YESKIAL 48:28 - Susula Malalaok Hehelu Palak Ma Hehelu Beuk

²⁸ Nai dae Gad-ta, boboan kona, hapu dae too fo, mulai neme Tamar muli konak, fo ana tunga oemata Kades-Meriba, boema ana leo muli kiik neu, de ana ndolo Masir dae toon-na losa Tasi Tala'dak.

YESKIAL 48:28 ပူးပေါင်းရင်းမြစ်များ

KEJADIAN 14:7

Basa ndia boema, manausi-la lepos fali seluk, de ala fali le'us leo En-Mispat, fo besak ia, loken lae Kades. Ala paleta la'iesak dae Amalek-ka lala'en-na, boema ala sengi hataholi Amori, fo manaleo nai Hazezon-Tamar-ra.

KEJADIAN 15:18

Nai lelek ndia boe, Manetualain tao hehelu-balataak no Abram. Manetualain nae, “Au helu ae neukose, Au fe dae ia lala'en-na neu o tititi-nonosim, mulai neme too no nusa Masir-ra, losa Lee Efrat-ta,

2TAWARIKH 20:2

Boema hataholi neni halak ia leo Manek Yosafat-ta neu, nae, “Hataholi Edom makadotok nanseli ala mai leme Tasi Mates-sa selik mai fo sapu-la Ama Manek. Ala langatuu-la Hazezon-Tamar so.” (Hazezon-Tamar nde bee na En-Gedi na'den esa nde ndia.)

MAZMUR 106:32

Ala tao-la, Manetualain namanasa neme oedolu manai Meriba-la, ma ala tao susa Musa, nenik sila tatao-nono'in.

YESAYA 27:12

Nai lelek ndia, neukose Manetualain tao nakabubua leoinan, esa basa soona esa, neme Lee Efrat-ta, losa Masir dae toon-na. Neukose Ana ta'da fe'es, sama leo hataholi-a ta'da fe'e gandum-ma isin-na, neme loun-na mai.

YESKIAL 47:10

Hataholi manadolu-dala, ala ho'i sila dalan-nala, leme oemata manai En-Gedi-a su'un-na, losa oemata manai En-Eglaim-ma, su'un-na. Basa i'ak mata-matak lala'en-na, lai oe ndia dalek, sama leo nai Tasi Tala'dak-ka dalek boe.

YESKIAL 47:15

Dae too manai boboak kii, ana mulain neme Tasi Tala'dak leo dulu neu, fo ana losa kota Hetlon-na, soona ana leo Hamat neu, fo nakandoo leo kota Zedad-ta neu,

BILANGAN 20:1

Nai hataholi Yahudi-la bula ka esan-na dalek boema, basa hataholi Israel-la lala'en-na, losa moo solokaek Zin-na, de ala leo lahele leme Kades. Miryam maten, de latoin neme ndia.

BILANGAN 20:13

Ndia nde oemata Meriba. Hataholi Israel-la bemumu loo Manetualain nai mamanak ndia, ma Manetualain natu'du koasa malalao-malalafun-na neu leoina ndia, nai mamanak ndia boe.

BILANGAN 34:5

Soona ana dilu neme ndia leo bafak manai Masir dae toon-na, fo nate'e nai Tasi Tala'dak.

YOSUA 13:3

ma nusa Awi lala'en-na leo kona neu. (Nusak maneme Lee Sikhor-ra, nai Masir dae toon-na, losa leo Ekron dae toon-na nai boboak kii, basa sila lala'en-na, leken leoina Kanaan-na nusan sila; ma mane-manek Filistin manaleo nai Gaza, Asdod, Askelon, Gat, ma Ekron.)