Jeremías 2:7 - Bible in Tzeltal Bachajón

⁷ Ho'on la jquiq'uex tal ta lequil q'uinal scuenta yu'un yac awe'beyic sit te awal ts'unubic soc te bintic lec tey a. Pero tal abohlobtesbonic sc'oblal te q'uinal cu'un soc la awaq'uic te ilobtic sba c'oht te bin quich'oje.

Bible in Tzeltal de Oxchuc y Tenejapa

⁷ Jo'on la quiq'uex tel li' ta lequil q'uinal to, swenta yu'un ya alo'beyic sit te awalts'unubil soc te mero lec te bila ya yac' tey a. Ja'uc me to, ja' tal aboltesbonic sc'oplal te lumq'uinal te ja'exe, la awac'bonic woclajuc co'tan yu'un yilayel te lumq'uinal cu'une.

Jeremías 2:7 ပူးပေါင်းရင်းမြစ်များ

Nehemías 9:25

Soc la yu'untayic pueblohetic te ay toyol ts'ahc yu'unic soc lequil q'uinal, soc la yich'ic nahetic nojelic ta lequil biluquetic, pozohetic, ts'usubiletic, ts'umbil olivohetic, soc yantic te'etic te ya yac'ticlan sit. We'ic, noj sch'uhtic soc juhp'ic, bayel la smulanic te yutsil awo'tan te c'ax muc'.

Nehemías 9:26

Pero la sc'axuntayic te mandariletic awu'un soc la stoy sbahic ta atojol, la swalac'patiyic te Ley awu'un, la smilticlanic te jalwanejetic awu'un te tsitsotic yu'unic te yacuc suhtic xan ta atojol; soc bayel la sbohlc'optayat.

Isaías 19:25

como te Jehová te scuentahinej spisil ya me yac'ticlambe bendición, hich ya yal: Bayel me yutsil te Egipto te pueblo cu'un; soc te Asiria, ha te ya'tel jc'ab; soc te Israel, ha te bin ya xc'oht ta jcuenta, xchi.

Jeremías 16:18

Nahil ya ca'be stojic cheb buelta yu'un te schopolilic soc te smulique, como la sbohlobtesbonic sc'oblal te jq'uinal ta scuenta te pujajtic sloc'ombahic te ihlaybilic, soc la snojesic te jq'uinal ta bintic ilobtic sba yu'unic, xchi te Jehová.

Jeremías 3:1

Ay hich ya yalic: Teme ay mach'a ya yihquitay hilel yihnam, ya xloc' bahel te ants soc ya xnuhpun soc yan winic, ¿ya to bal scha'ic'ot xan yu'un te winique? ¿Ma bal jc'axeluc ya xbohlob te q'uinal yu'un? Pero ha'at la awac' aba ta antsinel soc tsobol mach'atic jun awo'tan aba soc, ¿ya to bal suhtat tal ta jtojol? xchi te Jehová.

Jeremías 3:2

Toya mohel asit ta toyol t'axal q'uinal, ilawil teme ay banti ma ba la awac' aba ta antsinel. La ahuhcan aba ta ti'be ta smahliyel te mach'a yac awac' aba ta antsinel yu'un, hich te bin ut'il jtuhl árabe ta jochol taquin q'uinal. La abohlobtes te q'uinal ta scuenta te antsinel awu'un soc achopolil.

Jeremías 3:9

Te bin ut'il mayuc sc'oblal la ya'iy te la yac' sba ta antsinel, hich la sbohlobtes te q'uinal, yu'un la yac' sba ta antsinel ta stojol ton soc te'.

Jeremías 32:23

Ha'ic ochic talel soc la yu'untayic, pero ma ba la sch'uhumbat ac'op soc ma ba la st'unic te Ley awu'une; mayuc bin la spasic te la awalbe ta mandar. Ha yu'un la aticombe tal ta stojolic spisil te bintic chopol ini.

Jeremías 32:30

Como te snich'nab Israel soc te snich'nab Judá ha nax la spasic ta jtojol te bintic chopol c'alal ta squeremil to; te snich'nab Israel ha nax la yaq'uic te ya x'ilinon yu'un te ya'tel te sc'abique, xchi te Jehová.

Ezequiel 20:24

como ma ba la spasbonic te halbil mandariletic cu'un, la sp'ajic te chahpambil mandariletic cu'un soc la sbohlobtesbonic sc'oblal te sc'ahc'alel cux-o'tan cu'un, soc baht sitic ta stojol te loc'ombahetic yu'un te sme'statique.

Ezequiel 20:28

Como te c'alal la jcac' te ya x'ochic ta q'uinal te la jcal ta jamal te ya ca'beyic, la yilic toyol tsehletic o te'etic te ay bayel ya'binal, tey la yaq'uic a te milbil mahtaniletic yu'unic, tey la yaq'uic a mahtaniletic te la shahchbon quilimba; tey la yaq'uic a bintic sumet yic' soc tey la smalic a te malbil mahtaniletic yu'unique.

Ezequiel 20:6

Te bin ora la jach jc'ab, te la jcal jba ta jamal te ya quic'ticlan loq'uel tal ta sq'uinal Egipto yu'un ya xbahtic ta q'uinal te tsahbil cu'un, ha te q'uinal banti ya x'oquin leche soc chab soc c'ax hich t'ujbil a te bin ut'il spisil q'uinaletic,

Ezequiel 23:35

Ha yu'un hich yaloj te Jehová, te Ajwalil: Te bin ut'il la ach'ayon ta awo'tan soc la awalac'patiyon, ha yu'un ya me awil awocol yu'un te castigo yu'un te bin chopol la amulan soc te la awac' aba ta antsinel, xchi.

Ezequiel 36:17

Snich'anat winic, te c'alal nahinem ta sq'uinal a te sna Israel, la sbohlobtesbeyic sc'oblal ta scuenta te bin la spasic soc te ya'telique. Te bin la spasic hich c'ohem ta jtojol te bin ut'il te ya xbohlob sc'oblal te ants c'alal ya yil schamel ta jujun u.

Oseas 9:3

Ma ba ya xhilic ta sq'uinal Jehová, te Efraín ya suht bahel ta Egipto, soc ta Asiria me ya swe'elin we'elil te bohloben sc'oblale.

Miqueas 2:10

Hahchanic, behenanic, como ma ha'uc lugar yu'un cux-o'tanil ini, yu'un bohlobenix, jc'axel jihnemix.

Números 13:27

Soc hich la yalbeyic: C'ohotcotic ta q'uinal te la aticonotcotic bahel ta yilel, te mero melel ya x'oquin leche soc chab; ha me ini te sit ts'unub-awalil yu'une.

Deuteronomio 21:23

ma me xawac' te ya xc'ax ahc'abal jipil ta te' te sbaq'uetal, ya me amuc ta sc'ahc'alel nix, como bohloben sc'oblal yu'un Dios te mach'a jipil ta te'. Hich ma ba yac abohlobtes a te aq'uinal ya ya'bat te Jehová te Dios awu'une.

Deuteronomio 32:9

Como te bin ay yu'un Jehová, ha te pueblo yu'un, ha te Jacob, te ha yu'un c'oht.

Deuteronomio 6:18

Ha me xapas te bin toj soc te bin lec ta stojol te Jehová, scuenta yu'un hich lec ya xc'ohat soc hich ya x'och awu'untay a te lequil q'uinal te Jehová la yalbe ta jamal te ya ya'be te ame'atatique;