ya xjahm sit te ts'o'sitetic soc ya xjahm schiquinic te cohquetique.

Isaías 42:7

yu'un yac ajambe sit te jts'o'sitetic, yac aloq'ues ta libre te mach'a ayic ta cárcel, soc yac aloq'ues ta chucojibal te mach'atic nahinemic ta yihc'al q'uinal.

Isaías 45:13

La jtij hahchel te Ciro ta scuenta bin stojil ta pasel, soc ya jtojobtesbe spisil te behetic yu'une. Ha ya scha'pasbon te pueblo cu'un soc ya yac' ta libre te mach'atic cu'un te bahemic ta chuquel, ma ha'uc ta scuenta stojol o ta scuenta mahtaniletic, xchi te Jehová te scuentahinej spisil.

Isaías 49:9

yu'un hich yac awalbe te mach'atic chuculic: ¡Loc'anic! xchihat, soc te mach'atic ayic ta yihc'al q'uinal: ¡Ac'a abahic ta ilel! xchihat. Ya me sta swe'elic ta behetic, soc ya me sta aquiltic ta spisil toyol q'uinaletic te mayuc bin colem tey a.

Isaías 50:4

Te Cajwaltic Jehová la yac' te hich ya xc'opojon te bin ut'il mach'a p'ijuben, scuenta yu'un ya jna' bin ya calbe te mach'atic luhbenique. Ta jujun sab ya stijbon hahchel jchiquin scuenta yu'un hich ya ca'iy te bin ut'il mach'a p'ijuben.

Isaías 57:15

Como hich ya yal te Mach'a toyol ay, te mach'a stalel cuxul, te Ch'ul Dios te sbihile: Ho'on nahinemon ta banti toyol soc ch'ultesbil, pero ha nix hich nahinemon soc te mach'a pich'il yo'tan soc peq'uel yo'tan, yu'un ya ca'be xan yip yo'tanic te mach'atic peq'uelic soc yu'un ya ca'be xan yip yo'tanic te mach'atic pich'il yo'tanique.

Isaías 59:21

Ha ini te chapbil-c'op cu'un ta stojolic, xchi te Jehová: Te espíritu cu'un te ay ta atojol, soc te c'opetic cu'un te la jca'bat ta awe, ma ba ya xch'ay ta awe soc ta ye te anich'nab o te amamatac, yo'tic soc ta spisil ora, xchi te Jehová.

Isaías 61:1

Ay ta jtojol te espíritu yu'un te Cajwaltic Jehová, yu'un ha la stsahon te Jehová. La sticonon bahel ta yalbeyel lec yach'il c'op te pobrehetic; ta spoxtayel te mach'atic pich'il yo'tanic, ta yalbeyel te ya xcolic ta libre te mach'atic ayic ta chuquel, soc ta yalbeyel te mach'atic chuquelic te jamalix te cárcel;

Isaías 66:2

Ha pasticlambil ta jc'ab spisil ini, hich chicnaj spisil, xchi te Jehová. Pero ha ya quil te mach'a pobre soc te ya xnihc yu'un te jc'ope.

Ezequiel 9:4

hich la yalbe: C'axan ta yohlil te pueblo, ha te Jerusalén, a'beya seña ta sti'ba te mach'atic ya x'ahcanajic soc ya x'awonic ta scaj spisil te bintic ilobtic sba te ya yich' pasel tey a, xchi.

Daniel 9:24

Chapal lajuneb schanwinic (70) semana ya xc'ax yu'un te alumal soc te ch'ul pueblo awu'un, yu'un ya xlaj te sc'axuntayel mandar, yu'un ya xlaj te mulil soc yu'un stojel mulil, yu'un ya yich' talel te bin stojil ta pasel te stalel ya xhil, yu'un ya yich' sello te nahalsitil soc te sc'op-jalwanej, soc yu'un ya yich' ch'ultesel te Mero Ch'ul Awilal.

Sofonías 3:12

Ya quihquitaybat hilel ta awohlil jun pueblo te peq'uel yo'tan soc pobre, te ya smuc'ulin yo'tan te sbihil Jehová.

Zacarías 11:11

Ta hich ora jihn te chapbil-c'op, soc hich la sna'ic te pobrehetic yu'un te jtsohb tuminchijetic te yac yilbelonic te ha te sc'op te Jehová.

Malaquías 4:2

Yan te ha'ex te awich'ojic ta muc' te jbihile, ya me xtihl ta atojolic te bin stojil ta pasel hich te bin ut'il sts'anabul te c'ahc'ale, soc ya yich' talel ta xic' te colele. Ya me xloq'uex bahel soc ya me xwihlawetex hich te bin ut'il tut wacaxetic te ya xloq'uic bahel ta snahic.

San Mateo 11:5

Ya yiliquix q'uinal te ts'o'sitetic, ya xbeheniquix te coxo'etic, lecubtesbiliquix te jc'a'el-chameletic, ya ya'iyiquix q'uinal te cohquetic, la yich'iquix cha'cuxajtesel mach'atic chamenic, soc yaquix ta halbeyel ya'iy te lec yach'il c'op te pobrehetique.

San Mateo 12:18

Ha ca'bat ini te tsahbil cu'un; te c'ux ta co'tan, te bayel yutsil co'tan yu'un. Ya ca'be ta stojol te Espíritu cu'un, ha ya spuc ta halel ta stojol jyanlumetic te bin toj ta pasele.

San Mateo 12:20

Ma ba ya slajin swaq'uel te jalal te waq'uelix, ma ba ya stup'be sc'ahc'al te xutunte' yac ta tihlel, ha to teme la yac' c'ohtuc ta pasel te bin stojil ta pasele.

San Mateo 4:16

Te mach'atic ayic ta yihc'al q'uinal la yilic muc'ul sacal q'uinal, te mach'atic ayic ta yaxinal lajel, sacub q'uinal ta stojolic, te xchihe.

San Mateo 5:3

Bayel me yutsilic te mach'atic mayuc bin ay yu'un ya ya'iyic, como ha yu'unic te cuentahinel yu'un te ch'ulchane.

San Lucas 4:17

A'bot te hun yu'un te jalwanej Isaías; la sjam te hun, la sta te banti hich ts'ihbabil:

San Lucas 6:20

Jesús la shach sit, la yil bahel te jnopojeletic yu'un, hich la yal: Bayel me awutsilic ha'ex te pobrehex, como ha awu'unic te cuentahinel yu'un Dios.

San Lucas 7:22

Hich halbotic yu'un te Jesús: Bahanic, a'beyahic sna' te Juan te bintic la awilic soc te la awa'iyique: ha te ya yiliquix q'uinal ts'o'sitetic, ya xbeheniquix coxo'etic, ya yich'iquix lecubtesel jc'a'el-chameletic, ya ya'iyiquix q'uinal cohquetic, ya yich'ic cuxajtesel mach'atic chamenic soc yaquix ta halbeyel ya'iyic te lec yach'il c'op te pobrehetique.

San Juan 1:41

Ha nahil c'oht sta te Simón te sbanquil, hich la yalbe: La jtahcotiquix te Mesías, xchi. (Ha Cristo, xchi te c'asesbile.)

San Juan 12:46

Ho'on te sacal q'uinalon te talemon ta bahlumilal scuenta yu'un spisil te mach'a ya sch'uhunon, ma ba ya x'ayin ta yihc'al q'uinal.

San Juan 3:34

como te mach'a ticombil tal yu'un Dios, ha ya yal te sc'op te Diose, como ma p'isbiluc nax ya yac' te Espíritu te Diose.

Hechos 10:38

ha te bin ut'il Dios la smal ta Ch'ul Espíritu soc yu'el te Jesús talem ta Nazaret, soc te bin ut'il behen ta spasel lequil a'teliletic soc ta scoltayel spisil mach'atic ay swocolic yu'un te pucuj, como joquimbil yu'un Dios.

Hechos 26:18

yu'un yac ajambe sitic scuenta yu'un ya xloq'uic ta yihc'al q'uinal, ya x'ochic ta sacal q'uinal, soc te ma ba ya x'ayiniquix ta scuenta yu'el te Satanás, te ha ya xtalic ta stojol Dios; scuenta yu'un ya xpasbotic perdón yu'un smulic ta scuenta sch'uhunel yo'tanic ta jtojol soc pajal ay bin ya yich'ic soc te mach'atic ch'ultesbilique, xchi jc'oblal.

Hechos 4:26

Ya xhahchic te ajwaliletic ta q'uinal, soc te principaletic junax ya yac' sbahic ta schapel scontrahinel te Cajwaltic soc scontrahinel te Cristo yu'une, xchihat.

Hechos 4:27

Como melel la stsob sbahic li' ta pueblo te Herodes, Poncio Pilato, te jyanlum winiquetic soc te pueblo Israel ta scontrahinel te Jesús te Ach'ul-nich'an, te mach'a tsahbil awu'une,

Colosenses 1:13

Ha la scoltayotiquix loq'uel ta yip te yihc'al q'uinal, la yic'otiquix ochel ta banti ay te cuentahinel yu'un te Snich'an te c'ux ta yo'tan,

Santiago 2:5

Quermanotac te c'uxex ta co'tan, a'iya me awa'iyic: ¿Ma bal ha'uc tsahbil yu'un Dios te pobrehetic ta bahlumilal te ha' c'uhlejetic ta scuenta sch'uhunel yo'tanic soc ya x'a'bot yich'ic te cuentahinel yu'un Dios te yaloj te ya yich'ic te mach'a c'ux ta yo'tanic te Diose?

1 Pedro 2:9

Yan te ha'exe tsahbil pueblohex, sacerdotehex yu'un ajwalil, ch'ul nacionex soc pueblohex yu'un Dios, scuenta yu'un yac apuquic ta halel te yutsilal te Mach'a la yiq'uex loq'uel ta yihc'al q'uinal soc la yaq'uex ta sacal q'uinal yu'un te bayel yutsil.