YESKIAL 27:30 - Susula Malalaok Hehelu Palak Ma Hehelu Beuk

³⁰ Ala kii-makaleleu o ua-nalem, ala haladoi ma ala makaleleu no dale he'dik nanseli. Ala nggali afu leo langan-nala lain neu, de ala lololi lai afu dale, da'di leo ta'du-tana susa.

YESKIAL 27:30 ပူးပေါင်းရင်းမြစ်များ

2 SEMUEL 1:2

Balahaa boema, ta'eanak esa, ana mai neme Saul mamana ofun-na mai. Ana siba'e bua papaken-na, ma ana tao dae leo langan lain neu, fo da'di leo ta'du-tana manasusak. Neu leo Dauk neu, de ana senek neu Dauk matan-na.

AYUB 2:12

Tehu lelek bei lai dook-ka, te lakanae litan so, tehu hihii lae, ta lalelak-kana so'on. Boema, ala kii, de ala dola heni halan-nala, ma ala sii-sii lulu'i bua papaken-nala, boema ala nggali afu leo lain neu, ma leo langan-nala lain neu.

AYUB 2:8

Boema, Ayub neu nangatuuk nau afu tala'da, de ana ho'i falee fangik, de ana kakalo nenik aon-na.

AYUB 42:6

Hu ndia de, au afandele basa au hala-kokolang lalaena soona, au mae, ma no nasasale dalek, au angatuuk nai dae sopuk ma afu dale.”

YEREMIA 25:34

Hai mauli-malangan-nala lemin, hai basa manafo Manetualain anan-nala lemin, ki-namatani mapane'e! Loli fali nai afu dale, nana fain-na losa emi nanado'dok, ma mananaladeak-ka neukose nanatao tapasasalak. Neukose emi sama leo ule dae kabelik-ka fo tu'da henin de ba'en.

YEREMIA 6:26

Manetualain nafa'da anan-nala nae, “Pake lafa lapik, fo lololi meu afu dale. Kii makaleleu no dale he'dik, sama leo hataholi-a, ana kii-makaleleu ana kisan-na mamaten-na, nana manatao namopo-namate emi-a, neukose ana sapu-na emi no kaiboik.”

RATAPAN 2:10

Lasi nggolok manai kota, langatuuk denge-denge nai dae lain; ala nggali afu leo langan-nala lain neu, ma ala pake lafa kalong fo da'di ta'du-tana susa. Anafe'oanak-kala boeo, lakatele langan-nala losa dae lain.

YESKIAL 26:17

Basa soona, neukose lakamee fe o, nakamee natoi-natonok-ka nde ia nae: Kota fo nanakoa-nanakiok-ka, nakalulutuk so! Ofan-nala lala'en-na, nanasapu balisik neme tasi maloaina mai. Makasososan-na, laun-nala koasa nai tasi-a, de ala tao-la hataholi tasi su'uk-kala, ala bii-lamata'u.

YUNUS 3:6

Lelek mane Niniwe, namanene halak ndia boema, ana fo'a napadeik de no lai-laik ana la'o ela kandela manen-na. Ana o'du heni ba'du manen-na, de ana pake si'di kalong, boema nangatuuk neu afu lain.

MIKHA 1:10

Boso mafa'da ita musun-nala lai Gat, la'eneu ita susa-soen; boso fes lita emi kii. Hai laun Bet-Le-Afra-la, lololi nai afu dale, fo da'dileo ta'du-tana ketu namahehenak!

SEMUEL SUSULAK-KA ESAN-NA 4:12

Hataholi esa neme leo Benyamin-na mai, nalai neme natee-natatik dale mai, de neu leo Silo neu, boema ana losa faik ndia boe. Ana sii-sii lulu'i bua papaken-na, ma ana tao dae neu langan lain, fo da'di ta'du-tana manasusak.