Jeremías 22:3 - Bible in Tzeltal Bachajón

³ Hich yaloj te Jehová: Stojil me xawa'iy chahpanwanej soc pasa te bin stojil ta pasele. Ac'ahic ta libre ta sc'ab te j'uts'inwanej te mach'a tembil ta uts'inel yu'un soc ma me xawelc'ambe sbiluc te jyanlum, te me'ba' soc te me'ba' ants, soc ma me xamalbe sch'ich'el ta lugar ini te mach'a mayuc smule.

Bible in Tzeltal de Oxchuc y Tenejapa

³ At'elinaic spasel jchajbanwanej soc te bila stojil li' ta q'uinal to, ac'aic ta libre te mach'a tenbilic ta uts'inel yu'un te j'uts'inwanejetique. Ma xapejc'anic ni ma xabolc'optayic te mach'atic jyanlumetic, te me'ba alaletic soc te me'ba antsetique. Ma xamilic te ants-winiquetic te ma'yuc smulique.

Jeremías 22:3 ပူးပေါင်းရင်းမြစ်များ

2 Samuel 23:3

Te Dios yu'un Israel c'opojix; hich la yalbon te Muc'ul Ton yu'un Israel: Te mach'a stojil ya scuentahin te ants-winiquetic, te ya xcuentahinwan ta scuenta xi'el te Diose,

2 Reyes 24:4

soc ta scaj te la smalbe sch'ich'el te mach'a mayuc smul, ha noj ta ch'ich' te Jerusalén. Ha yu'un te Jehová ma ba la sc'an la spasbe perdón.

Job 22:9

Mayuc bin la awa'be bahel yich' te me'ba' antsetic soc la awac'ticlambe sc'abic te me'ba' alaletique.

Job 24:9

Ya spojbeyic schu' te me'ba' alaletic, ya yic'beyic hilel ta prenda te alaletic yu'un te pobre.

Salmos 68:5

Te Dios te ay ta ch'ul templo yu'un, ha stat te me'ba'etic, soc ya xc'opoj yu'un te me'ba' antsetique.

Salmos 82:4

Coltayahic te mach'a mayuc yip soc te mayuc bin ay yu'un; coltayahic loq'uel ta sc'abic te mach'atic chopolique.

Salmos 94:21

Ya schap sc'opic ta scontrahinel te mach'a toj yo'tan, soc ya yaq'uic ta lajel te mach'a mayuc smul.

Salmos 94:6

Ya smilic te me'ba' ants soc te jyanlum; ya slajimbeyic scuxlejalic te me'ba' alaletique.

Éxodo 22:21

Ma me xawuts'in jyanlum soc ma me xawa'be swocol, como jyanlumex ayinex ta sq'uinal Egipto.

Éxodo 22:22

Ma me xawuts'inic me'ba' ants o me'ba' alal.

Proverbios 23:10

Ma me xajeltaybe yawil te antiguo mojon, soc ma me xapojbe sq'uinalic te me'ba'etic,

Proverbios 6:17

ha te toyba ta sit, ya'iyel lot, te c'abaletic te ya smilic mach'a mayuc smul,

Isaías 1:23

Te príncipaletic awu'un ha jtoybahetic soc smohlol j'eleq'uetic. Spisilic toyol yo'tanic ya schon sbahic soc ya st'unic bahel mahtaniletic; ma ba toj ya schahpanic te me'ba'etic, soc ma xc'oht ta stojolic te swocol te me'ba' antsetique.

Isaías 58:6

Te lequil scomel we'elil te ya jc'an: ¿ma bal ha'uc te yac aloq'ues te scadenahil te pasel te bin chopol, te yac atihl te ihcatsiletic yu'un uts'inel, te yac awac' ta libre te mach'atic tembilic ta uts'inel, soc te yac awac'ticlan spisil yugohetic?

Isaías 58:7

¿Ma bal ha'uc te yac awa'be awe'el te mach'a ay ta wi'nal, te yac awa'be smajan ana te pobrehetic te mayuc sna; te yac awa'be sc'u'-spac' te mach'a yac awil te mayuc yu'un, soc te ma ba yac anac' aba ta stojol te awermanohe?

Jeremías 19:4

como la yihquitayonic soc yan c'oht yu'unic a te lugar ini te bin ut'il la schic'beyic pom yan diosetic te ma ba sna'beyejic sba, ni ha'uc te sme'static o te ajwaliletic yu'un Judá; soc te lugar ini la snojesic ta sch'ich'el te mach'atic mayuc smulique.

Jeremías 21:12

Sts'umbalex David, hich ya yal te Jehová: Stojil me xawa'iyic chahpanwanej ta sab, ac'ahic ta libre te mach'a tembil yu'un te j'uts'inwanej, scuenta yu'un ma ba ya xloc' talte quilimba hich te bin ut'il c'ahc'te ya xtihl te mayuc mach'a ya xhu' yu'un stup'el, ta scaj te chopol awa'telique.

Jeremías 22:17

Pero te asit soc te awo'tan ha nax ay sc'oblalic yu'un yac ale te bin ya sc'an awo'tan, yu'un yac amalbe sch'ich'el te mach'a mayuc smul, soc yu'un yac awa'iy uts'inwanej soc yac awac' c'axuc wocol.

Jeremías 26:16

Te príncipaletic soc spisil te pueblo hich la yalbeyic te sacerdotehetic soc te jalwanejetic: Ma sc'an te ya x'ac'ot ta lajel te winic ini, como la sc'oponotic ta scuenta sbihil Jehová te Dios cu'untique, xchihic.

Jeremías 5:28

Juhp'ic soc t'ujbil ta ilel, c'ax bayel bintic chopol ya spasic. Ma ba toj la schahpanic te me'ba' yu'un lec ya xc'ohtic. ¡Ma ba c'opojic yu'un te pobrehetique!

Jeremías 7:23

Pero la jcalbe te mandar ini: Ch'uhumbonic te jc'ope, hich Dioson awu'unic ya xc'ohon soc ha'ex pueblo cu'un ya xc'ohex. T'unahic bahel spisil te behetic te la jcalbeyexe, scuenta yu'un lec ya xc'ohex a, xchihon.

Jeremías 9:24

Te mach'a ya stoybe sba q'uinal ya'iy, hich me ac'a stoybe sba q'uinal ya'iy yu'un ini: ha te ya sna' bin ut'il ayon soc te ya sna'bon jba, te ya sna' te ho'on Jehovahon, te ya ca'iy c'uxultaywanej, te toj ya ca'iy chahpanwanej soc te ya jpas te bin stojil ta pasel, como ha ya sc'an co'tan ini, xchi te Jehová.

Lamentaciones 3:36

te sjinel te bin toj ta chahpanel, ma lecuc yo'tan yu'un te Jehová.

Ezequiel 18:12

ya yuts'in te pobre soc te mach'a mayuc bin ay yu'un, ya ya'iy elec' soc ma ba ya sutbe te bin yich'beyej, ya stoy mohel sit ta stojol te loc'ombahetic soc ya spas te bintic ilobtic sba,

Ezequiel 18:7

te mayuc mach'a ya x'uts'inwan, ya sutbe te bin yich'beyej; ma ba ya ya'iy elec', ya ya'be swe'el te mach'a ay swi'nal soc ya ya'be sc'u' te mach'a mayuc sc'u';

Ezequiel 22:7

P'ajbilic te me'iltatiletic ta awohlil; ya yuts'inic te jyanlumetic ta awohlil, soc ma ba toj bin ya spasbeyic te me'ba' alaletic soc me'ba' antsetique.

Ezequiel 45:9

Hich yaloj te Jehová, te Ajwalil: ¡Tic'aniquix a, príncipaletic yu'un Israel! Ihquitayahic te uts'inwanej soc te elec'. Stojil me xawa'iy chahpanwanej soc stojil me bintic yac apasique. Ma xateniquix loq'uel ta sq'uinalic te pueblo cu'un, xchi te Jehová, te Ajwalil.

Joel 3:19

Jimbil ya xc'oht te Egipto soc ya sutp'ij ta jochol taquin q'uinal te Edom, ta scaj te la yuts'in te sts'umbal Judá, como ta slumalic la smalbeyic sch'ich'el te mach'atic mayuc smulic.

Levítico 19:15

Ma xapas te bin ma stojiluc ta chahpanel, ma xana'be yo'bolil sba te mach'a pobre soc ma xacoltay te mach'a muc' sc'oblal; stojil me xachahpan te apat-axuhc.

Amós 5:15

Ihlayahic te bin chopol, c'ux me xawa'iy ta awo'tanic te bin lec, soc a'beya yich' yip te stojil chahpanel ta chapojibal; te Jehová te Dios te scuentahinej spisil ya wan sc'uxultay te jayeb ya xhilic yu'un José.

Amós 5:24

Pero ac'a oquinuc cohel te stojil chahpanel hich te bin ut'il ha', soc ac'a oquinuc cohel te bin toj ta pasel hich te bin ut'il be-ha' te ma xquehchaj ta oc.

Miqueas 3:11

Te jtsobawetic yu'un ya schahpanwanic ta taq'uin, te sacerdotehetic yu'un tojbil ya xnohpteswanic, te jalwanejetic yu'un ta scuenta taq'uin ya yalic bin ya sna'ic, soc yich'oj yipic ta Jehová, hich ya yalic: ¿Ma bal sjoquinejotic te Jehová? Mayuc bin chopol ya xtal ta jtojoltic, xchihic.

Miqueas 6:8

Ha'at ants-winicat, te Jehová la yalbatix te bin lec, te bin ya sc'ambat ta atojol: ha te yac apas te bin toj ta pasel, te c'ux ta awo'tan te c'uxultaywanej, soc te peq'uel yac awac' aba ta stojol te Dios awu'une.

Malaquías 3:5

Ya xtalon ta atojolic scuenta chahpanwanej; ora nax ya jcontrahin ta testigo-c'op te j'ac'-chameletic, te j'antsiwejetic, te mach'atic ya yalic ta jamal ta lot, te mach'atic ma ts'acaluc ya ya'be stojol ya'tel, te ya ya'beyic swocol te me'ba' antsetic soc te me'ba' alaletic, te mach'atic ma stojiluc bin ya spasbe te jyanlumetic, soc te mach'atic ma ba ya xi'onic, xchi te Jehová te scuentahinej spisil.

San Mateo 23:23

¡Ay me awocolic, escribanohetic, fariseohetic, jchebal-o'tanex! como yac aloq'ues jun ta slajunebal te menta, anís, soc comino, pero yac awihquitayic te bin tulan sc'oblal ta Ley: ha te bin toj ta pasel, te c'uxultaywanej soc te sch'uhunel-o'tanil. Ha ya sc'an pasel soc nix te yane.

Deuteronomio 10:18

ya spas bin stojil ta stojol te me'ba' alal soc te me'ba' ants; soc ha nix c'ux ta yo'tan te jyanlum, ya ya'be swe'el soc sc'u' spac'.

Deuteronomio 24:17

Ma me xayanijtes bin stojil ta pasel ta stojol te jyanlum o te me'ba' alaletic, soc ma me xawich'be hilel sc'u'-spac' te me'ba' antse;

Deuteronomio 24:7

Teme ya xchicnaj te ay mach'a la yelc'an bahel jtuhl yermano Israel, teme la smosohin o la schon, ya me yich' milel te j'elec'. Hich me yac aloq'ues te bin chopol ta awohlil.

Deuteronomio 25:1

Teme ay mach'atic ay c'op yu'unic, teme ya xbahtic ta meltsajibal yu'un te juecetic yu'un ya schahpanic, ha'ic ya yalic te mach'a mayuc smul soc te mach'a ay smule.

Deuteronomio 27:19

Chopol sc'oblal te mach'a ya sjimbe te bin stojil ay ta pasel ta stojol jyanlum, me'ba' alal o me'ba' ants, xchihic. Hichuc, xchihic me spisil te pueblo.

Santiago 1:27

Te sch'uhunel Dios te lec soc te mayuc bin chopol tey a ya yil te Jtatic Dios, ha te yula'tayel te me'ba' alaletic soc me'ba' antsetic te ay swocolic, soc te ya scanantay sba te ma xbohlobtesot yu'un te bahlumilale.