Apocalipsis 3:7 - Bible in Tzeltal Bachajón

⁷ Ts'ihbabeya te ch'ul a'bat yu'un te iglesia ta Filadelfia: Hich ya yal te Mach'a ch'ultesbil, te smelelil c'op, te yich'oj te llave yu'un David, te mach'a ya sjam, te mayuc mach'a ya xhu' ya smac, soc te ya smac, te mayuc mach'a ya xhu' ya sjam:

Nuevo Testamento Tzeltal de Amatenango

⁷ Sok la yalbon: —Jich me xꞌatsꞌibabe xan ta sjun te ángel te ba ay te juju-tijkꞌ hermanoetik ta Filadelfiae: “Jaꞌ to jich ya yal te Machꞌa tojix aye y te batsꞌi jiche, jaꞌ te Machꞌa yichꞌoj syawe te rey Davide, te stukele te kꞌalal ya sjeꞌe maꞌyuk machꞌa ya xjuꞌ ya stsꞌus, te kꞌalal ya stsꞌuse maꞌyuk machꞌa ya xjuꞌ yuꞌun sjeꞌel.

Bible in Tzeltal de Oxchuc y Tenejapa

⁷ Soc la yalbon: —Ts'ibubeya te ch'ul abat yu'un te jchajp jch'uunjeletic te ay ta lum Filadelfia: Jich me la yal te ch'ul Dios te ma'yuc lot ta yo'tane, ja' te Mach'a yich'oj te llave yu'un te muc' ajwalil Davide, ja' te Mach'a ya sjam te ma'yuc jtuluc ya xju' yu'un smaquele. Te bila ya smaque, ma'yuc jtuluc mach'a ya xju' yu'un sjamel.

Apocalipsis 3:7 ပူးပေါင်းရင်းမြစ်များ

Job 11:10

Teme ya xc'ax te Dios soc ya xchucawan, teme ya x'ic'awan ta chahpajibal, ¿mach'a ya xhu' ya scom?

Job 12:14

Te bin ya sjin, mayuc mach'a ya xhu' ya scha'pas xan; teme ya schuc te winique, mayuc mach'a ya xhu' ya xjahm loq'uel.

Salmos 145:17

Te Jehová toj spisil bintic ya spas soc ya sc'uxultay spisil bintic spasoj.

Salmos 16:10

como ma ba yac awihquitayon hilel ta muquenal, ma ba yac awac' ta c'a'el te mach'a awu'un te ch'ultesbile.

Salmos 89:18

Como ha mahquilal cu'untic te Jehová, te ajwalil cu'untic ha te Ch'ul Dios yu'un Israel.

Isaías 22:22

Ya jcajambe ta snehquel te llave yu'un te sna David; ha ya sjam, mayuc mach'a ya xhu' ya smac, soc ya smac, mayuc mach'a ya xhu' ya sjam.

Isaías 30:11

ihquitaya te be, loc'anic ta sbehlal, ma me xawalbotic xan sc'oblal te Ch'ul Dios yu'un Israel, xchihic.

Isaías 41:14

¡Ma me xiwat, yolat Jacob, ha'ex te mayuc tsobolex yu'un Israel! Ho'on ya jcoltayat, xchi te Jehová; te Ch'ul Dios yu'un Israel, ha te J'ac'aw ta libre awu'unique.

Isaías 41:16

Yac ach'ojticlan mohel, ya x'ich'otic bahel ta ic', te sutu-ic' ya spucticlan bahel. Pero te ha'ate tse'el awo'tan ta stojol te Jehová, lec q'uinal yac awa'iy yu'un te Ch'ul Dios yu'un Israel.

Isaías 41:20

scuenta yu'un ya yilic soc ya sna'ic spisilic, ya snop ta yo'tanic soc ya xc'oht ta yo'tanic te ha spasoj te sc'ab Jehová ini, te chicnajtesot yu'un te Ch'ul Dioson yu'un Israel, xchi.

Isaías 47:4

xchi te J'ac'aw ta libre cu'untic: te Jehová te scuentahinej spisil te sbihile, te Ch'ul Dios yu'un Israel.

Isaías 48:17

Hich yaloj te Jehová, te J'ac'aw ta libre awu'un, te Ch'ul Dios yu'un te Israel: Ho'on Jehovahon, te Dioson awu'un, te ya ca'bat anop te bin lec ya xc'ohat yu'un, te ya jtojobtesat ta be te banti ya sc'an yac at'un bahele.

Isaías 49:7

Hich yaloj te Jehová, te J'ac'aw ta libre, te Ch'ul Dios yu'un Israel, hich ya yalbe te mach'a ihlaybil, te p'ajbil yu'un te nacionetic, te a'bat yu'un te tulan jcuentahinwanejetic: C'alal ya yilex ajwaliletic, ya me xhahchic, ya me squejan sbahic príncipaletic, ta scaj Jehová te stalel jun yo'tan, te Ch'ul Dios yu'un Israel te la stsahate, xchi.

Isaías 54:5

Como ha amamalal te Jpaswanej awu'un, ha Jehová te scuentahinej spisil te sbihile; te J'ac'aw ta libre awu'un, ha te Ch'ul Dios yu'un Israel, te Dios yu'un spisil te q'uinal, xchi te sbihile.

Isaías 55:5

Ya me awic' tal nacionetic te ma na'biluc awu'un, soc pueblohetic te ma sna'bat aba, ahnimal ya xtalic ta atojol, ta scaj te Jehová, te Dios awu'un, te Ch'ul Dios yu'un Israel, te la yac'at ta ich'el ta muc'.

Isaías 6:3

Hich talel c'axel yacalic ta yalel: ¡Ch'ul Dios, Ch'ul Dios, Ch'ul Dios, Jehová te scuentahinej spisil; nojel ta swohlol bahlumilal te yutsilale! xchihic.

San Mateo 16:19

Ha'at ya ca'bat te llavehetic yu'un te cuentahinel yu'un te ch'ulchan: spisil bintic yac achuc ta bahlumilal, ya me yich' chuquel ta ch'ulchan, soc spisil bintic yac atil ta bahlumilal, ya me yich' tihlel ta ch'ulchan, xchi.

San Mateo 24:35

Ya xlaj ch'ulchan soc bahlumilal, pero ma ba ya xlaj stuquel te jc'ope.

San Marcos 1:24

¿Bin awochelotcotic a, Jesús te talemat ta Nazaret? ¿Yu'un bal tal alajinotcotic? Ya jna'bat aba, ha'at Sch'ul-nich'anat Dios, xchi ta aw.

San Lucas 1:32

Muc' sc'oblal ya xc'oht, soc ya x'a'bot sbihilin Snich'an te Mach'a ay ta toyol. Te Cajwaltic Dios ya me ya'be sjelolin ta ajwalil te David te state.

San Lucas 4:34

¡Ihquitayawotcotic! ¿Bin awochelotcotic a, Jesús te talemat ta Nazaret? ¿Tal bal alajinotcotic? Ya jna'bat aba, ha'at te Mach'a Ch'ultesbilat yu'un Dios, xchi.

San Juan 14:6

La yal te Jesús: Ho'on te behon, ho'on te smelelil-c'opon, soc ho'on te cuxlejalon; mayuc mach'a ya xtal ta stojol te Tatil teme ma ha'ucon ta jcuenta.

Hechos 3:14

Ha'ex la amuc ta awo'tanic te Mach'a Ch'ultesbil soc te Mach'a Toj Yo'tan, ha la ac'ambeyic scoltayel te jmilawe;

1 Juan 5:20

Jna'ojtic te xtaluquix te Snich'an Dios soc te la yac' jna'tic q'uinal yu'un ya jna'betic sba te mach'a smelelil; soc ayotic ta stojol te mach'a smelelil, ha te Jesucristo. Ha me te mero Dios soc ha me te cuxlejal scuenta sbahtel q'uinal.

Apocalipsis 1:11

te hich la yal: Ho'on te Alfa soc te Omega, te shahchibalon soc te slajibalon. Ts'ihbaya ta hun te bin yac awil soc ticona bahel ta stojol te huqueb iglesiahetic: ha te Éfeso, Esmirna, Pérgamo, Tiatira, Sardis, Filadelfia, soc te Laodicea, xchi la jca'iy.

Apocalipsis 1:18

te mach'a cuxul. Lajon, pero cuxulonix sbahtel q'uinal. Quich'oj te llave yu'un lajel soc yu'un te yawil mach'atic chamenic.

Apocalipsis 1:5

soc yu'un te Jesucristo, te testigo te stalel jun yo'tan, te ba-nich'anil te cha'cuxaj tal ta yohlil mach'atic chamenic soc te ha jcuentahinwanej yu'un te ajwaliletic ayic ta bahlumilal. Ayuc me yutsilal soc yu'el sbahtel q'uinal te mach'a la sc'uxultayotic soc te la yac'otic ta libre yu'un te jmultic ta scuenta sch'ich'el,

Apocalipsis 15:3

soc yac sc'ayojtaybelic te sc'ayoj Moisés, te ya'bat Dios, soc te sc'ayoj te Jcolel Tuminchij, hich yac yalbelic: Buen muc' soc bayel yutsil spisil awa'tel, Cajwaltic Dios te spisil ya xhu' awu'un; stojil soc smelelil te behetic awu'un, ha'at Muc'ul Ajwalilat yu'un te nacionetique.

Apocalipsis 16:7

Soc la jca'iy ay mach'a c'opoj talel tey ta scajtajib ta chiq'uel mahtanil, hich la yal: Melel, Cajwaltic Dios te spisil ya xhu' awu'un, smelelil soc stojil te chahpanel awu'une, xchi.

Apocalipsis 19:11

La jquil jamal te ch'ulchan, soc ay saquil cawu. Te mach'a cajal tey a, ha Stalel Jun Yo'tan soc Smelelil, xchi te sbihile; stojil ya x'ich'awan ta c'op soc ya yac' guerra.

Apocalipsis 19:2

como smelelil soc stojil te chahpanel yu'une. La ya'beyix castigo te muc'ul j'antsinel-ants te la sbohlobtes te bahlumilal ta scuenta te yajmule. La ya'beyix stoj te la smalbe sch'ich'el te a'batetic yu'une, xchihic.

Apocalipsis 2:1

Ts'ihbabeya te ch'ul a'bat yu'un te iglesia te ay ta Éfeso: Hich ya yal te mach'a ay huqueb eq'uetic ta swa'el-c'ab soc te ya xbehen ta yohlil te huqueb yawil c'ahc' pasbil ta oro:

Apocalipsis 21:5

Hich la yal te mach'a hucul ta muc'ul-huctajibal: Ya jpas ta yach'il spisil, xchi. Soc hich la yalbon: Ts'ihbaya ini, como te c'op ini ay ta ich'el ta cuenta soc smelelil, xchi.

Apocalipsis 3:14

Ts'ihbabeya te ch'ul a'bat yu'un te iglesia ta Laodicea: Hich ya yal te mach'a Hichuc, ha te testigo te stalel jun yo'tan soc te melel, te shahchibal te bintic pasticlambil yu'un Dios:

Apocalipsis 4:8

Ta schanebal te bintic cuxajtic ay wacwaqueb xic' ta jujun, soc ay sitic ta scohtol soc ta yutil. C'ahc'al ahc'abal ma xquehchajic ta yalel: Ch'ul Dios, Ch'ul Dios, Ch'ul Dios te Cajwaltic Dios te spisil ya xhu' yu'un, te ay ta namey, ta ora ini, soc te ya xtale, xchihic.

Apocalipsis 5:9

Soc la sc'ayojtayic yach'il c'ayoj te hich ya yal: Ha mero awu'un te yac atsac te balbil hun soc te yac ajam te sellohetic yu'une, como ha'at la awich' milel, soc ta scuenta ach'ich'el la amambe scolel te ants-winiquetic te ha yu'un Dios ya xc'ohtic, ta spisil ta chahp ts'umbaliletic, c'opiletic, pueblohetic soc nacionetic.

Apocalipsis 6:10

Tulan hich yac yalbelic: Cajwal te toj awo'tan soc te smelelil te ac'ope, ¿bin to ora te yac awich' ta c'op soc te yac awa'be stoj te mach'atic ayic ta bahlumilal te la smal jch'ich'elcotic? xchihic.