Jeremías 3:13 - Bible in Tzeltal Bachajón

¹³ Na'a me hiche te achopolil, como acontrahinej te Jehová, te Dios awu'un, soc la awac' aba ta antsinel ta stojol yantic diosetic ta ye'tal spisil pimil ya'binal te'etic, ma ba la awa'iybon te jc'ope, xchi te Jehová.

Bible in Tzeltal de Oxchuc y Tenejapa

¹³ Ja' nax te yacuc ana' te amule, soc te la acontroin yu'un atoybail te Awajwal te Dios awu'une; te animajat ta sleel te mach'atic la ac'opon aba soc ta bay yet'al spisil te'etic te pim sc'abique, soc ma la ac'an la ach'uun te bila la cale. Jo'on Ajwalilon te jich ya cale”, uta me —xi' te Cajwaltique.

Jeremías 3:13 ပူးပေါင်းရင်းမြစ်များ

Nehemías 9:2

Parte yac'ojix sbahic a te sts'umbal Israel ta stojol spisil te jyanlumetique; teq'uelic a la yalic ta jamal te smulic soc te smul te sme'statique.

Proverbios 28:13

Te mach'a ya smuc smul, ma xp'ohl te bintic ay yu'un, yan te mach'a ya yal ta jamal smul soc ya yihquitay spasel, ya me sta c'uxultayel.

Isaías 57:5

te u'untaybil awo'tanic ta spasel mulil ta ye'tal te jihte'etic soc spisil te'etic te pimic ya'binal; te yac awaq'uic ta chic'bil mahtaniletic te awal-anich'nabic ta sjuclejetic soc ta lehch tontiquil?

Jeremías 14:10

Te Jehová hich la yalbe sc'oblal te pueblo ini: Bayel la smulanic te bayuc nax ya xbahtic, ma ba la scom yoquic. Ha yu'un te Jehová ma lecuc yo'tan yu'unic; ya me sna'beyix te smulic soc ya me yac'ticlambe castigo yu'un, xchi.

Jeremías 14:20

Jehová, jna'ojcotic te bin chopol jpasojcotic soc te smul te jme'jtatcotic, como jtahoj jmulcotic ta atojol.

Jeremías 2:20

Como nameyix la awuy te yugo awu'un soc te bin chuculat a, hich la awal: Ma ba ya cac' jba ta a'batinel, xchihat. Ta spisil ini, la awac' aba ta antsinel ta spisil toyol tsehletic soc ta ye'tal spisil pimil ya'binal te'etic.

Jeremías 2:25

Ma me xbehenat te mayuc atep soc ma me xawac' ya xtaquij anuc'. Pero hich la awal: Mayuc bin ya xhu' ta pasel, como ha c'ux ta co'tan te yan diosetic, ya me jt'un bahel, xchihat.

Jeremías 3:2

Toya mohel asit ta toyol t'axal q'uinal, ilawil teme ay banti ma ba la awac' aba ta antsinel. La ahuhcan aba ta ti'be ta smahliyel te mach'a yac awac' aba ta antsinel yu'un, hich te bin ut'il jtuhl árabe ta jochol taquin q'uinal. La abohlobtes te q'uinal ta scuenta te antsinel awu'un soc achopolil.

Jeremías 3:25

Ac'a jmehtsan jbahtic ta jq'uexlaltic, ac'a smucotic te pehc'anel cu'untique; como jtahoj jmultic ta stojol Jehová te Dios cu'untic, ho'otic soc te jme'jtatic, c'alal ta jqueremiltic c'alal ora ini, soc ma ba la jch'uhumbetic sc'op te Jehová te Dios cu'untique, xchihic.

Jeremías 3:6

Ta yorahil ay ta ajwalil a te Josías hich la yalbon te Jehová: ¿Awiloj bal te bin la spas te toyba Israel? Bahemix ta spisil toyol witsiltic soc ta ye'tal spisil pimil ya'binal te'etic, tey la yac' sba ta antsinel a.

Jeremías 7:24

Pero ma ba la sch'uhunic, ma ba la yich'ic ta cuenta; ha la st'unic bahel te bintic snopojic ta scuenta tulan schopolil yo'tanic. Suht ta spatic, ma ba behenic xan bahel,

Jeremías 7:26

Pero ma ba la ya'iybonic jc'op, ma ba la yac' schiquinic, la stulanijtes yo'tanic, c'ax hich chopol c'ohtic a te bin ut'il te sme'statique.

Ezequiel 16:15

Pero ha la smuc'ulin awo'tan te at'ujbilale, la awac' aba ta antsinel ta scaj te muc' sc'oblal te abihile, la awac' aba ta antsinel ta stojol spisil te mach'atic c'axic bahele. ¡Ha la yu'untayat!

Oseas 5:15

Ya suhton bahel ta banti cawil, ha to c'alal ya sna'ic te smulic soc ya slehbonic jsit quelaw. ¡Te c'alal ay swocolic a ya me slehonic! xchi.

Deuteronomio 12:2

Te nacionetic te ya xc'oht awu'untaybeyic te sq'uinalic, jc'axel me xalajimbeyic spisil te lugartic banti la sch'uhuntayic te diosetic yu'unic, ta toyol witsiltic, ta tsehltsehltic soc ta ye'tal spisil te'etic te bayel ya'binal.