Jeremías 3:2 - Bible in Tzeltal Bachajón

² Toya mohel asit ta toyol t'axal q'uinal, ilawil teme ay banti ma ba la awac' aba ta antsinel. La ahuhcan aba ta ti'be ta smahliyel te mach'a yac awac' aba ta antsinel yu'un, hich te bin ut'il jtuhl árabe ta jochol taquin q'uinal. La abohlobtes te q'uinal ta scuenta te antsinel awu'un soc achopolil.

Bible in Tzeltal de Oxchuc y Tenejapa

² “Ilawil ta lec ta bay t'axalix te witsetique: ¿Ay bal junuc te banti ma ba la awac' aba ta c'oponel tey a? La anajc'an aba ta maliywanej jichuc árabe ta jochol taquin q'uinal, la anajc'an aba ta bay ti'be ta smaliyel mach'atic ya smulanat. La aboltesbon te lumq'uinal yu'un amulwej soc te bila amen la apase.

Jeremías 3:2 ပူးပေါင်းရင်းမြစ်များ

Génesis 38:14

Ha yu'un te Tamar la sloq'ues te sc'u' slapoj scuenta me'ba' ants, la smuc sit ta pac' soc la smey sba ta rebozo, scuenta yu'un ma xna'bot sba a, baht shuhcan sba ta yochibal Enaim ta sbehlal Timnat; yu'un yilojix te muq'uix te Sela pero ma x'a'bot yic' sba soc.

1 Reyes 11:3

Ay ho'lajunwinic scha'bahc' (700) ta tuhl te la yihnamin, te ha yantsil-nich'anic ajwaliletic, soc ho'lajunwinic (300) ta tuhl yantic antsetic yu'un. Te antsetic yu'un la showiytesbeyic yo'tan te Salomón.

2 Reyes 23:13

Te ajwalil ha nix hich la sbohlobtesbe sc'oblal te toyol awilaletic te ayic ta stojol sloq'uib c'ahc'al yu'un Jerusalén, ta stojol sur yu'un te Wits yu'un Jinel, te la yich' pasel yu'un te Salomón ajwalil yu'un Israel ta stojol Astoret te loc'omba yu'un te sidoniohetic te ilobtic sba, soc te Quemos te loc'omba yu'un Moab, soc te Milcom te loc'omba yu'un te snich'nab Amón te ilobtic sba.

Salmos 106:38

La smalbeyic sch'ich'el mach'a mayuc smul, ha te sch'ich'elic te querem soc ach'ixetic yu'unic, ha te la yaq'uic ta milbil mahtanil ta stojol te loc'ombahetic yu'un Canaán; bohlob te q'uinal yu'un te sch'ich'elique.

Proverbios 23:28

Hich ya xpac'muhcultaywan te bin ut'il j'elec', soc ya yac' p'ohluc te winiquetic te ma junuc yo'tanique.

Proverbios 7:11

Te ants ya shach c'op soc ma stsahtay sba, mayuc bin ora ya xhil ta sna;

Jeremías 12:12

Ta spisil te toyol jochol q'uinal talic jinawetic, como te espada yu'un Jehová ya me slajin ta jehch ta jehch te q'uinale, mayuc mach'a lamal q'uinal ya ya'iy.

Jeremías 2:20

Como nameyix la awuy te yugo awu'un soc te bin chuculat a, hich la awal: Ma ba ya cac' jba ta a'batinel, xchihat. Ta spisil ini, la awac' aba ta antsinel ta spisil toyol tsehletic soc ta ye'tal spisil pimil ya'binal te'etic.

Jeremías 2:23

¿Bin ut'il ay a te hich yac awal: Ma ba bohloben jc'oblal, mayuc bin ora la jt'un bahel te baaletic, te xchihate? Ilawil bin ut'il ayat ta spamlej, na'a me te bin apasoj, yantsilel camellohat te bayuc nax ya x'ahnimajat,

Jeremías 2:7

Ho'on la jquiq'uex tal ta lequil q'uinal scuenta yu'un yac awe'beyic sit te awal ts'unubic soc te bintic lec tey a. Pero tal abohlobtesbonic sc'oblal te q'uinal cu'un soc la awaq'uic te ilobtic sba c'oht te bin quich'oje.

Jeremías 3:1

Ay hich ya yalic: Teme ay mach'a ya yihquitay hilel yihnam, ya xloc' bahel te ants soc ya xnuhpun soc yan winic, ¿ya to bal scha'ic'ot xan yu'un te winique? ¿Ma bal jc'axeluc ya xbohlob te q'uinal yu'un? Pero ha'at la awac' aba ta antsinel soc tsobol mach'atic jun awo'tan aba soc, ¿ya to bal suhtat tal ta jtojol? xchi te Jehová.

Jeremías 3:13

Na'a me hiche te achopolil, como acontrahinej te Jehová, te Dios awu'un, soc la awac' aba ta antsinel ta stojol yantic diosetic ta ye'tal spisil pimil ya'binal te'etic, ma ba la awa'iybon te jc'ope, xchi te Jehová.

Jeremías 3:21

Chicnaj aw ta toyol t'axal witsiltic, ha te oq'uel yu'un sc'anel coltayel te israeletic, como la showiytesic te be yu'unic, la sch'ay ta yo'tanic te Jehová, te Dios yu'unique.

Jeremías 3:9

Te bin ut'il mayuc sc'oblal la ya'iy te la yac' sba ta antsinel, hich la sbohlobtes te q'uinal, yu'un la yac' sba ta antsinel ta stojol ton soc te'.

Jeremías 7:29

¡Jerusalén, loq'uesa stsotsel ajol, ch'oja bahel, c'ayojtaya mel-o'tan c'ayoj ta toyol q'uinaletic, como te Jehová la sp'ajix soc la yihquitay te jcaj ts'umbalil te ilintayot yu'une!

Ezequiel 16:16

La apas toyol awilaletic ta ac'u' apac' soc la awac' aba ta antsinel tey a. ¡Mayuc hich c'ohem ta pasel soc mayuc hich ya xc'oht xan ta pasel!

Ezequiel 20:28

Como te c'alal la jcac' te ya x'ochic ta q'uinal te la jcal ta jamal te ya ca'beyic, la yilic toyol tsehletic o te'etic te ay bayel ya'binal, tey la yaq'uic a te milbil mahtaniletic yu'unic, tey la yaq'uic a mahtaniletic te la shahchbon quilimba; tey la yaq'uic a bintic sumet yic' soc tey la smalic a te malbil mahtaniletic yu'unique.

Oseas 2:5

Como la yac' sba ta antsinel te snanic, q'uexlaltic sba te mach'a la yalatay. Como hich la yal: ya jt'un bahel te mach'atic ya smulanon, te ya ya'bonic jwe'el soc ha', stsotsel tuminchij soc lino, aceite soc te bin ya cuch', xchi.

San Lucas 16:23

Ta stsobojibal mach'atic chamenic, te banti ay ta wocol, la shach sit, la yil namal ay te Abraham soc te ay ta sts'el te Lázaro.

Deuteronomio 12:2

Te nacionetic te ya xc'oht awu'untaybeyic te sq'uinalic, jc'axel me xalajimbeyic spisil te lugartic banti la sch'uhuntayic te diosetic yu'unic, ta toyol witsiltic, ta tsehltsehltic soc ta ye'tal spisil te'etic te bayel ya'binal.