YESKIAL 8:17 - Susula Malalaok Hehelu Palak Ma Hehelu Beuk

¹⁷ Manetualain nafa'da au nae, “Hai hataholi daebafak fo, manasapu-manalalok-konei, o mita ndia do ta? Hataholi Yehuda ia-la, lame'da beita dai fa, metema ala tao ka'da tatao-nono'ik nanamaluak ndia mesak-kana, ma ala tao tatao-nono'i ta kandaak-kala, nai nusak ia lala'en-na. Nakalenak bai, ala tao-no'i basa sila-la, nai mamanak ia, fo nai Au Umang dale, de ala tao-la Au, amanasa ba'uk-ka seluk bai. Mitak, ala lakamumulu-lakamamaek Au nenik tatao-nono'ik fo, ta kandaak nanseli ia fa.

YESKIAL 8:17 ပူးပေါင်းရင်းမြစ်များ

KEJADIAN 6:11

Tehu basa hataholi fe'ek-kala, tatao-nono'in-nala mangalauk nai Manetualain mata memeten-na, ma tatao-nono'i ha'da hataholi taan-nala, hapun nai mamanak lala'en-na.

KEJADIAN 6:13

Boema, Manetualain nafa'da Noh nae, “Au aketu basa, soaneu tao ate'e basa mahahae maso'dak lala'en-na, so'dan-nala. Neukose, Au tao amopo-amates, sama-sama loo daebafak-ka, nanahu daebafak-ka henuk no sila tatao-nono'i ha'da hataholi taan-nala.

2RAJA-RAJA 21:16

Fe'ek neme ana taon-na, hataholi Yehuda-la lasala-lasingo neu Manetualain, nenik ala sene-do'ok neu sosongo-tatangok-ka, Manasye boeo, ana taonisa hataholi sala tak makadotok nanseli, nalosa nai Yerusalem, daak-ka faa su'di leo bee neu.

2RAJA-RAJA 24:4

nakalenak, hu kande basa kanisak fo, ana taon soaneu hataholi sala taak-kala. Manetualain ta nau fe do'o do ampon neu Manasye fa, hu kande tatao-nono'in sila-la.

YEREMIA 19:4

Au tao dede'ak ndia nana loina ia la'o ela Au so. Ala tao langgenggengo mamanak ia nenik ala fe tutunu-hohotuk lo lamatua daebafak fe'ek-kala ba'eneu sila, ba'eneu sila bei ba'i-kain-nala, ma ba'eneu manek-manek manai Yehuda. Sila boeo ala tao hataholi sala taak-kala daan-na nai mamanak ia boe.

YEREMIA 20:8

Au kokolak do'e-do'e ae, au muse eeki-apane'e losa basa au be'i-balakaing-nga, “Nasananseli! Susa-soe!” Manetualain, au nanahakininisik ma nananakamu-nakadau su'di faik, nanahu anduku-alosak o hala-hehelun-na.

YEREMIA 44:3

Dede'ak ndia anan da'di nanahu laun-nala lasala-lasingo, de nalosa ala tao-la Au amanasa. Ala fe tutnu-hohotuk ma ala lakaluku-lakatele neu lamatua daebafak fo ala beita sene-do'ok lita fa, boema emi ma emi bei ba'i-kaim manamatem-mala.

YEREMIA 6:7

Sama leo oemata faa nahele oe neuk, leondiak boe, kota ndia nabuna-naboa nahele mangalauk-ka. Au amanene ka'da hala naseti-nalakak, ma nakodaa mesan, neme kota ndia mai; Au ita bisu ma he'di-laus-sa, nai mamanak lala'en-na.

RATAPAN 1:5

Musun-nala lalole-lanapu, nanahu ala hapu koasa-lan. Manetualain tao-nan doi-doso, nanahu sala-singon makadotok nanseli. Foo leni laun-na so, de loos leo mamana tu'u-tapak neu.

YESKIAL 11:6

Emi taomisa hataholi de'u-de'u basa ndia so, nalosa eno-enok manai kota dale-la, henuk no hataholi manamatek-kala popolan-na.

YESKIAL 16:26

O sosoa-piao moo hataholi Masir, fo o nusa titia-tataim, fo nasa sao-anan ba'una seli ndia. O sosoa-piao, fo sue kande Au amanasa.

YESKIAL 18:12

Ana hii ke'di-ndiu, hataholi nuu taa-hata taak-ka, namanako, ana besila-na, hataholi mahutak-kala bua pepe'dan soaneu hutan-nala. Neu leo hataholi dinitiu-la uma sosongon-na, ma ana sene-do'ok neu sosongo-tatangok fo nanamaluak-kala.

YESKIAL 23:25

Hu kande Au amanasa o, de Au po'ilotak-kasa, ala tao o no ta pake dale susue-lalaik fa. Neukose, ala kee heni o panam-ma, ma o di'idoom-ma, boema ala ho'u-la o anam-mala fo ala tu'us leo ha'i lai neu, fo ha'i-a hotu nisas.

YESKIAL 28:16

O langam-ma dila no ka'da nase'o-banasak-ka, de ndia nde neni o leo naseti-nalakak-ka ma sala-singok-ka neu. Boema, Au usiheni o meme Au lete malalao-malalafung-nga mai, de ata nusa so'dak manamanea o-a, ana usiheni o meme batu poemata mangadilak sila-la, tala'da mai.

YESKIAL 45:9

Manetualain Fo Mademaina, nafa'da nae, “Hai manakoasa Israel-la lemin, emi sala-singom-mala dai so. Hahae tuni-ndeni laun-na leona. Tao-no'i hata fo, ndoos ma tunga matetun-na. Boso boe usiheni Au anang-ngala, leme sila daen dale mai. Au, Manetualain Fo Mademaina, fe paleta ndia neu emi.

YESKIAL 7:11

Tatao-nono'ik fo ta nalelak susue-lalaik-ka, neni tatao-nono'i mangalauk makadotok. Basa sila su'i-beten, namatutua-namadedeman ma sila tetu-teman lala'en-na, neukose mopok-kasa.

YESKIAL 7:23

Tasi'bu-a, ana da'di nai nusak-ka lala'en-na; nai mamanak lala'en-na, hapu kanisak ma tatao-nono'ik fo, ta lalelak susue-lalaik-ka fa.

YESKIAL 8:6

Boema, Manetualain nafa'da au nae, “Hai hataholi daebafak fo, manasapu-manalalok-konei, O mita beek ana da'di so? Taoafik neu hataholi Israel-la, ala tao tatao-nono'i nanamaluak-ka, fo ela Au dook-ka eme Au Umang-nga mai! Mai fo, Au atu'du o, tatao-nono'ik-kala, ta kandaak lena seluk bai.”

YESKIAL 9:9

Boema, Manetualain nataa nae, “Hataholi Israel-la, ma hataholi Yehuda-la, ala tao basa sala-singok matuaina so. Ala tao kanisak nai basa mamanak lala'en-na, ma ala tao langgenggeo Yerusalem nenik tatao-nono'i managalauk-kala. Ala lafa'da lae Au, fo Manetualain, la'oela nusak ia so, nalosa Au ta hapu ita sila tatao-nono'in fa.

AMOS 3:10

Manetualain nafa'da nae, “Hataholi-la tao lahenu sila uma manen-nala nenik bua-lo'as fo ala hapus neme lumu-esek ma tatao-nono'i susue-lalai taak-ka mai. Lena-lenak ala ta tao tunga ndoon-na makandondook fa.

AMOS 6:3

Emi matea mahele ka'da mae, fai susa-soe bei dook-ka, tehu emi tatao-nono'im nde tao-na fai maneni mamates ndia losa no lai-laik.

MIKHA 2:2

Metema lahiik tina esa soona, ala loso-lan. Metema lahiik uma esa soona, ala leo-lan tutik. Nau hata-heto do uma isi la, ta hapu nee-nee lino-linok fa.

MIKHA 6:12

Hataholi kamasu'ik manai emi kotam-ma, ala tuni-ndeni hataholi nuu-taa hata-taak-ka, ma emi basa-basam-mala masapepeko-masandandalik.

ZEFANYA 1:9

Neukose Au huku basa hataholi fo ala sene-do'ok, sama leo hataholi fo ta lalelak Au fa, ma sila fo lamanako, ma lanisa, fo ala tao lahenu sila malangan-na uman-na nenik bua-lo'a nakok-kala.”