YESKIAL 5:11 - Susula Malalaok Hehelu Palak Ma Hehelu Beuk

¹¹ Au nde been-na, Manetualain fo maso'dak, Manetualain Fo Mademaina, de Au dede'a-kokolang nde ia: Hu kande, o tao manggenggeo Au Umang-nga, nenik o tatao-nono'i mangalaum ma nanamaluak-ka, de neukose Au tao akalulutuk o, no ta fe ampon neu o fa.

YESKIAL 5:11 ပူးပေါင်းရင်းမြစ်များ

2RAJA-RAJA 21:4

Manetualain nafa'da basa, nae Yerusalem nde been-na, mamanak fo, Ana tao na'den-na nai ndia, ma mamanak makaluku-makatele neun, tehu nai naa, fo nai Manetualain Uman, Manasye tao fe lamatua daebafak-kala, mei tunu-hotuk so.

2RAJA-RAJA 21:7

Ana tao lamatua daebafak Inak Asyera, dodoki-dudulan nai Manetualain Uman dale, te se'kona, Manetualain nafa'da basan neu Dauk, ma anamanen Salomo, la'eneu mamanak ndia nae, “Au hele basa Au Umang-nga, ma kota Yerusalem ia, nai leo Israel-la, nusa ka 12-nala dalek, nde been-na, mamanak fo Au aketun, da'di leo mamana makaluku-makatele neu Au.

2RAJA-RAJA 23:12

Ana tao nakalulutuk basa mei tunu-hotuk, fo mane-manek Yehuda-la lapadedei-kasa, lai Manek Ahas-sa kama hahaeaon-na, lain. Yosia tao nakalulutuk Mane Manasye-a, napadedeik-na basa mei tunu-hotuk, manai Manetualain Uman-na, so'dan duas boe, de ana tapa henis leo Bafak Kidron-na neu.

2TAWARIKH 33:4

Manetualain nafa'da basa nae Yerusalem nde bee na mamana mamaso-kakasi soaneun losa dodoo na, tehu nai naa fo nai Manetualain Uman ndia, Manasye napadedeik mei tunu-hotuk soaneu lamatua daebafak-kala so.

2TAWARIKH 33:7

Ana pe'da dodoki-dudulak sosongo-tatangok leo Manetualain Uman dale neu, te se'kona la'eneu mamanak ndia, Manetualain nafa'da basa neu Dauk ma anamanen Salomo nae, “Au Umang manai Yerusalem ia, fo Au hele basan neme Israel leo kasanahulu dua-nala nusa-na mai so, nde bee na ana da'di mamanak fo Au aketun da'di leo mamanak makaluku-makatele neu Au losa dodoon-na.

2TAWARIKH 36:14

Fe'ek neme ndia mai, Manetualain Uman fo Manetualain mesak-kana nde taon da'di Uma hehelik ba'eneun-na, mauli-malangan Yehuda-la, imam-imam-mala, ma laun-nala taon langgenggeon, nanahu ala tunga sene-do'ok neu sosongo-tatangok, ma ala tunga leoina manai sila titia-tatain-nala, maso'da masala-masingo-nala.

AYUB 27:22

Susa-soe tuni la'en, no ta pake dale kasian fa, de nau do ta nau fa, neu sanga nasulu-nahapak

MAZMUR 107:39

Tehu ala kala, de ela ka'da lumanak, nanahu doidosok-ka, ma tuni-ndenik mabelaina.

MAZMUR 95:11

Boema Au soo-supa nai Au nasa-melung dale ae, neukose ala ta masok leo, nusak ndia dalek leu fa, fo ala hahaeaon-nala, sama-sama loo Au.”

YEREMIA 10:24

Fepa li'u ami ou Manetualain, tehu boso fepa liu mahe'di ami nanseli. Boeo boso huku ami, metema O nasam-ma be fo'a, nana tao leo beo neukose ami basa-mala mate-mopo.

YEREMIA 16:18

Neukose Au balas sila sala-singon-nala ma tatao-nono'i mangalaun-nala didikuk la'i dua, nanahu sila tao basa manggenggeo-mangganggamuk nai Au nusang dale nenik sosongok-tatangok ba'uk-ka. Sosongok-tatangok sila-la hahae taak-kala sama leo manamates-sa.”

YEREMIA 32:34

Nakalenak uma fo ala taolak soaneu mamana huhule-haladoik neu Au-a, ala tao langgenggeon nenik ala pe'da sila sosongo-tatangon fo manamaluak nai mamanak ndia.

YEREMIA 44:4

Au haitua Au atang-ngala, basa nabi-la neu emi tatas esa, fo ala kena-ka'is boso tao-no'i mangalauk fo Au akamu-akadauk ndia.

RATAPAN 2:17

Manetualain nakalala'ok basa Ana fe nasanene'dak fo makahulun-na Ana tutu'un ma Ana fe nasanene'dak neu ita so. Ana tao nakalulutuk ita ta no dale kasian fa, Ana fe musu-a sesengik. Ana tao-nalas lamahoko-setelee, lita ita tutu'dan-na.

RATAPAN 2:21

Lasi-mulik mate lalefule'ak nai enok lain, ta'eanak-anafe'oanak-kala mate loo tafaina. Nai faik fo O mamanasa, O do'dos ta no dale kasian fa.

YESKIAL 11:18

Metema ala fali soona, neukose ala tu'u-tapaheni basa sosongo-tatangok fo, ta kandaak ma nanamaluak manai nusak ndia dalek-ka.

YESKIAL 11:21

Tehu hataholi fo, ana nau sene-do'ok neu sosongo-tatangok fo, ta kandaak ma nanamaluak-ka, neukose Au hukus, nanahu sila ha'da-tatao mangalaun ndia.” Manetualain Fo Mademaina, Ana kokolak nae leondia.

YESKIAL 23:28

Manetualain Fo Mademaina nafa'da nae, “Neukose Au fe o leo hataholi nanamaluak fo o tamahiik-kasa fa.

YESKIAL 23:38

Ma ta ka'da ndia fa. Sila boe, ala tao langgenggeo Au Umang-nga ma fai Sabat fo, Au aketu basan ndia so.

YESKIAL 23:39

Nai faik fo, ala taolisa Au anang-ngala, ma ala tunu-hotu fes neu sosongo-tatangok-kala, hataholi ka'a-fa'di ka duak sila-la, ala mai leo Au Umang-nga mai, de ala tao langgenggeon!

YESKIAL 24:14

Au, Manetualain Fo Mademaina, kokolak basa so. Fain-na losa so, ba'eneu Au mulai tao hata esa. Neukose, Au ta afandele heni o sala-singom fa, ma Au ta fe do'o do ampon neu o, do Au sue-lai o fa. Neukose o nanahukuk, nandaa no o tatao-nono'im lala'en-na. Au Manetualain Fo Mademaina, nde manakokolak-ka.”

YESKIAL 29:15

fo nusak ndia, anak nanseli nai basa nusak manai daebafak-ka lala'en-na. Neukose, Au tao-a emi, tapandoe manseli, nalosa emi ta hapu paleta leoina fe'ek, do koao-ndaeao neu leoina sila-la fa.

YESKIAL 33:11

Mafa'das mae no Au, Manetualain fo maso'dak-ka na'den-na, Au ta amahoko fa, metema mate hataholi masala-masingok esa; nasafalin-na, Au hii ana tukatei-saledale neme sala-singon-nala mai, fo ela naso'da nahele. Hai leoina Israel-la lemin, hahae tao tatao-nono'i mangalauk-ka leona! Tao le'e de, emi nau mate?

YESKIAL 43:8

Makahulun-na, sila manen-nala tao lelesu dook, ma sila uma manen-na diin-nala, lai Au Umang-nga lelesu doon, ma diin-nala boboan-na, nalosa hapu ka'da papala esa nai tala'da. Ala tao langgenggeo basa Au na'de malalao-malalafung-nga, nenik sila tatao-nono'in fo, nanamaluak-ka. Hu ndia de, Au tao amate-amopos, nai Au nasa-melung dale.

YESKIAL 44:7

Ala tao langgenggeo Au Umang-nga so, nana ala tunu-hotu fe Au, tutunu-hohotuk minan-na, ma daan-na, ma ala fe loak neu hataholi nusa dea fo, nanasunat beitak-kala, ma ala ta nau tunga neu Au fa, ala bole masok leo dalek leu. No sila tatao-nono'in fo, nanamaluak ndia de, ala la'olena Au hehelu-balataang no sila so.

YESKIAL 5:7

Manetualain Fo Mademaina, nafa'da nae, “Hai, Yerusalem, mamanene leona! Te o ta tunga Au paletang-ngala ma Au hoholo-lalaneng fa; o malenalanga-masabasoom-ma, lenaheni leoina manai o boboa-kaisum-ma, de o tunga leoina sila-la ha'dan-na.

YESKIAL 7:20

Makahulun-na, dalen-nala lamatua neu sila poemata mana'a hiin-na, tehu ala ho'i-lan de, ala taon neu dodoki-dudula sosongo-tatangok nanamaluak-ka, de Manetualain tao-na sila hata-heton sila-la, da'di hata esa fo, neni bibii-namata'u matuaina.

YESKIAL 7:4

Neukose, Au daleng-nga ta tu'da kasian neu o, do fe do'o do ampon neu o fa. Neukose Au huku o, nandaa no o tao tatao-nono'i ta kandaak lalaena. Soona besak-ka, o bubuluk mae Au nde Manetualain-na.”

YESKIAL 7:9

Neukose, Au daleng-nga ta tu'da kasian neu emi, ma Au ta fe do'o do ampon neu emi fa. Neukose, Au huku emi, nandaa no emi tao, tatao-nono'i ta kandaak-kala. Soona besak-ka emi bubuluk, mae Au nde Manetualain ma Au nde huku emi.”

YESKIAL 8:15

Manetualain natane au nae, “Hai hataholi daebafak fo, manasapu-manalalok-konei, o mita ala tao beek ndia? Bei hapu tatao-nono'i nanamaluak, makadotok seluk bai.”

YESKIAL 8:16

Boema, noo au leo Manetualain Uman-na, so'dan manai dalek-ka. Nai deka no lelesu masok leo kama malalao-malalafuk-ka neu, fo nai mei tunu-hotuk-ka no mangalolok-ka tala'da, hapu hataholi duahulu lima lai ndia. Langatuuk lasadea kama malalao-malalafuk-ka, de lasale leo dulu leu, fo ala sene-do'ok neu le'do-a.

YESKIAL 8:18

Neukose, ala lame'da lita, Au nasa-melung matuainang-nga! Neukose, Au ta fes do'o do ampon fa. Leomae ala nggasi, fo besak-ka ala hule-haladoi neu Au boe, Au ta nau amanene sila hule-haladoin ndia fa.”

YESKIAL 9:10

Neukose, Au ta sue-lai fas. Hata fo sila taon neu hataholi fe'ek-kala, neukose, Au taon neu sila boe.”

YESKIAL 9:5

Au amanene Manetualain nafa'da hataholi fe'ek-kala nae, “Tunga hataholi ndia, leo basa kota bu'u-bu'un-nala neu, fo taomisa basa hataholi-la; boso fe do'o do ampon neus.

IMAMAT 15:31

Manetualain nadenu Musa, fo ana fe nasanene'dak neu leoina Israel-la, fo daenga ala taoafik neu, faihi'da langgenggeo ma faihi'da ta langgenggeo fa, fo ela ala ta tao langgenggeo Manetualain Lalaa Teman fo nai sila mamana ofun-na tala'da heon. Metema, ala tao langgenggeo Lalaa Temak ndia soona, neukose mates.

AMOS 8:7

Manetualain, fo leoina Israel-la Manetualain-na, soo-supa basa nae, Neukose Au ta afandele heni sila tatao-nono'i mangalaun-na fa.

ZAKHARIA 11:6

Au ta nau, Au daleng-nga tu'da kasian seluk neu su'di see boen, nai nusak ia fa. Au nde fe basa laun lala'en-na, leo manakoasa-la leu. Sila nde, neukose tao lakalulutuk nusak ia, te Au ta loso falik-kana, neme sila koasan-na mai fa.”

MALEAKHI 3:17

Manetualain Fo Manakoasa, nafa'da nae, “Neukose ala da'di Au anang-ngala. Nai faik fo Au aketu-ala'di, neukose ala da'di Au hata-heto susue-lalaing. Neukose Au sue-lais, sama leo amak manasue-lai anan fo manaleo non-na.

ROMA 11:12

Hu ka nde leoina Yahudi la lasala-lasingo ma ala ta tunga Manetualain hihii-nanaun fa, de Manetualain fe baba'e-papalan neu leoina fe'e kala. Lena-lenak metema leoina Yahudi la tututi-nanaton lo Manetualai na, malole falik; tao leo beeo Manetualain fes baba'e-papalak ba'ulena seluk bai!

ROMA 11:21

Nana metema Manetualain ta nanuu susue-lalaik soaneu tu'u tapaheni hataholi Yahudi la sama na leo ai ndana matetuk sila la, soona, boso maedaenga neukose Ana ta nanuu susue-lalaik soaneu tu'u tapaheni emi fa!

ROMA 8:32

Hu ka nde ita paluu na de Ana fe ita, Ana susue na; na masa bole, Ana ta fe ita, basa hata lala'ena fa?

ULANGAN 29:20

Neukose, Manetualain ta fe do'o do ampon, neu hataholi leondiak-ka fa. Nasafalin-na, neukose Manetualainnasa-melun fo, manalua ponu-ponun-na, la'e hataholi ndia, ma basa susa-soe fo, nanasulak nai susulak ia dalek-ka, neukose ana tuni-ndeni-nala, losa Manetualain tao namate-namopon.

IBRANI 6:13

Lelek fo Manetualain helu neu Abraham, Ana soo-supa, nae neukose Ana tao natetu hata fo Ana helu ka. Ma hu ka nde ta hapu hata fo dema lena neme Ndia mai, soona Manetualain soo-supa ninik na'de na mesa kana.