YOSUA 2:11 - Susula Malalaok Hehelu Palak Ma Hehelu Beuk

¹¹ Ami mamanene tutuik ndia tu'tik-ka ami bii manseli. Ami hataholim-mala, mopo palanin-nala, nanahu emi. ManetualainManakoasa, fo emi Manetualaim-ma, tete'ek-ka, Manetualain Fo Manakoasa nai lalai ma daebafak-ka.

YOSUA 2:11 ပူးပေါင်းရင်းမြစ်များ

1RAJA-RAJA 8:60

No leondiak, basa leoina manai daebafak-ka lala'en-na, neukose bubuluk lae ka'da Amak-ka mesak-kana nde Manetualain ta hapu fe'ek fa.

2RAJA-RAJA 5:15

Boema, no basa ana manatunga dean-nala, fali le'us leo Elisa leu. Boema, Naaman nafa'da Elisa nae, “Besak ia au bubuluk ae nai basa daebafak-ka lala'en-na, hapu ka'da Manetualain esa, fo nde Manetualain, fo hataholi Israel-la sene-do'ok-ka. Hu ndia de, sa'di been-na, Tuan sipo au fe Tuan buas ia-la.”

NEHEMIA 6:16

Lelek ami musu-musum manai leoina titia-tataik sila-la lamanene dede'ak ndia boema, ala bii mopo na'den-nala, nana basa hataholi-la bubuluk lae bela-ba'uk ndia nanataok nenik Manetualain tutulu-fafalin.

ESTER 8:17

Boeo, nai basa kota ma propensi-la, su'di nai bee boe, fo ala lees manek-ka susula paletan-na soona, hataholi Yahudi-la lamahoko, dalen-nala loa-loak mesan, ma ala tao feta-dote. Nakalenak bai, laun ba'uk-ka masok leo leoina Yahudi dale leu, nanahu ala bii-lamata'u neu leoina ndia.

MAZMUR 102:15

Nana O atam-mala sue-lain, leomae ana da'di ai batu manandefak so. Dalen-nala, tu'da kasian neun, leomae ana da'di daesopuk so.

MAZMUR 22:14

Lasasale matak loo au no bafan-nala beepoo, sama leo singa nanggao fo ana kaa.

MAZMUR 58:7

Ou Manetualain, helu la'di nisin-nala leon, Fe'a heni singa molisoluk sila-la nolin-nala leon Manetualain.

MAZMUR 83:18

Nemen-na fo ala hapu mamaek, ma ala bii-lamata'u losa dodoon-na, nemen-na fo mates lai nakamumulu-nakamamaek-ka dalek.

KELUARAN 15:14

Leoina-la lamanene, de ala dele bengge'be; hataholi Filistin-nala ma basa mauli-malanga Edom-mala lakalupu-lakasee. Hataholi Moab mabe'i-balakaik-kala dele ngge'be-ngge'be hataholi Kanaan-nala dalen-nala ba'ihana.

YESAYA 13:7

Neukose basa hataholi-la lame'da mate liman-nala, ma mopo palanin-nala.

YESAYA 19:1

Hala heheluk la'eneu Masir nde ia. Manetualain sa'e ko'as manalai-laik-ka, de neu leo Masir neu. Masir sosongo-tatangon-nala dele lai matan-na, ma hataholi Masir-rala dalen-nala ba'ihana.

YESKIAL 21:15

Ana tao-na Au leoinang-nga mopo palanin-nala, de ala tu'u fo'a. Au fe nasanene'dak mahelek neu sila kotan-na, nenik tafaina fo isin-na, nangale'do sama leo ndelas-sa, ma naheheleaon fo nado'do-napau ndia.

NAHUM 2:10

Niniwe lutu-lutu so, ana da'di mamana nees ma na'u-aiana, ta moli nai ndia so'on. Hu kande, bibii-namata'uk-ka de laun-na dalen-nala makasufu. Lungulangak-ka nakamate ma dele ngge'be-ngge'be. Basa hataholi-la mata panan-nala befula.

ULANGAN 1:28

Da'di, sosoak hata, ita teu leo naa teu? Ita tadenu hataholi manaleu leo naa leu-a, ala tao-la ita bii-tamata'u, nenik sila hala nafafa'dan-na, lae leoina ndia, balakain-na ma aon-nala makadelek lena heni ita, ma lae ala leo nai kota-kota fo papala nanadaman-nala dedeman-na losa lalai. Lita hataholi ao matua ma ei madema-la lai naa boe!’

ULANGAN 20:8

Basa solda'du matuaina-la boeo, muse lafa'da dede'ak ia neu emi lae, ‘Ade, nai emi dalek, hapu hataholi tene manahailuak ma manabii-mamata'uk do? Metema hapu soona, ana bole fali ne'un, fo ela ana boso taon-na hataholi fe'ek mopo palanin-na.’

ULANGAN 4:39

Hu ndia de faik ia, mame'dak leona, fo boso mafandele henin: te ka'da Manetualain mesak-kana nde Manetualain fo nai lalai ma daebafak-ka; ta hapu lamatua daebafa fe'ek fa.

YOSUA 14:8

Au u o hataholi-la, ala tao-la hataholi Israel-la bii-lamata'u. Tehu au lilineka ahele Manetualain fo au Manetualaing-nga.

YOSUA 2:24

Basa boema, lafa'da lae, “Tao leo bee-o, Manetualain fe la'iesak nusak ndia leo ita mai; basa hataholi manai naa-la, ala bii ita.”

YOSUA 5:1

Basa mane Amori manai Lee Yarden-na boboan muli, ma basa mane Kanaan manai Tasi Tala'dak-ka su'un-na, lamanene lae Manetualain Manakoasa, tao nama'da lee Yarden-na, nai lelek hataholi Israel-la lena lee ndia. Boema ala bii ma ala dele bengge'be, nanahu hataholi Israel-la.

YOSUA 7:5

Hataholi Ai-la usis leme kota Ai lelesuinan-na, losa leo mamana kali lilopilas-sa neu, de ala taolisa, fafa'kama hataholi teluhulu nee, neme hataholi lifu ka teluk-kala mai, nai pupukuk-ka huun-na. Boema hataholi Israel-la hela-hae, ma ala bii.

YOSUA 9:24

Boema lataa lae, “Ami tao leondiak, nanahu ami mamanene lae Manetualain, fo Tuan-tuan-nala sene-do'ok ndia, nadenu basa Musa fo atan ndia, fe nusak ia lala'en-na neu Tuan, ma nai lelek Tuan ho'i-na dae ia soona, Tuan taonisa la'iesak laun-na. Ami bii manseli, boso nalosak ami nanataonisak, hu ndia de, ami tao basa dede'ak ia-la.

NINITAK 6:16

Lalo neu lete kala ma batu sila la lae, “Mapaluni ma ami leona! Mafuni ami neme Ndia fo nangatuuk nai kandela manek lain mata na ma neme Bi'ilopo Ana ndia nasa-melun mai!