YESKIAL 5:14 - Susula Malalaok Hehelu Palak Ma Hehelu Beuk

¹⁴ Neukose, o da'di ai-batu manatapasasalak, ma leoina manai o boboa-kaisum-mala, neukose ala hakinonoli o; neukose basa hataholi manala'ok tunga ndia, ladook aoinan-nala neme o mai.

YESKIAL 5:14 ပူးပေါင်းရင်းမြစ်များ

NEHEMIA 2:17

Tehu basa boema, au afa'das ae, “Mete ita so'dan fo manadoi-dosok ia leona! Yerusalem, ela ka'da ai batu madodoun-na, ma ha'i na'a heni basa lelesuinan-nala. Mai fo tafofo'a falik papala nanadamak Yerusalem-mala, fo ela ta lakamumulu-lakamamaek seluk ita fa.”

YEREMIA 19:8

Neukose Au tipas mamate-momopok-ka fo matuaina nanseli neu kota ia de nalosa basa hataholi manala'ok tunga ndia neukose ala nggenge ma langgenggengo ao.

YEREMIA 23:40

Neukose Au tao-a sila mae ma nananakadadaek soaneu losa dodoon-na, ma sila a nalen ndia neukose hataholi ta lasanggango heni fan.”

YEREMIA 42:18

Sama leo Au, fo Israel Aman Manetualain-na po'a Au nasa-melung-nga neu Yerusalem laun-nala, leondiak boe, neukose Au po'a Au nasa-melung-nga neu emi fo mana neu lo Masir. Neukose hataholi-la lita emi soona, langgenggengo ao; neukose emi nananakamumulu-nakamamaek, ma neukose emi na'dem-ma nanapakek da'di leo soo-supak. Neukose ei ta mita emi dae oem ia so'on.”

RATAPAN 1:4

Nai fai malole-la ta hapu hataholi esa boen mai leo Manetualain Uman mai fa. Anafe'oanak makameek manai naa-la doi-doso, ma imam-mala hoo-nggu'u. Ta hapu hataholi esa boen, nai lelesuina-la lelesun-na fa. Kota Sion na, henuk no dale he'dik.

RATAPAN 1:8

Yerusalem tao nanggenggeo aoinan-na mesak-kana nenik tao sala-singo manggenggeok makadotok. Basa hataholi fo makahulun-na fen ha'da-holomata, besak ia, lakadadaek-kana nanahu lita makaholan-na. Ana hoo-nggu'u, nanahu ana mae so.

YESKIAL 12:20

Kota-kota fo, besak ia henuk no laun-na, neukose nanatao nakalulutuk, ma tina-osin-nala, neukose ala da'di moo solokaek. Soona besak-ka ala bubuluk, lae Au nde Manetualain-na.”

YESKIAL 16:57

ma nai lelek, o tatao-nono'i mangalaum-ma, beita nanabubuluk fa hetu? Besak ia, o sama leo ndia so boe; o da'di bua nanahika-humek neme hataholi Edom, hataholi Filistin ma uma titia-tataim fe'ek fo, ala ta lahiik loo o fa.

YESKIAL 23:32

Manetualain Fo Mademaina nafa'da nae, “O muse minu o ka'am mangoteen-na, isin-na Mangotee ndia, matua ma madema. Isin-na henuk no hakinonolik ma nakamumulu-nakamamaek-ka, fo o muse lu'a-lepan neme basa hataholi lala'en-na mai.

YESKIAL 33:28

Neukose Au tao nusak ndia, da'di moo solokaek fo, nee-nee lino-lino, boema neukose mopok sila koao-ndaeaon, hu kande sila be'i-balakain-na. Basa letek manai Israel-la, neukose nee-nee lino-lino, nalosa hataholi ta napalani la'ok tunga ndia fa.

YESKIAL 36:34

Makahulun-na, hataholi-la, ala la'ok tunga emi moom-mala soona, lita dae ndia, tokotiik nanseli, tehu neukose, Au fe emi foi-fala seluk dae ndia.

YESKIAL 6:6

Basa kota Israel-la, neukose nanatao nakalulutuk, ma basa mei tunu-hotun-nala ma sosongo-tatangon-nala lakalulutu, mamana tutunu boomenin-nala heaba'es, fo besenggela-besenggali, ma sila lima tataan lala'en-na, neukose mopos.

DANIAL 9:16

O masala'e ami nai tepo-lelek makahulun-na so, hu ndia de, boso boe mamanasa Yerusalem, fo O kotam-ma, O pupuku malalao-malalafum-ma. Hu kande ami sala-singom, ma ami bei-ba'i kaim tatao-nono'i mangalaun-nala, boema basa hataholi manai ami boboa-kaisum-mala lakadadaek Yerusalem ma O anam-mala.

MIKHA 3:12

Hu kande emi tatao-nono'i mangalaum ndia, de neukose lakauuk Sion sama leo hadeoe, neukose Yerusalem da'di ai-batu madodouk, ma pupukuk fo Manetualain Uman-na, neukose ana da'di nula na'u-aiana.

ULANGAN 28:37

Nai nusa-nusak fo nai bee, Manetualain tao tapasasala emi-a, neni bibii-namata'uk nanseli fe hataholi manamete emi-a; neukose ala hakinonoli ma ala hika emi.