YESKIAL 7:15 - Susula Malalaok Hehelu Palak Ma Hehelu Beuk

¹⁵ Natee-natatik-ka, nai enok-kala lain nai kota dale, ma he'di-laus-sa nai uma-la. Su'di see fo nai kota deak, neukose maten nai natee-natatik dale, ma manaleo nai kota dale-la, neukose maten, nanahu he'di-laus ma la'a-ndoes-sa.

YESKIAL 7:15 ပူးပေါင်းရင်းမြစ်များ

YEREMIA 14:18

Metema Au u leo mook-ka, au ita mana mateek-kala popolan-nala nanahu natee-natatik-ka. Au ita toto'a-tataak-ka nai kota dalek, hataholi-la hihi lae mates nana la'a-ndoes-sa. Nabi-la ma imam-mala lakalala'ok bela-ba'un-nala te ta lalelak hata fo ala taok-ka fa.”

RATAPAN 1:20

Ou, Manetualain! Taoafik neu au, nana au daleng-nga ta tesa-tama ma tasibu, nakalulutuk nanahu au nalelesi makahulung-nga. Nai enok-kala lain, hapu kanisak, Nai uma dale, hapu mamates.

RATAPAN 4:9

Ala doi-doso de ala mate faa-faa, hu kande ta lanuu nana'ak faa anak boen; fo manamatek manai natee-natatik-ka dalek bei naua-nanale lena neme manamatek hu kande la'a-ndoes-sa.

YESKIAL 12:16

Neukose Au soi-tefa ala, sila lumanak leme natee-natatik dale, leme la'a-ndoes-sa, ma leme he'di-laus-sa mai, fo ela nai leoina nusa dea sila-la tala'daheon, neukose ala bubuluk, lae sila tatao-nono'in ta kandaak makandondook fa. Soona neukose, ala manaku, lae Au nde Manetualain-na.”

YESKIAL 5:12

Metema, ba'e o laum-ma neu baba'ek telu soona, Au taoisa baba'ek esa, nanahu he'di-laus ma la'a-ndoes-sa da'di nai kota dale. Baba'ek esa, nanado'do nisak nai kota deak, ma neukose Au nggenggela-ngganggali baba'ek esa seluk, leo basa daebafak-ka bu'un-nala leu, ma neukose Au usis tataas esa nenik tafaina.

YESKIAL 6:11

Manetualain Fo Mademaina, nafa'da nae, “Totoko limam-ma, ma henak o eim-ma dae lain, fo maloo mae: Manea! Te hu kande leoina Israel-la. Tatao-nono'i ta kandaan-nala, ma tatao-nono'i mangalaun lala'en-na, de neukose ala bala leu dae fo mates, nanahu tafaina, la'a-ndoes-sa, ma he'di-laus-sa.

YESKIAL 6:12

Neukose, sila basa-basas lame'da lita Au nasa-melung nininin-na. Hataholi manai mamana dook-kala, fonde mamana tu'u-tapak, neukose ala tu'u he'dis, boema mates; hataholi manadekak-kala, neukose ala mate nai natee-natatik dale, ma bei elak-kala, neukose mates hu kande la'a-ndoes-sa.