YESKIAL 8:16 - Susula Malalaok Hehelu Palak Ma Hehelu Beuk

¹⁶ Boema, noo au leo Manetualain Uman-na, so'dan manai dalek-ka. Nai deka no lelesu masok leo kama malalao-malalafuk-ka neu, fo nai mei tunu-hotuk-ka no mangalolok-ka tala'da, hapu hataholi duahulu lima lai ndia. Langatuuk lasadea kama malalao-malalafuk-ka, de lasale leo dulu leu, fo ala sene-do'ok neu le'do-a.

YESKIAL 8:16 ပူးပေါင်းရင်းမြစ်များ

1RAJA-RAJA 8:29

Ela leo been-na lele'do-le'odaen O masulu-mahapa uma ia, fo O hele basan da'dileo mamana hule-haladoik neu O. Ela leo been-na neme O mamana leleom manai nusa so'dak-ka, O mamanene ma fe do'o do ampon neu au boema O ana mala metema ami masale leo uma ia mai fo hule-haladoi neu O.

2RAJA-RAJA 16:14

Ahas nita mei tunu-hotuk liti fo, nanafe hehelik neu Manetualain-na, nanape'dak nai Manetualain Uman-na, no mei tunu-hotuk beuk-ka tala'da. Hu ndia de, mei tunu-hotu liti ndia, nanalali heok, neme Manetualain Uman-na uluk mai, fo leo mei tunu-hotuk beun ndia, boboan kii neu.

2RAJA-RAJA 21:5

Ana tao mei tunu-hotuk, nai Manetualain Uman ndia, so'dan 2, fo ana sene-do'ok neu nduuk-kala.

2RAJA-RAJA 23:11

Ana tu'u-tapa heni, basa ndala fo mane-manek Yehuda-la sadian, soaneu sene-do'ok neu le'do-a, ma ana hotu heni basa kaleta-kaleta fo ala paken nai sene-do'ok ndia dalek-ka. (Kaleta sila-la, lai Manetualain Uman-na so'dan-na – deka no lelesuina – ta dook-ka neme kama-kama fo Natan Melekh hataholi mana'a ngga'di manai lain esa, mamana leleon-na.)

2RAJA-RAJA 23:5

Ana kalua heni basa manek Yehuda-la, so'u imam-imam fo, lalalau-laoono nai mamana sosongo-tatangok neu lamatua daebafak-ka, nai kota-kota Yehuda-la, ma Yerusalem titia-tatain-nala; boeo basa imam-imam, fo manatunu-hotu, tutunu-hohotuk fe Baal-la, le'do-a, bulak-ka, hata manai lalai-la, ma nduuk-kala.

2TAWARIKH 29:6

Ita bei-ba'i kain-nala ta lilineka neu ita Manetualain fa, de ala tao hata fo ta nandaa no dalen-na fa. Ala ta taoafik neu fan, ma ala ta lafaduli mamana leleo-na fa.

2TAWARIKH 7:7

Boema Salomo fe uma makaluku-makatele ndia so'dan manai ta'dak tala'da-na leo Manetualain neu. Basa ndia boema nai mamanak ndia, ana fe tutunu-hohotu nanatunuk, tutunu-hohotu gandum, ma bana-manu minan-na soaneu tutunu-hohotu mole-dame. Ana tunu-hotu basa sila-la lai ndia nanahu mei tunu-hotu liti fo ana taon-na ka, anak-ka nanseli soaneu tutunu-hohotuk sila-la.

YEREMIA 2:27

Neukose emi nananakamamaek, nana emi maloo ai bibiak esa soona, emi mae ama, ma emi maloo batu esa soona, emi mae ina. Emi ta mai leo Au mai fa, te emi la'oela Au. Tehu, metema toto'a-tataak-ka ana mai soona, Au nde emi malook-ka, fo mai soi-tefa emi.

YEREMIA 32:33

Leomae Au anoli-aheles, tehu ala ta nau lamanene fa, ma ala ta nau tuka-tei sale-dale fa, ma la'o ela Au.

YEREMIA 44:17

Basa hata fo ami heluk-kala lala'en-na, neukose ami tao la'iesak-kasa boe. Neukose ami fe mahele tutunu-hohotuk neu Ina Manek nusa so'dak-ka, ma di'a angol oek da'di leo tunu-hotuk neun sama leo biasan-na nanataok neme ami bei ba'ikai manamatem-mala, neme manek-kala, neme ami mauli-malanga manapaletam-mala ma ami ia boe nai kota-kota Yehuda ma enok-enok manai Yerusalem-ma. Nai lelek ndia ami ta to'a-taa hata esa boen, te am manuu nana'a-nininu manadaik ma ami so'dam-ma natetu.

YEREMIA 7:18

Ni'iana-la hila ai, ma touk-kala lakafu'dik ha'i, ma inak-kala kame ha'desopuk, fo ala tao kokis fe lamatua daebafa inak, fo ala foin na'de, Ina Manek Nusa so'dak. Sila boeo, tunu-hotu fe lamatua daebafak fe'ek-kala angol, fo taok-kande lakahehe'dik Au daleng-nga.

YEREMIA 8:2

ta soaneu latoi-latono seluk-kasa fa, te nanapo'ilotak nai dae lain, fo da'di kadafuk. Hataholi sila-la duin-nala, besenggela-besenggali lai le'do bulak, ma bana-manu fo ala taos da'di lamatua daebafak, fo ala sue-lais, lalalau-laoonos, ala sene-do'ok neus ma loke natutu'duk-ka, matan-na.

YESKIAL 10:3

Lelek ana leo dalek neu te, mahahaek sila-la bei lapadeik lai Manetualain Uman-na boboan kona. Uma so'dan manai dalek-ka, ma Manetualain Uman-na lala'en-na, henuk no ko'as bubuak esa.

YESKIAL 11:1

Boema, Manetualain Duladalen-na, so'u-na au de noo au leo Manetualain Uman-na lelesuinan Dulu neu. Au ita hataholi duahulu lima lai ndia, de nai hataholi ka duahulu limak sila-la dalek, hapu mauli-malangan leoina dua lai dalek, fo nde Yaazanya, fo Azur anan-na, ma Pelaca, fo Benaya anan-na.

YESKIAL 23:35

Manetualain Fo Mademaina, nafa'da nae, “Hu kande o mafandeleheni Au, ma o masadea Au so, de neukose o doi-doso hu kande o nasa sasao-aanam manafo'am-ma, ma o manasosoa-pioam-ma.”

YESKIAL 23:39

Nai faik fo, ala taolisa Au anang-ngala, ma ala tunu-hotu fes neu sosongo-tatangok-kala, hataholi ka'a-fa'di ka duak sila-la, ala mai leo Au Umang-nga mai, de ala tao langgenggeon!

YESKIAL 40:28

Basa boema, touk ndia noo au tunga lelesuina kona, de ami masok leo uma so'dan manai dalek-ka meu. Ana uku lelesuina ndia, de uukun-na sama no lelesuina manai boboan deak-kala.

YESKIAL 40:6

Basa boema, neu leo lelesuina fo, nasale leo dulu neu. Ana kae tunga e'dahuuk-ka, de ana losa lain boema, ana uku lelesu ndia doon-na, de loan-na metel telu.

YESKIAL 43:5

Manetualain Duladalen-na, ana so'u-na au, de noo au leo uma so'dan manai dalek-ka neu; nai ndia, au ita Manetualain mandela-masa'an, poti-na Manetualain Uman-na.

YESKIAL 43:8

Makahulun-na, sila manen-nala tao lelesu dook, ma sila uma manen-na diin-nala, lai Au Umang-nga lelesu doon, ma diin-nala boboan-na, nalosa hapu ka'da papala esa nai tala'da. Ala tao langgenggeo basa Au na'de malalao-malalafung-nga, nenik sila tatao-nono'in fo, nanamaluak-ka. Hu ndia de, Au tao amate-amopos, nai Au nasa-melung dale.

YESKIAL 45:19

Imam-ma, muse ho'i-na, bana tutunu-hohotuk fo, sala-singok hapu do'o do ampon ndia, daan-na, fo ana losen neu Au Umang-nga dii lelesun-nala, ma neu mei tunu-hotuk-ka, bu'un haas, ma neu lelesuina fo, manai uma so'dan manai dalek-ka, dii lelesun-nala boe.

YESKIAL 46:1

Manetualain Fo Mademaina, nafa'da nae, “Lelesuina dulu, fo nasale leo uma so'dan manai dalek-ka neu, muse nanakena nahelek, nai faik nee dalek. Lelesuina ndia, bole nanasoik ka'da nai fai Sabat-ta, ma Feta Bula Beuk-ka.

YESKIAL 7:23

Tasi'bu-a, ana da'di nai nusak-ka lala'en-na; nai mamanak lala'en-na, hapu kanisak ma tatao-nono'ik fo, ta lalelak susue-lalaik-ka fa.

YESKIAL 8:15

Manetualain natane au nae, “Hai hataholi daebafak fo, manasapu-manalalok-konei, o mita ala tao beek ndia? Bei hapu tatao-nono'i nanamaluak, makadotok seluk bai.”

YOEL 2:17

Madenu basa imam fo lalalau-laoono Manetualain, fo ala kii nai mei tunu-hotuk ma uma so'dan manai muka, tala'da, boema lafa'da lae, “Sue-lai O anam-mala, ou Manetualain; boso po'ilotak, lakamuu-lakadau O hata-hetom.” Nalosa leoina fe'ek-kala kokolak holo ma lafa'da lae, “Sila Manetualain nai bee?”

ULANGAN 17:3

ma paletan-nala nenik ana sene-do'ok ma amahele neu lamatua daebafak fe'ek-kala, do neu le'do-a, bulak-ka, do nduuk-kala,

ULANGAN 4:19

Boso tao sala-singok, nanahu sene-do'ok ma mamahele neu hata fo emi mitan nai lalai, sama leo: le'do-a, bulak-ka, ma nduuk-kala. Emi Manetualaim-ma po'ilotak leoina fe'ek-kala sene-do'ok neu basa sila-la.