Josué 9:1 - Bible in Tzeltal Bachajón

¹ Te c'alal la ya'iyic te bintic c'ohtix ta pasel spisil te ajwaliletic te ayic ta stojol smahlib c'ahc'al yu'un te muc'ul-ha' Jordán, ha te ayic ta witsiltic soc ta spamlejtic soc ta spisil sti'il te Muc'ul Mar c'alal ta Líbano, ha te heteo, amorreo, cananeo, ferezeo, heveo soc te jebuseohetic,

Bible in Tzeltal de Oxchuc y Tenejapa

¹ Te ajwaliletic yu'un te hititaetic, amorreoetic, cananeoetic, ferezeoetic, heveoetic soc te jebuseoetique, la yaiyic stojol te bila c'oem ta pasele. (Tey nainemic ta stojol smalib c'aal yu'un te muc'ja' Jordán: ta bay witstiquil, ta bay alan q'uinal bael yu'une, soc ta spamlej bael ta ti'ti' muc'ul Mar Mediterráneo, ja' to ta sq'uinal Líbano.)

Josué 9:1 ပူးပေါင်းရင်းမြစ်များ

2 Samuel 24:7

Patil bahtic ta ahnibal ts'ahc yu'un Tiro, soc ta spisil te pueblohetic yu'un te heveohetic soc cananeohetic. Ta slajibal bahtic ta Neguev yu'un Judá, ta Beerseba.

Éxodo 23:23

Te ch'ul a'bat cu'un ya xnahilij bahel awu'un soc ya yiq'uex bahel ta sq'uinal te amorreo, heteo, ferezeo, cananeo, heveo soc te jebuseo; ha'ic te jc'axel ya jlajinlan.

Éxodo 23:31

Ha sti'il aq'uinal ya xc'oht cu'un te Mar Rojo c'alal ta mar yu'un filisteohetic, soc ta jochol taquin q'uinal c'alal ta muc'ul-ha' Éufrates, yu'un ya ca'bat ta ac'ab te mach'atic nahinemic tey ta q'uinal, soc ha'at yac atenticlan loq'uel ta atojol.

Éxodo 3:17

Soc la jcalix te ho'on ya jcoltayex ta libre yu'un te wocol ta Egipto, ya quiq'uex bahel ta sq'uinal te cananeo, heteo, amorreo, ferezeo, heveo, soc te jebuseo, ta q'uinal te banti ya x'oquin leche soc chab, xchihat.

Éxodo 34:11

Pasa te bin ya calbat ta mandar yo'tic. Ya jtenticlan loq'uel ta atojolic te amorreo, cananeo, heteo, ferezeo, heveo soc te jebuseo.

Números 13:29

Te amalequetic nahinemic ta sq'uinal Neguev; te heteo, jebuseo soc amorreo nahinemic ta witsiltic; te cananeo nahinemic ta ti'mar soc ta ti'ti' muc'ul-ha' Jordán, xchihic hulel.

Números 34:6

Te mojon ta stojol ban ya xmahl c'ahc'al, ha te sti'il te Muc'ul Mar.

Deuteronomio 1:7

Bahanic ta witsiltic yu'un te amorreohetic soc spisil te q'uinaletic ta sjoyobal, ta Arabá, ta witsiltic, ta spamlejetic, ta Neguev, ta sti'il mar, ta sq'uinal te cananeohetic soc ta Líbano, c'alal ta muc'ul-ha' Éufrates.

Deuteronomio 3:25

Ya calbat wocol te yacuc awac'on sohlel ta yilel te lequil q'uinal ta jehch Jordán, ha te t'ujbil witsiltic soc te Líbano, xchihon.

Deuteronomio 4:49

soc spisil te Arabá ta stojol banti ya xloc' tal c'ahc'al yu'un Jordán, c'alal ta mar yu'un Arabá, ta ye'tal wits Pisga.

Deuteronomio 7:1

Te c'alal la yic'atix ochel a te Jehová te Dios awu'un ta q'uinal te yac awu'untay, soc te c'alal la stenticlan loq'uel ta atojol tsobol nacionetic, ha te heteo, gergeseo, amorreo, cananeo, ferezeo, heveo soc te jebuseo, huqueb nacionetic te c'ax bayelic soc c'ax hich yipic a te bin ut'il ha'ate,

Josué 1:15

ha to c'alal ya x'a'bot scux yo'tanic yu'un Jehová hich te bin ut'il ha'ex, soc te hich nix ya yu'untayic te q'uinal ya x'a'botic yu'un Jehová te Dios awu'unique. Patil ya suhtex bahel te q'uinal te a'botex awich'ic, te la ya'beyex Moisés te a'bat yu'un Jehová li' ta jehch Jordán ta stojol banti ya xloc' tal c'ahc'al, xchi.

Josué 1:4

Awu'unic ya xc'oht te q'uinal c'alal ta jochol taquin q'uinal c'alal ta Líbano ha to ta muc'ul-ha' Éufrates, spisil te sq'uinal heteohetic c'alal ta Muc'ul Mar ta stojol banti ya xmahl c'ahc'al.

Josué 10:23

Hich la spasic, la sloq'uesic tal ta ch'en te ho'tuhl ajwaliletic: ha te ajwaliletic yu'un Jerusalén, Hebrón, Jarmut, Laquis soc Eglón.

Josué 11:17

c'alal ta wits Halac te mohem bahel ta stojol Seir, ha to ta Baal-gad te ay ta spamlej yu'un Líbano ta ye'tal wits Hermón. Soc la stsac spisil te ajwaliletic yu'unic soc la smilticlan.

Josué 13:5

te sq'uinal te gibletic, soc spisil te Líbano ta stojol banti ya xloc' tal c'ahc'al, c'alal ta Baal-gad te ay ta ye'tal wits Hermón, ha to c'alal ta yochibal Hamat.

Josué 15:12

Te sti'il ta stojol banti ya xmahl c'ahc'al, ha te Muc'ul Mar. Ha te mojon ta sjoyobal te sq'uinal te snich'nab Judá, ha chican te jaychahp ayique.

Josué 22:4

Ta ora ini, te Jehová te Dios awu'unic la ya'be scux yo'tanic te awermanotac hich te bin ut'il yaloj, ha yu'un suhtanic bahel ta anahilpaq'uic, ta q'uinal te la ya'beyex ta jehch ha' Jordán te Moisés te a'bat yu'un Jehová.

Josué 22:7

Te Moisés ya'beyejix sq'uinalic ta Basán te j'ohlil jchahp yu'un Manasés; te yan j'ohlil, Josué la ya'be sq'uinalic ta yohlil te yermanotac ta stojol banti ya xmahl c'ahc'al yu'un Jordán. Ha nix hich te Josué la sticonlan bahel ta snahilpaq'uic, la yac'ticlambe bendición,

Josué 23:4

La jca'beyex awu'untayic ta jujuchahpex ta scuenta spasel seña ta na'el te nacionetic ini, ha te lajemiquix soc te hilemic to, c'alal ta muc'ul-ha' Jordán ha to ta Muc'ul Mar ta stojol banti ya xmahl c'ahc'al.

Josué 24:11

Sohlex bahel ta muc'ul-ha' Jordán, c'ohex ta Jericó. Te mach'atic nahinemic ta Jericó la ya'beyex guerra, soc nix te amorreo, ferezeo, cananeo, heteo, gergeseo, heveo soc te jebuseo; ho'on la jca'beyex ta ac'abic spisilic.

Josué 3:10

Soc hich la yal xan te Josué: Hich me yac ana'ic a te ay ta awohlilic te cuxul Dios soc te ya stenticlan loq'uel ta atojolic te cananeo, heteo, heveo, ferezeo, gergeseo, amorreo soc te jebuseohetic.

Josué 3:17

Yan te sacerdotehetic te sq'uechojic te scaxahul te chapbil-c'op yu'un Jehová, teq'uelic ta staquin lumil ta yohlil te Jordán ha to c'alal sohlic bahel ta Jordán spisil te pueblo. Spisil Israel sohlic bahel ta staquin lumil.

Josué 5:1

Spisil te ajwaliletic yu'un te amorreohetic te ayic ta stojol smahlib c'ahc'al yu'un te muc'ul-ha' Jordán, soc te ajwaliletic yu'un te cananeohetic ta nopol mar, c'alal la ya'iyic bin ut'il Jehová la staquijtes te ya'lel Jordán ta stojol te snich'nab Israel ha to c'alal sohlic bahel, laj yip yo'tanic soc och bayel xiwel ta yo'tanic ta stojol te snich'nab Israel.

Josué 6:27

Joquinot yu'un Jehová te Josué, soc puhc bahel sc'oblal ta spahmal te q'uinale.

Josué 9:7

Te winiquetic yu'un Israel la sjac'beyic te heveohetic: Repente nahinemex ta cohlilcotic; ¿bin ut'il ya xhu' ya jchap jc'optic? xchihic.