ZEFANYA 3:19 - Susula Malalaok Hehelu Palak Ma Hehelu Beuk

¹⁹ Neukose fain-na losa, Au tao akalulutuk hataholi manatuni-ndeni emi-a, ma Au fe hataholi ei helak-kala maso'dak. Au hela-nole falik, basa hataholi nanatapa henik-kala. Au tao asafali matasi'da-matasain-nala, da'di maha'da-holomatak; su'di nai bee boe, nakalenak nai basa daebafak-ka lala'en-na, neukose sila nananamatutua-namadedemak ma nanakoa-nanakiok.

ZEFANYA 3:19 ပူးပေါင်းရင်းမြစ်များ

YESAYA 26:11

Manetualain, O maheheleaom, fo huku O musum-ma, tehu ala ta bubuluk fa. Nemen-na fo, ala hapu mamaek nai lelek lita O susue-lalaim ba'eneu O anam-mala. Nemen-na fo mate-mopo la'iesak-kasa, hu kande hoholo-lalanek fo O sadian ba'eneus.

YESAYA 33:1

Soe ba'eneu ita musun-nala! Ala lamanako, leomae nako ta namanako sila fa, ma lalelesi, leomae hataholi ta nalelesi sila fa. Tehu lamanako ma lalelesi basa soona, neukose nakodaa namanakos, ma malelesik-ka, nalelesis.

YESAYA 60:14

Ni'iana manatuni-ndeni o-a, ala mai sene-do'ok, ma manamakadadaek hai o-a, neukose lakatele, neukose loke o lae, ‘Manetualain Kotan-na’, ‘Sion, fo Israel Manetualain Malalao-malalafun-na, Kotan-na’.

YESAYA 60:18

Neukose ta hapu seluk halak, la'eneu naseti-nalakak nai o nusam-ma fa, la'eneu nakalulutuk, ma manandefak nai o dae baba'em-ma fa, Neukose Au asulu-ahapa o, sama leo papala nanadamak-ka, fo neukose, o koa-kio Au, da'di leo o manasoi-manatefam.

YESAYA 61:7

Nanahu, emi hapu basa mamaek, diku la'i dua so, ma na'de manggenggeok-ka, boema nananakadadaek-ka, ana da'di emi baba'em so, hu ndia de, emi hapu pusaka didikuk la'i dua, nai emi nusam-ma ma emi manuu namahoko manaketu basa taak-ka.

YESAYA 62:7

Sila ta bole po'ilotak Manetualain, ka'da denge-denge fa, metema, Ana beita nafofo'a falik Yerusalem fa, ma Ana taon da'di nananita-nalelak nai basa daebafak-ka lala'en-na.

YEREMIA 30:16

Tehu besak ia basa manako'do emi-a, neukose nanako'dok, ma basa o musumom-mala neukose nanafoo nenik lo mamana tu'u-tapak-ka neu. Neukose Au tuni-ndeni manatuni-ndenik-ka, neukose Au amanako manamamanako emi-a.

YEREMIA 30:19

Ndia laun-nala neukose ala koa-kio Au nenik nakamek, ma ala eeki-latadale nenik namahokok. Au taon nana fe ha'da-holomata, te ta nananakadaek so'on, ma sila dede'un-nala boe tai lamaba'uk-ka.

YEREMIA 31:8

Au o falik-kasa neme kii mai; Au tao akabubuas neme daebafak-ka pe'dak leo pe'dak neu. Hataholi pokek-kala ma hataholi lu'uk-kala neukose ala tunga los, boema inak fo manabongi beuk-kala, ma inak kaiulis fo deka bobongik-kala boe. Sila basa-basas neukose ala fali ma'is te dede'un-nala mafandiknan lo nusak ia mai.

YEREMIA 33:9

Yerusalem neukose ana da'di namahokok ma Au matua mademang. Basa leoina manai daebafak ia neukose ala da'di manabiik ma mamata'uk, ma ala ta fe ha'da-holomata mai Au, metema lamanene la'eneu basa malole-mana'a fo Au taon soaneu Yerusalem laun-nala, ma la'eneu tetu-temak fo Au fen neu kota ndia.”

YEREMIA 46:28

Da'di boso bii-mamata'u, hai Au anang-ngala lemin: neukose Au mai soaneu soi po'i emi. Mamanak fo Au tao tapasasala emi nai leoina-la, neukose Au tao amate-amopo la'i esak-kasa, tehu Au ta tao emi tao leondiak fa. Memak emi ta maladeak neme huku-doki-ka mai fa, tehu Au huhuku-dodoking neu emi-a ndebeen-na ndos ma matetuk nanda no makeketun-na.” Au Manetualain nde manakokolak-ka.

YESKIAL 16:27

Besak ia, Au ho'i nakeketuk soaneu huku o, fo Au ho'i falik Au fe o baba'e-papalak-kala. Au fe o leo hataholi Filistin fo, ta lahiik loo o fa, ma ala malua mete o ha'da-tatao manggenggeom ndia.

YESKIAL 16:57

ma nai lelek, o tatao-nono'i mangalaum-ma, beita nanabubuluk fa hetu? Besak ia, o sama leo ndia so boe; o da'di bua nanahika-humek neme hataholi Edom, hataholi Filistin ma uma titia-tataim fe'ek fo, ala ta lahiik loo o fa.

YESKIAL 34:16

Neukose Au sanga manamopok-kala, neukose Au foo falik manasalak-kala, neukose Au poti-palu manamakahinak-kala, neukose Au puli-amo'do kamahe'dis-sala; tehu neukose Au tao amate-amopo maao-la, ma mabe'i-balakaik-kala, nana Au manafoo fo, tao hata fo malole.

YESKIAL 39:13

Basa laun manai nusak-ka lala'en-na, latoi-latono hataholi manamatek sila-la, de no sila tatao-nono'in ndia de, neukose ala hapu kokoa-kikiok, nai faik fo, Au atu'du Au mandela-masa'ang-nga. Au, Manetualain Fo Mademaina, nde manakokolak-ka.

YESKIAL 39:26

Metema ala leo seluk no nee-nee lino-linok nai sila nusan-na, fo ta hapu hataholi nakabibiik-kasa fa, soona neukose lafandele heni, tao leo beek de ala hapu mamaek, hu kande lalelesi Au.

MIKHA 7:10

Makahulun-na musu-a nakadadaek ita nenik nafa'da nae, “Manetualain, fo emi Manetualaim ndia nai bee?” Tehu besak ia, neukose lita hata fo Manetualain taon ba'eneu ita, fo neukose ala mae. Neukose ita tita matan, ita musun sila-la kala, ma nanaheheta-aa'ik sama leo tane nai enok lain.

ZEFANYA 3:15

Nana, Manetualain Ana hahae huku emi. Ana usi heni basa emi musum-mala lala'en-na so, Mane Israel, fo emi Manetualaim-ma, nananasulu-nahapa emi. Besak ia, ta paluu emi mame'da bibii-namata'uk so'on.

ZAKHARIA 8:23

Nai faik ndia, neukose hataholi nusa dea 10 mai leo hataholi Yahudi esa mai, fo lafa'da lae, ‘Ami boeo mahiik maua-manale sama leo emi boe, nana ami mamanene, lae Manetualain ba'e-pala emi.’ ” Manetualain Fo Manakoasa nde manakokolak-ka.

ULANGAN 26:19

Neukose Manetualain taon-na emi, mamade'u lena heni leoina fe'ek fo, Ana nakadada'dik basak-kala so, ma neukose emi nanakoa-nanakiok, ma nanafe ha'da-holomata. Emi da'di, emi Manetualaim-ma ana nanahelen, sama leo hala hehelun-na.”

IBRANI 12:13

La'ok tataas esa leona neu eno matetu ka, fo ela emi ei helam ndia boso kosik, te lena-lenak ana lea-hai.

NINITAK 20:9

Boema ala tapasasala leo basa daebafa ka lala'ena leu de ala leu sapu la Manetualain hataholi nala mamana leleo nala ma kota fo Manetualain sue-lai ka. Tehu ha'i kona neme lalai mai de ana hotunisas.

HAKIM-HAKIM 1:7

Boema, Adoni-Bezek nae, “Makahulun-na, au te'te heni manek hituhulu, limaku'uinan-eiku'uinan-nala so, boema au po'ilotak-kasa la'a nana'a elak fo manatu'da leme au meing lain mai. Besak ia, Manetualain tao au, saman-na leo au tao sila.” Basa boema, ala fo leni Adoni-Bezek leo Yerusalem neu, de maten neme naa.