YESKIAL 40:38 - Susula Malalaok Hehelu Palak Ma Hehelu Beuk

³⁸ Nai uma so'dan deak, hapu kama nanatamak esa, nai lelesuina dalek-ka, boboan kii. Nai kama nanatamak ndia, hapu lelesu esa leo kama matuaina neu. Basa bana soaneu tutunu-hohotu nanatunuk-ka, nanasafek lai ndia.

YESKIAL 40:38 ပူးပေါင်းရင်းမြစ်များ

1 TAWARIKH 28:12

Dauk boeo ana fe gambar fo ana dodoo basan soaneu uma so'dan-nala no kama manai boboa-kaisun-nala, ma soaneu Manetualain Uman ndia gudang bua-lo'an-nala boema gudang-gudang fo mamana pepe'da tutunu-hohotuk soaneu Manetualain.

2TAWARIKH 4:6

Manek Salomo boeo taon-na bokol matuaina sanahulu, fo ana tao lima neu Manetualain Uman-na boboan konan-na, ma lima neu boboan kiin-na. Bokol sila-la sosoan-na soaneu safe paa bibiak fo sanga tunun da'dileo utunu-hohotuk. Oe manai mamana natanoe liti matuaina ndia nanasadiak ba'eneu imam-imam-mala soaneu ala safe ei-liman.

NEHEMIA 13:5

Elyasib fe Tobia kama matua esa, fo tunga ndoon-na ala sadia hehelik kama ndia soaneu pe'da tunu-hotu gandum, boomenik, bua-lo'as fo nanapakek nai Manetualain Uman, tunu-hotuk soaneu imam, gandum baba'ek esa neme ba'eneu sanahulu mai, angol, ma mina setun, fo sanga ba'e fe hataholi Lewi-la, basa manamakaminak sasanu-la, ma manamanea Manetualain Uman-na lelesuinan-na.

NEHEMIA 13:9

Basa boema au adenu fo ela tao feta tao balisi kama sila. Basa ndia boema, au pe'da falik basa tunu-hotu gandum lala'en-na ma boomenik boema Manetualain Uman-na bua-lo'an leo ndia neu.

YEREMIA 35:4

Au os lo Manetualain Uman fo Yigdalya anan Nabi Hanan-na ana manatungan-nala kaman-na. Kama ndia, nai Salum anan Imam Maaseya kaman-na lain fo dekak no manaho'u paleta fe'ek-kala kaman-na. Maaseya nde been-na manana'a ngga'di madema ina fo manea lelesu-lelesu manai Manetualain Uman-na.

YEREMIA 36:10

Boema Barukh lees basa hata fo Au afa'dan nai susulak nanalunuk ndia dalek-ka boema lamanenen. Lelees ndia, nanalees nai Manetualain Uman, fo nai Safan anan Gemarya kantor-a. Kantor ndia mamanan-na pasan manai lain-na, deka enok masok lo lelesu ina beuk manai Manetualain Uman-na.

YESKIAL 40:12

Nai kama naneak fo, loloa-nanalun metel beke teluk ndia matan-na, hapu papala nanadama kaba'ok esa, fo deman-na metel seselik esa, ma loan-na metel seselik esa boe.

YESKIAL 40:17

Basa boema, touk ndia noo au tunga lelesuina, leo Manetualain Uman-na, so'dan manai deak-ka neu. Nai papala nanadamak-ka boboan deak, fo manaokofefeon-na Manetualain Uman ndia, ala tao kama teluhulu lai ndia. Hapu uma late batu, nai kama sila-la uluk,

YESKIAL 40:44

Basa boema, touk ndia noo au leo uma so'dan manai dalek-ka neu. Nai ndia, hapu uma dua, nanataok neme ai mai, de esa nai lelesuina kii boboan-na, fo nasale leo kona neu, ma esa nai lelesuina kona boboan-na, fo nasale leo kii neu.

YESKIAL 40:45

Touk ndia nafa'da au, nae uma ai fo nasale leo kona neu ndia, nanasadiak soeneu basa imam fo, manamalalau-maoono nai Manetualain Uman-na,

YESKIAL 40:46

ma uma ai fo nasale leo kii neu-a, nanasadiak soaneu basa imam fo, manamalalau-maoono nai mei tunu-hotuk-ka. Basa imam sila-la, muse leme Zadok tititi-nonosin-nala mai. Nana neme leo Lewi-a mai, ka'da Zadok tititi-nonosin nde bole deka loo Manetualain fo lalalau-laoonon nai makaluku-makatele-a dalek.

YESKIAL 42:13

Touk ndia, nafa'da au nae, “Uma ka duak sila-la, uma malalao-malalafuk. Imam-mala bole lasasalematak loo Manetualain nai ndia, fo la'a tutunu-hohotu malalao-malalafuk-kala, fonde tutunu-hohotu gandum, tutunu-hohotuk fo, sala-singok hapu do'o do ampon, do tutunu-hohotu bae hutak.

IMAMAT 1:13

Boema hataholi ndia muse safe bana ndia tei-aten ma sakibolon-na. Basa soona, imam-ma muse tunu-hotu la'iesak paa ndia nai mei tunu-hotuk lain soaneu Manetualain. Tutunu-hohotuk ndia boon-na, nandaa no Manetualain dalen-na.

IMAMAT 1:9

Boema, hataholi ndia muse safe sapi ndia tei-aten, ma sakibolon-na, fo imam malalau-maoono-la, muse tunu la'iesak-kana. Tutunu-hohotuk ndia boon-na, nandaa no Manetualain dalen-na.

IBRANI 10:22

Hu ndia de mai fo ata deka to Manetualain no dale ndoos, ma namahehelek fo matea-mahelek; no dalek fo nanatao nalalao-nalalafu basak neme dale nameme'da masalak, ma no ao paak fo nanabalisik ninik oe fo neu isi ka.