Joel 2:23 - Bible in Tzeltal Bachajón

²³ Ha nix hichex, yal-snich'nabex Sión, tse'eluc me awo'tanic, ayuc me yutsil awo'tanic ta stojol Jehová te Dios awu'unique, como la ya'beyexix tal te shahchibal ha'al ta yorahil, soc ya me sticon tal ta atojolic te ha'al ta yorahil scomil c'ahc'al soc ta yorahil snahtil c'ahc'al, hich te bin ut'il ta nahil to.

Bible in Tzeltal de Oxchuc y Tenejapa

²³ Binuc nax me awo'tanic, ja'ex te nainemex ta Sión, binuc nax me awo'tanic ta stojol te Cajwaltic Diose. Ja' stuquel la yac'beyexix tel ta yorail te ja'ale, ja' te ja'al ya xtal ta yorail invierno soc ta yorail primavera, mero jich nix te bit'il la spasbeyex ta neelal toe.

Joel 2:23 ပူးပေါင်းရင်းမြစ်များ

1 Reyes 8:36

a'iybeya sc'opic c'alal ta ch'ulchan, pasbeya perdón te smulic te a'batetic awu'un, ha te pueblo Israel. A'beya snopic te lequil be te ya xbehenic bahel a, soc a'beya tal ha'al li' ta aq'uinal te la awa'be sq'uinalin te pueblo awu'une.

Job 33:23

Pero teme ay jtuhl ch'ul a'bat ta sts'ehl te winic, te mach'a ya xc'opoj yu'un, jtuhl ta yohlil jmil, te ya yalbe te winic te bin lec ya sc'an ya spas,

Job 37:13

Hich ya spas ta scuenta castigo, o ta scuenta te q'uinal, o ta scuenta sc'uxul yo'tan.

Salmos 104:34

Te ayuc bin ut'il lec yo'tan yu'un te bin ya jnopilan ta co'tan; tse'el co'tan ta stojol te Jehová.

Salmos 147:8

Ha ya smac ta tocal te ch'ulchan, ya yac' tal ha'al ta bahlumilal, ya yac' coluc aquiltic ta witsiltic.

Salmos 149:2

Tse'eluc me yo'tan Israel ta stojol te Jpaswanej yu'une; te snich'nab Sión tse'eluc me yo'tanic ta stojol te Ajwalil yu'unique.

Salmos 28:7

Ha quip soc jmahquil te Jehová; ha smuc'ulinej co'tan, hich la jquich' coltayel, ha yu'un te tse'el co'tan. Ya calbe wocol ta c'ayoj.

Salmos 32:11

Tse'eluc me awo'tanic soc ayuc me yutsil awo'tanic ta stojol Jehová, ha'ex te toj awo'tanique; ¡c'ayojinanic soc yutsil q'uinal apisilic te toj awo'tanique!

Salmos 84:6

Te c'alal ya xc'axic ta Spamlej yu'un Ya'lel Sitil, ya sc'atp'unic ta sloq'uib-ha', soc te ha'al te nahil ya xtal ya snojes ta bendición.

Proverbios 16:15

Te stse'ejil sit yelaw te ajwalil ha seña cuxlejal; te slequil yo'tan, hich c'ohem te bin ut'il tocal ta sq'uepelal q'uinal.

Isaías 30:21

Teme ya xbahat ta wa'el o ta q'uexam, ya me awa'iy c'op ta apat te hich ya yalbat: Ha te be ini, t'una me, xchi.

Isaías 30:23

Te Cajwaltic ya yac' tal ha'al ta awawal-ts'unub c'alal yac ats'unic, soc te we'elil ya ya'bat te q'uinal ha bayel soc buhts'an. Ta hich ora te wacaxetic awu'un ya me sta swe'elic ta jamal q'uinal.

Isaías 41:16

Yac ach'ojticlan mohel, ya x'ich'otic bahel ta ic', te sutu-ic' ya spucticlan bahel. Pero te ha'ate tse'el awo'tan ta stojol te Jehová, lec q'uinal yac awa'iy yu'un te Ch'ul Dios yu'un Israel.

Isaías 61:10

Bayel yutsil co'tan ta stojol Jehová, ay yutsil yo'tan jch'uhlel ta stojol te Dios cu'une; como la ya'bon jlap sc'u'ulel colel soc la sjoytayon yu'un pac' scuenta bin stojil ta pasel, hich te bin ut'il lecolil te ya xnuhpun te ya sch'ahl sjol ta corona, hich te bin ut'il ach'ix te ya xnuhpun te ya sch'ahl sba ta sch'ahlelaletique.

Jeremías 3:3

Ha scuentahil te la yich' comel te ha'ale, te ma ba la yac' ha'al ta yorahil te ya xyaxub te q'uinale. Pero hich awelaw te bin ut'il jmulawil ants, ma ba la ac'an ya xq'uexawat yu'un.

Jeremías 5:24

Ma hichuc la yal ta yo'tanic: Ya quich'cotic ta muc' te Jehová te Dios cu'untic, te ya yac' tal ha'al ta yorahil ya sicub q'uinal soc ta yorahil ya xyaxub q'uinal, soc te ya ya'botic yorahil stsobel sit awal-ts'unubil, ma xchihuquex.

Lamentaciones 4:2

Te yal-snich'nab Sión te lec ta o'tanil, te c'ax hich ich'bil ta cuenta a te bin ut'il lequil oro, ¡yo'tic hich c'ohemic ta o'tanil te bin ut'il pac'bil oxometic, te ha ya'tel jpac'ojom!

Ezequiel 34:26

Ya ca'be bendición ta stojolic soc ta sjoyobal te tsehl cu'un, soc ya cac' te ya xtal ha'al ta yorahil; ha'al yu'un bendición ya xc'oht.

Oseas 6:3

Ac'a jna'betic sba te Jehová; ya xtal ta jtojoltic hich smelelil te bin ut'il ya xloc' tal te c'ahc'ale; ya xtal ta jtojoltic hich te bin ut'il te ha'ale, hich te bin ut'il te ha'al ta yorahil sit soc ta yorahil shahchel snahtil c'ahc'al te ya yahts'es te q'uinale.

Levítico 26:4

ya jticombeyex tal ha'al ta yorahil, soc te awal-ts'unubil soc te te'etic ya me yac'ticlan sit.

Amós 4:7

Ha nix hich la jcom ha'al oxeb u te ma to sta yorahil a te ya xloc' sit te awal-ts'unubil; la jcac' tal ha'al ta jun pueblo, ma ba la jcac' ta yan pueblo; jsehp nax q'uinal banti la yac' ha'al, soc jsehp banti ma la ya yac', hich taquij.

Zacarías 10:1

C'ambeyahic ha'al te Jehová ta yorahil ya x'ach'ub ya'binal te'; te Jehová ya yac' taluc tsantsehwal, ya ya'beyex bayel ha'al soc yaxal ha'mal ta sq'uinal jujutuhl.

Zacarías 10:7

Te Efraín hich ya xc'oht te bin ut'il soldado, soc tse'el yo'tan hich te bin ut'il ta scuenta vino; te yal-snich'nab ya me yilic soc ha tse'el yo'tanic yu'un, tse'el yo'tanic ta scuenta Jehová.

Zacarías 9:13

Como jt'imojix te Judá hich te bin ut'il t'ihmalte' cu'un soc la jcac' te ha ya'tejibalul c'oht te Efraín. Ya jtij hahchel awal-anich'nab, Sión, ta scontrahinel te awal-anich'nab Grecia, hich ya cac'at te bin ut'il espada yu'un soldado.

Zacarías 9:9

¡Tse'eluc me awo'tan, yantsil-nich'anat Sión! ¡awonanic soc yutsil q'uinal, yantsil-nich'anat Jerusalén! Ilawil, ya xtal ta atojol te ajwalil awu'un, toj yo'tan soc ya xcoltaywan, peq'uel yo'tan, cajal ta burro, ta tut burro te ha yal me' burra.

Hechos 14:17

ma yu'unuc te mayuc testigo yu'un, lec bin ya spas, ha te ya ya'botic tal ha'al ta ch'ulchan soc ya yac' sitinuc awal-ts'unubiletic ta yorahil, hich ya ya'botic jwe'eltic soc stse'elil co'tantic, xchihic.

Deuteronomio 11:14

ya cac' taluc ha'al ta aq'uinalic ta yorahil, ha te nahil ya xtal soc te patil ya xtale, hich yac atsobe sit a te trigo soc cebada, vino, soc te aceite awu'une.

Deuteronomio 28:12

Te Jehová ya sjambat te yawil lequil c'ulejalil yu'un, ha te ch'ulchan, scuenta yu'un ya yac' tal ha'al ta aq'uinal ta yorahil, soc yu'un ya ya'be bendición spisil te a'tel yac apas. Yac awa'be smajan abiluc bayel nacionetic, pero te ha'ate mayuc bin yac amajambe stuquel.

Deuteronomio 32:2

Te snopojibal cu'un ya me xt'uhlaj cohel hich te bin ut'il ha'al, te c'opetic cu'un ya me xco tal hich te bin ut'il ts'ujul, hich te bin ut'il c'unil ha'al te ya xco tal ta sba te ac, hich te bin ut'il ha' te xt'ulajan ya xc'oht ta sba te ha'male.

Filipenses 3:1

Ta slajibal, quermanotac, tse'eluc me awo'tanic ta stojol te Cajwaltique. Ma ba wocol ya ca'iy te ya jts'ihbabeyex xan ha'i c'op ini, soc ha ya xtuhun awu'unic.

Filipenses 3:3

Pues ho'otic te quich'ojtic te mero circuncisión, te ya jch'uhuntaytic te Dios ta scuenta te Espíritu yu'un Dios soc te bayel cutsilaltic ya ca'iytic ta scuenta Cristo Jesús, te ma ha'uc smuc'ulinej co'tantic te ch'ich'-baq'uet;

Filipenses 4:4

Spisiluc me ora tse'eluc awo'tanic ta stojol te Cajwaltique. Ya jcha'halbeyex xan: ¡Tse'eluc me awo'tanic!