Jeremías 1:16 - Bible in Tzeltal Bachajón

¹⁶ Ya cal te castigo ya xc'oht ta stojolic ta scaj spisil schopolilic yu'un te la yihquitayon ta yo'tanic, la schic'beyic pom yantic diosetic soc la sch'uhuntayic te bintic la spas ta sc'abic.

Bible in Tzeltal de Oxchuc y Tenejapa

¹⁶ Ja' te castigo ya jticun ta stojol jmulawiletic te la yijq'uitayon ta yo'tanique, te la xchic'beyic pom soc la xch'uunic te lotil diosetic yu'un jyanlumetic te ja'ic nix la spasique.

Jeremías 1:16 ပူးပေါင်းရင်းမြစ်များ

2 Reyes 22:17

ta scaj te la yihquitayonic, la schic'beyic pom yantic diosetic, la yaq'uic ilinuc co'tan yu'un spisil bintic la spasic. Tihlemix quilimba ta stojol te lugar ini, ma ba ya xtup'.

2 Crónicas 15:2

hich loc' sta te Asa, hich la yalbe: A'iybon awa'iyic jc'op, Asa soc spisil Judá soc Benjamín: Ya me sjoquinex te Jehová teme jun awo'tan yac awac' abahic ta stojol. Teme yac alehic, ya me atahic; yan teme yac awihquitayic, ya me yihquitayex.

2 Crónicas 28:2

Ha la st'umbe sbe te ajwaliletic yu'un Israel soc la spasticlan loc'ombahetic yu'un Baal ta uhltesbil taq'uin.

2 Crónicas 34:25

ta scaj te la yihquitayonic soc la schic'beyic pom te yantic diosetic, hich la shachbonic quilimba a yu'un spisil te bintic la spasique. Ha yu'un ya xtal quilimba ta stojol te lugar ini, ma ba ya xtup'.

2 Crónicas 7:19

Yan teme ya suhtex ta apatic, teme yac awihquitayic hilel te chahpambil mandariletic soc te mandariletic cu'un te la jca'beyex ta atojolic, teme yac awac' abahic ta a'batinel yu'un yantic diosetic, soc teme yac ach'uhuntayique,

Isaías 2:8

Ha nix hich nojel ta loc'ombahetic te sq'uinalique, ya squejan sbahic ta stojol te ya'tel te sc'abic, te bin spasojic ta yal sc'abic.

Isaías 37:19

soc la sch'ojbeyic ta c'ahc' te diosetic yu'unic, como ma dioseticuc, ha ya'tel sc'ab winic te pasbilic ta te' soc ta ton; ha yu'un la sjinic.

Isaías 44:15

Ha ya xtuhun yu'un te winic yu'un ya schic', ha ya sc'atin, soc ya ya'be si'ilin te horno, ya spas pan a; soc ya spas jun dios a, ya sch'uhuntay; ya spas jun loc'omba, ya squejan sba ta stojol.

Isaías 65:3

jun pueblo te ta mero jsit ya yac' ilinucon spisil ora, ya yac' milbil mahtaniletic ta ts'umbil nichimetic soc ya schic' pom ta sba ladrillohetic;

Jeremías 10:15

Ma xtuhun, tojol a'tel; ta yorahil yich'el castigo, ya xlaj.

Jeremías 10:3

Como ma xtuhun te stalel te pueblohetic: Ya sts'etic te' ta tohyem te'etic, te mach'a ya sna', ya schahpan ta cincel;

Jeremías 11:12

Ha yu'un te pueblohetic yu'un Judá soc te mach'atic nahinemic ta Jerusalén ya me xbaht yawtayic te diosetic te ya schic'beyic pom, pero ma xhu' ya xcoltayotic yu'un te c'alal ya xtal yorahil wocol.

Jeremías 11:17

Te Jehová te scuentahinej spisil, te mach'a la sts'unat, yalojix mandar te ay bin chopol ya xc'oht ta atojol, ta scaj te bintic chopol spasojic te sna Israel soc te sna Judá, te hich la shachbonic quilimba yu'un te la schic'beyic pom te Baal, xchi.

Jeremías 15:6

Ha'at la awihquitayon, xchi te Jehová, suhtat bahel ta apat; ha yu'un ya jach jc'ab ta atojol, ya jinat. ¡Luhbenonix yu'un jna'belat yo'bolil aba!

Jeremías 16:11

Hich me yac ajac'be: Como la yihquitayon te ame'atatic, xchi te Jehová, soc la st'unic bahel yantic diosetic soc la yac' sbahic ta a'batinel yu'unic soc la sch'uhuntayic. La yihquitayonic soc ma ba la sch'uhunic spasel te Ley cu'une.

Jeremías 17:13

Jehová, te smuc'ulat yo'tan Israel, spisil te mach'atic ya yihquitayat ya x'ac'otic ta q'uexlal. Te mach'atic ya spit sbahic ta atojol, ya yich'ic ts'ihbayel ta ts'ubil lum ta scaj te la yihquitayic hilel te Jehová, te cuxul sloq'uib-ha'e.

Jeremías 18:15

¡Pero te pueblo cu'un ch'ayon ta yo'tanic, ya schic'be pom te loc'ombahetic te ma xtuhunique! La sc'ohchin sbahic ta behetic yu'unic, ta namey behetic, st'unojic joybehetic, ma ha'uc chapal behetic.

Jeremías 19:4

como la yihquitayonic soc yan c'oht yu'unic a te lugar ini te bin ut'il la schic'beyic pom yan diosetic te ma ba sna'beyejic sba, ni ha'uc te sme'static o te ajwaliletic yu'un Judá; soc te lugar ini la snojesic ta sch'ich'el te mach'atic mayuc smulique.

Jeremías 2:13

Cha'chahp mulil la spas te pueblo cu'une: ha te la yihquitayon, ho'on te cuxul sloq'uib-ha'on, soc la shotic yawil ha' yu'unic, ha yawil ha'etic te lohmenic te ma xhil ha' tey a.

Jeremías 2:17

¿Ma bal ha'uc hich pasbotat yu'un te la awihquitay hilel te Jehová te Dios awu'un te c'alal la stojobtesat bahel ta be?

Jeremías 2:19

Ya ya'bat castigo te amule, ya yalbat amul te ma junuc awo'tan. Nopa awa'iy hiche soc na'a me te ha chopol soc ch'a te yac awihquitay hilel te Jehová te Dios awu'un, soc te ma ba ya xiw awo'tan ta jtojol, xchi te Jehová te scuentahinej spisil.

Jeremías 2:28

¿Banti ay te diosetic awu'unic te la apasique? ¡Ac'a hahchuquic, ya quiltic teme ya xhu' ya scoltayex ta yorahil awocol! como hich yipal diosetic awu'un te bin ut'il pueblohetic awu'une, Judá.

Jeremías 4:12

te ic' te ya cac' taluc, c'ax hich ay yip a, como yo'tic ho'onix ya calbe smulic, xchi.

Jeremías 4:28

Ha yu'un ya me smel yo'tan te lumq'uinal, soc te ch'ulchan ta toyol ya me x'ihc'ub, como c'opojemon, la jnopix, ma ba ya jsut te jc'ope, ma ba ya suhton ta jpat.

Jeremías 44:17

Ha ya jpascotic spisil te bintic calojcotic: ha te ya ca'becotic pom soc malbil mahtaniletic te ajwalil-ants yu'un ch'ulchan, hich te bin ut'il la jpascotic soc te la spasic te jme'jtatcotic, te ajwaliletic soc te príncipaletic cu'untcotic ta pueblohetic yu'un Judá soc ta callehetic ta Jerusalén. Ta hich ora ay bayel we'elil cu'untcotic, tse'el co'tantcotic soc mayuc bin chopol la jquilcotic.

Jeremías 5:29

¿Ma bal yacuc ca'be castigo yu'un? xchi te Jehová. ¿Ma bal yacuc ca'be spacol te nación te hich yilel stalel?

Jeremías 5:9

¿Ma bal yacuc ca'be castigo yu'un? xchi te Jehová. Te jun nación hich te bin ut'il ini ¿ma bal yacuc ca'be spacol?

Jeremías 51:17

Ha sonso spisil ants-winiquetic, ma sna'ic q'uinal. Spisil te mach'atic ya spasic loc'ombahetic ya xq'uexawic yu'un, como lotil te loc'ombahetic, mayuc scuxlejal.

Jeremías 7:17

¿Ma bal awilojuc te bintic ya spasic ta pueblohetic yu'un Judá soc ta callehetic ta Jerusalén?

Jeremías 7:18

Te al-nich'anetic ya stsobic tal si', te tatiletic ya stsunic c'ahc', te antsetic ya swots'ic harina yu'un spasbeyel tut panetic te ajwalil-ants yu'un ch'ulchan; soc ya ya'beyic malbil mahtaniletic yantic diosetic, yu'un ya shachbonic quilimba a.

Jeremías 7:9

Yac awa'iyic elec', milaw, antsiwej, yalel ta jamal lot, yac achic' pom ta stojol Baal soc yac at'unic bahel diosetic te ma ba ana'beyejic sba,

Ezequiel 16:18

La amucticlan ta t'ujbil ac'u' apac', soc la awa'be smahtanin te aceite soc te pom cu'une.

Ezequiel 24:14

Ho'on Jehovahon, calojix; ya me xtal, ho'on ya cac' c'ohtuc ta pasel. Ma ba ya suhton ta jpat, ma ba ya jna'bat yo'bolil aba, ma ba ya jsuht jc'op. Ha chican te behetic awu'un soc te awa'telic, hich yac awich' chahpanel a, xchi te Jehová, te Ajwalil.

Oseas 11:2

C'alal bayel la jquic', namal to xan la yac' sba ta jtojol. La ya'be chic'bil mahtaniletic te baaletic, soc la schic'beyic pom te loc'ombahetique.

Oseas 8:6

Como ha nix yu'un Israel te jcolel toro; pasbil yu'un mach'a ya sna' spasel, ma ha'uc Dios te toro. Ha yu'un ya me yich' wuyel te jcolel toro yu'un Samaria.

Joel 2:11

Te Jehová ya yal mandar ta stojol te soldadohetic yu'un, c'ax muc' te campamento yu'unic, soc bayel yipic ya sch'uhunic spasel te smandare. Muc' soc xiweltic sba te sc'ahc'alel yu'un Jehová; ¿mach'a ya xcuhch yu'un?

Hechos 7:41

Hich la spasic sloc'omba jcolel toro, la ya'beyic milbil mahtanil te loc'omba, tse'el yo'tanic yu'un te bin la spasic ta sc'abic.

Deuteronomio 28:20

Te Jehová ya me sticon tal te chopol c'oblalil ta atojol, ma xana' bin yac apas, soc ay awocol yu'un spisil bintic yac apas, ha to c'alal jc'axel yac awich' lajinel soc te ora nax ya xch'ayat bahel ta scaj te schopolil awa'tel te la awihquitayon yu'une.

Deuteronomio 31:16

Te Jehová hich la yalbe te Moisés: Ilawil, ya xchamatix. Te pueblo ini ya me xhahch yac' sbahic ta antsinel c'ohem ta stojol te yantic diosetic yu'un te q'uinal te banti ya xbahtic. Ya me yihquitayon soc ya me sjin te chapbil-c'op jpasoj soc.

Josué 24:20

Teme yac awihquitayic hilel te Jehová, teme yac awac' abahic ta a'batinel yu'un yantic diosetic, ya me suht tal ya'beyex awocolic soc ya me slajinex, aunque lec bin la spasbeyex ta nahil to, xchi.

Apocalipsis 9:20

Te jayeb xan mach'atic ma ba lajic yu'un te wocoletic ini, ma teyuc la suhtes yo'tanic yu'un a te bin spasoj ta sc'abic, soc ma ba la yihquitayic sch'uhunel te pucujetic soc te yahcananic pasticlambil ta oro, plata, bronce, ton, soc te', te ma xyilic q'uinal, ma xya'iyic c'op soc ma xbehenic.