Eclesiastés 2:3 - Bible in Tzeltal Bachajón

³ La jnop ta co'tan te ya ca'be smulan jbaq'uetal te vino soc te ya ca'iy sonsohil, ya to scuentahimbon co'tan a te p'ijil-o'tanile, ha to c'alal ya quil bin a te lec ay ta pasel yu'un te yal-snich'nab ants-winiquetic ta ye'tal ch'ulchan te jayeb c'ahc'al cuxulic.

Bible in Tzeltal de Oxchuc y Tenejapa

³ Ta co'tan ja' yic'ojon la caiy a te p'ijil-o'tanile, la jc'an jmulanbey yutsilal vino, la cac' jba ta sc'ab c'oem, swenta yu'un ya quil teme ja' lec ya xc'ot a te winic teme ya yuch' te jayeb c'aal ajtaybil te ya x'ain ta balumilale.

Eclesiastés 2:3 ပူးပေါင်းရင်းမြစ်များ

Génesis 47:9

Te Jacob hich la sjac'be sc'op te faraón: Te jayeb ha'bil behenon ta q'uinal ha lajuneb shucwinic (130) ha'bil. Com soc wocol te jayeb ha'bil cuxulon, ma la jta hich te jayeb ya'bilalic behenic ta q'uinal te jme'jtate, xchi.

Job 14:14

Teme cham te winique, ¿ya to bal xcha'cuxaj xan? Ya jmahliy spisil te c'ahc'aleletic cu'un ha to c'alal ya xtal te colel cu'une.

Salmos 104:15

soc te vino te ya yac' stse'ejin yo'tan, te aceite te ya yac' te xch'ulet yelaw yu'un, soc te pan te ya xcuxaj ants-winiquetic yu'un.

Proverbios 20:1

Ha jlabanwanej te vino, soc hach-c'op te pajubtesbil uch'balil; mayuc sp'ijil yo'tan te mach'a ya xhowiytesot yu'un.

Eclesiastés 1:17

La jcac' co'tan ta sna'beyel sba te p'ijil-o'tanil soc nix te locahijel soc te bin sonsohil. La jna' te ha nix snutsel te iq'ue.

Eclesiastés 10:19

Ya yich' pasel bayel we'elil scuenta tse'el-o'tanil, te vino ya yac' yutsil q'uinal, soc spisil bin ya xtuhun a te taq'uine.

Eclesiastés 12:13

Te slajibal spisil te bin ay ta a'iyel, ha ini: Ich'a ta muc' te Diose soc ch'uhumbeya te mandariletic yu'une, como hich ay spisil te ay ta scuenta spasel te ants-winiquetique.

Eclesiastés 2:24

Mayuc bin yan xan lec ya spas te winic, ha nax te ya xwe' ya x'uch' soc te ya ya'iybe yutsil te ya'tele. Quiloj te ha nix talem ta stojol Dios ini.

Eclesiastés 5:18

Quiloj te bin lec: ha te ya xwe' ya x'uch' soc ya ya'iybe yutsil te ya'tel te ya yo'tantay spasel ta ye'tal ch'ulchan te jayeb c'ahc'al a'bibil scuxlejal yu'un Dios, como hich ay te bin ay yu'une.

Eclesiastés 6:12

Como ¿mach'a ya sna' bin a te lec yu'un te ants-winic te jayeb c'ahc'al cuxul, te jayeb c'ahc'al scuxlejal te tojol nax, te hich ya xc'ax te bin ut'il axinal? ¿Soc mach'a ya xhu' ya ya'be sna' te winic te bin ya xc'oht ta pasel ta patil yu'un ta ye'tal te ch'ulchane?

Eclesiastés 7:18

Ha lec te yac atsac te june, soc te ma xcol bahel ta ac'ab te yane. Te mach'a ya yich' ta muc' te Diose, spisil lec ya xc'oht yu'un.

Eclesiastés 7:25

Ha yu'un la jcac' co'tan ta sna'beyel scuentahil, ta stsahtayel soc ta slehel te p'ijil-o'tanil soc te bin ut'il ay spisil, soc ta sna'beyel schopolil te sonsohil soc te ya xhowiyteswan te sohquejolalile.

Eclesiastés 8:15

Ha yu'un ya cal te ha lec te yutsil-o'tanil, como mayuc bin lec xan ya spas te winic ta ye'tal ch'ulchan, ha te ya xwe' ya x'uch' soc te ay yutsil q'uinal ya ya'iy. Ha ya xjoquinot yu'un te jayeb c'ahc'al te scuxlejal ta ye'tal ch'ulchan te ya x'a'bot yu'un te Diose.

San Mateo 6:24

Mayuc mach'a ya xhu' ya yac' sba ta a'batinel yu'un cheb ajwaliletic; como ya me yihlay te jtuhle soc c'ux ta yo'tan te yane, o jun yo'tan ta stojol te jtuhle, soc ya sp'aj te yane. Ha nix hich, ma xhu' yac awac' abahic ta a'batinel yu'un Dios soc yu'un te c'uhlejalile.

Efesios 5:18

Ma me xyacubex yu'un vino, te ha ya xbohlobteswan; ha'uc me nojel ta awo'tanic te Ch'ul Espíritu.

Jueces 9:13

Hich halbotic yu'un te ts'usub: ¿Ya bal c'an quihquitay hilel te vino cu'un, te ay yutsil yo'tan a te Dios soc te winiquetic, yu'un ya jcuentahin te te'etic? xchi.

1 Samuel 25:36

Te Abigail c'alal suht bahel ta stojol Nabal, yac ta pas-q'uin ta sna a hich te bin ut'il ajwalil. Tse'el yo'tan te Nabal soc buen yuch'oj, ha yu'un mayuc bin la yalbe ha to ta schebal c'ahc'al.