YESKIAL 16:7 - Susula Malalaok Hehelu Palak Ma Hehelu Beuk

^7-9 Au ho'i oe, de au safeheni daak manai o aom-ma. Au ahutu o mina, nenik mina setun. Au akaboboi o, losa o mamatua, sama leo bubu'u-palusa, fo ana moli no malole. O mamatua, ma o ta mamahe'di-mapalau fa, boema o da'di anafe'oanak. O su'um-ma, mulai lamatua, ma o langadoom-ma namanalu, tehu o makahola-la. Lelek Au la'ok tunga ndia seluk te, Au ita o faim-ma losa, soaneu o leo-la'ok moo tou-ta'eanak so. Au alu'e Au ba'du manalung-nga neu o ao makaholam-ma, ma Au aheluk, Au fe Au susue-lalai ina-anafe'ong-nga neu o. Au tao hehelu-balataak o o, fo no enok ndia, o da'di Au nuung. Au, Manetualain Fo Mademaina, nde manakokolak-ka.

YESKIAL 16:7 ပူးပေါင်းရင်းမြစ်များ

KEJADIAN 22:17

Neukose, Au ba'e-pala o nenik baba'e-papalak manasasi kao-kaok-ka, ma Au fe o tititi-nonosim de'u nduuk manai lalai-a, ma solokaek manai tasi su'un-na. Neukose, o upu-anam sengi musun-nala.

AYUB 1:21

ma nafa'da nae, “Au inang bongi au-a, au ta eni hata esa boen, de neukose au mate boeo, au ta eni hata esa boen. Manetualain nde fe-a, de Manetualain boeo nde ho'i falik-kana. Koa-kio na'den-na!”

MAZMUR 135:4

Ana hele Yakob ba'eneu Ndia, ma Ana tao hataholi Israel-la, da'di Ndia nuun.

MAZMUR 147:20

Ana ta tao leondiak neu leoina fe'ek-kala fa, de ala ta lalelak hoholo-lalanen fa. Koa-kio Manetualain leona!

MAZMUR 148:14

Ana tao natetea-nahehele leoinan so, de nalosa, anan susuen Israel koa-kion. Koa-kio Manetualain leona!

KELUARAN 1:7

Tehu sila tititi-nonosin fo nde hataholi Israel-la, bongi upu-anak makadotok, de lamade'u no lai-laik nanseli, nalosa ala tao lahenu nusa Masir-ra.

KELUARAN 12:37

Hataholi Israel-la la'o, de ala la'o eik leme kota Raamses-sa leo kota Sukot-ta leu. Dede'un-nala, hataholi 600.000 ta leke inak-kala, ma ni'iana-la fa.

KELUARAN 3:22

Neukose inak Israel-lala, loke papake-ngganggaok, boema lilofulak ma lilopilas neme hataholi Masir manai sila uma titia-tatain-nala, ma neme ina Masir fo ala leo lakabubua loos, nai uma esa dalek. Neukose, emi fe emi anam-mala pake lilo-henu sila-la. No enok ndia, neukose emi kalo hataholi Masir-rala.”

KIDUNG AGUNG 4:5

O su'um-ma, sama leo nusa ana 2, nusa ana susula muku takalapak-ka, bei na'a na'u nai bunga tale-la tala'da.

KIDUNG AGUNG 8:10

Au ia papala nanadamak esa, ma au su'ung-nga uma puni mademan-na. Au touana susueng-nga bubuluk nae au o ndia soona, au aua-anale.

KIDUNG AGUNG 8:8

Ami fa'di inanam esa, su'un-na bei anak-ka. Ami muse taon tao leo beek metema hataholi mai a'du-natanen?

YESAYA 61:10

Yerusalem nafa'da nae, “Au amahoko-setelee nanahu Manetualain, au daleng-nga namahoko, nanahu Manetualain. Sama leo manaka'bing touk-ka no inak-ka, ala pake lilo-henu mana'ahiik mesa-mesan, leondiak boe Manetualain fe au pake ba'du so'da-molek, ma ba'du sesengik-ka.

YESAYA 62:3

O da'di sama leo ti'ilanga manek mana'ahiik nai o Manetualain-na liman-na.

YESKIAL 16:16

O ho'i-ma, o bua papakem nggelok fo, o balias neu o mamana sosongo-tatangom-mala. O da'di ina manasosoa-piaok, ma o mase'o o aopaam-ma, neu touk lala'en-na.

YESKIAL 16:22

Nai o maso'dam da'di leo manasosoa-piaok, fo nanamaluak ndia dalek, o mafandele heni tepo-lelek o bei ana-ma, lelek o makahola-la, ma o mafoki meme o daam manalifum dale.”

YESKIAL 16:6

Basa boema, Au la'ok tunga ndia, de Au ita o daam-ma lifu, de o mafoki meme dalek, tehu Au ta nau mate o fa.

HOSEA 2:3

Metema, ana da'di manasosoa-piaok nahele soona, neukose Au o'du heni bua-lo'an, fo nakahola-la sama leo nai faik fo bongin-nana. Neukose Au tao-an, da'di sama leo dae ma'dak ma dae tokotik, soona neukose maten no maa ma'dak-ka.

HATAHOLI 7:17

Lelek Manetualain fai na deka, fo Ana tao natetu hehelu-balataan no Abraham te, ita leoinan manai Masi ra, lamade'u-lamba'u so.

ULANGAN 1:10

emi Manetualaim-ma, Ana taon-na emi boetai mamade'uk-ka, nalosa emi dede'um-ma, de'u nduuk manai lalai-a.

ULANGAN 1:11

Ela leo been-na, emi bei-ba'i kai Manetualain-na, popo-tama nakandaoo emi dede'um-ma, fo losa didikuk la'i lifun esa, ma Ana tao-na emi da'di leoina fo tetu-temak, sama leo hala hehelun-na!

ULANGAN 4:8

Ma leoina matuaina beek kande, nanuu hoholo-lalanek fo ndoos ma matetuk nanseli, sama leo hoholo-lalanek fo au anolin neu emi nai faik ia?