YESAYA 53:12 - Susula Malalaok Hehelu Palak Ma Hehelu Beuk

¹² Ana fe heni so'dan-na, no dale hihii-nanau mesan-na, de nanalekek nai hataholi mangalauk-kala, dede'un-na dalek. Ana nasaa, hataholi makadotok sala-singon, ma ana hule-haladoi, fo ela hataholi sila, hapu do'o do ampon. Boema Au fen hataholi makadotok, da'di leo bua palsen, ma ana hapu baba'ek sama-sama no hataholi ndoos-sala.”

YESAYA 53:12 ပူးပေါင်းရင်းမြစ်များ

KEJADIAN 3:15

O ma inak ndia, neukose esa musu no esa, ma tititi-nonosin ma o tititi-nonosim, neukose esa musu no esa. Neukose tititi-nonosin, tutu lakabebelak o langam-ma, ma neukose, o kaan neu sila eitingan-nala.”

AYUB 30:16

Besak ia, au hihii mate; au doi-dosong, ta hapu namada'u fa.

MAZMUR 2:8

Moke leona, soona Au fe o, basa leoina lala'en-na, ma Au tao daebafak-ka lala'en-na, da'di o nuum.

MAZMUR 22:14

Lasasale matak loo au no bafan-nala beepoo, sama leo singa nanggao fo ana kaa.

KELUARAN 15:9

Musu nafa'da nae, ‘Neukose au usis, fo au ho'u-alas, au fe'a au tafainang-nga, de au ta'ti isas. Boema au loso-a hata-heto-nala, au baba'en, fo au u'a-paken losa au doa-henin.’

YESAYA 49:4

Tehu au afa'da ae, “Au sosota-mamangung, palsuma; au basa au be'i-balakaing, no sosoa-ndandaa tak!” Tehu au amahele Manetualain nasala'e au hak-ka, Manetualain balas au, tunga au tatao-nono'ing.

YESAYA 52:13

Manetualain nafa'da nae, “Tete'ek-ka, Au atang-nga, neukose ana hapu buna-boak; neukose nanakoa-kiok, ma nananamadedemak.

YESAYA 52:15

Tehu besak ia, ana taon-na leoina makadotok dodoo doak-kana, mane-manek-kala, ta lahahala fa, nanahu ala dodoo doak-kana. Neukose ala lita, ma lalelak, hata fo makahulun-na, ala ta bubuluk-kana fa.”

YESAYA 53:6

Ita basa-basa-tala, tatofa-tatalak, sama leo bi'ilopo-a, fo esa-esak sangak enon. Manetualain nadodou basa ita sala-singon neun so.

YESAYA 53:8

Nanahukuk, ma nananaketu-nala'dik, boema nanalele'a-lolosok, ma nanahuku nisak. Ta hapu esa boen, fo ana taoafik neu ua-nalen fa; ana mate, hu kande ita leoinan, sala-singon.

DANIAL 2:45

Ade, Ama Manek ta nita basa nae hataholi ta koila'e batu esa fa, te batu ndia tu'da neme felak lain mai, boema napaluni ma ana tao nakalulutuk dodoki-dudulak neme besi, liti, dae ulek, lilofulak ma lilopilas ndia mai hetu? Manetualain fo matuaina, nafa'da Ama Manek hata fo neukose ana da'di. Bisa lamahele me'is ndia, ma atam-ma nafa'da mangalele'don-na la'en.”

MATEOS 26:42

Boema Yesus neu hule-haladoi la'i esa seluk nae, “Ama, metema doidosok ia, Au muse la'o la'din, ma ta hapu tao nadoo kana fa soona, neme na fo Ama hihii-nanaun da'di leona.”

MARKUS 15:27

Ala lona-nggange Yesus sama-sama no hataholi manabonga uma dua, de esa nai Yesus boboa kona na ma esa nai Yesus boboa kii na.

MARKUS 15:28

Dede'ak ndia ana da'di, fo ela nandaa no hata fo nanasulak nai Susula Malalaok dale nae, “Ala taon da'dileo hataholi mangalauk.”

LUKAS 22:37

Nana, mamahele leona, te Susula Malalao ka lalane na nde ia nalii nae leo ia, ‘Lafa'da lae, Ana da'dileo hataholi mangalauk esa,’ dede'ak ndia muse ana da'di neu Au aoinang lain. Nana hata fo nanasulak nai Susula Malalaok dale la'eneu Au, besak ia ana da'di.”

LUKAS 23:25

de ana po'i hataholi fo sila loke ka, fo nde hataholi nanahukuk nanahu ana tao tasibu ma kanisak. Basa boema ana fes Yesus fo ala taon tunga sila hihii-nanaun.

HATAHOLI 26:18

fo tao ma mata nala lalaak, fo daenga ala kalua leme makahatuk dale leo mangale'do ka dalek, ma latapo'i leme Nitu dudungu-papaun mai, fo ela Manetualain koasa nalas. Fo no namahehelek neu Au ndia, Au fe do'o do ampon neu sala-singo nala, fo ala da'di Manetualain hataholi kamahehele nanahelek.’ ”

ROMA 8:34

Ade hapu hataholi nau fe salak neu ita do? Soona, mahani te Kristus Yesus nde nasala'e ita! Ndia nde manamate basa ka, ma naso'da falik neme mamate sa mai, de nangatuuk nai Manetualain boboa kona na.

2 KORINTUS 5:21

Kristus sala-singon ta, tehu Manetualain fen Ana lu'a-lepa ita sala-singo nala, fo ela ita malole falik to Manetualain, nana ita da'di esa to Kristus.

FILIPI 2:17

Fafa'kama neukose ala taolisa au, fo daenga au daa nga da'di sama leo tutunu-hohotuk fo nanapo'ak neu hata fo emi fen neu Manetualai na, fo ana da'dileo ta'du-tana nae, emi mamahelen. Metema memak muse leondiak soona, au oke makasi neu dede'ak ndia ma au amahoko o emi.

KOLOSE 2:15

Nai ai nggangek lain, Kristus tao nala dula dalek fo ala paleta ma ala koasa, basa-basas male henis. Ana tao na basa daebafa ka lita, Ana hela nos, sama leo hataholi nanatahan ala, nai lelek fo Ana tao feta fai sesengi na, nono'ka bai hataholi nanahuku kala, fo Ana taos da'di natutu'duk esa nai lea matan.

TITUS 2:14

Ana tunu-hotu basa ao ina na soaneu ita, ma Ana se'i-po'i ita teme mangalauk lala'ena mai, fo Ana tao ita da'di Ndia hataholi kamahehele malalao-malalafuk ma mana manggate tao tatao-nono'i malole.

IBRANI 12:2

Ela leo bee na ita mata memete na nasale leo Yesus neu, nana Ndia nde nafofo'a ita namahehele na, ma nakaboboin neme makasososa na losa mete'e na. Yesus nakatatakak doidoso ka neme ai nggangek lain! Ana ta nafaduli nae, mate nai ai nggangek lain ndia nde bee na, hata esa fo nini mamaek. Ka'da nafandele neu namahokok fo neukose name'da nitan nai fai makabuin. Besak ia, nangatuuk nai Manetualain kandela mane na boboa kona na, ma Ana paleta sama-sama non.

IBRANI 7:25

Hu ka nde ndia de, soaneu losa dodoo na, Yesus hapu soi-tefa na hataholi-hataholi fo ana mai neu Manetualai na, tunga Ndia, nana naso'da losa dodoo na, soaneu Ana dokodoe neu Manetualain, ba'eneu hataholi sila la.

IBRANI 9:24

Nana Kristus ta masok leo Kama Malalaok fo hataholi daebafak nde tao nana, ndia ka'da salaok esa neme Kama Malalao matetu ka mai. Kristus mesa kana nde masok leo nusa so'da ka neu; de besak ia, Ana nasasalematak no Manetualain, hu ka nde ita paluu na.

IBRANI 9:26

Hu ka nde metema leondiak soona, dede'ak ndia sosoa na nae, Kristus doidoso fali-fali, mulai neme daebafak ia da'di makasososa na mai so. Tehu besak ia, ita bubuluk, nai fai makabuin ia, Ana mai ka'da la'iesa, de Ana loseheni ita sala-singon, ninik Ana tunu-hotu aoina na.

IBRANI 9:28

Leondiak boe Kristus nanatunu-hotuk ka'da la'iesa, soaneu Ana loseheni hataholi ba'u sala-singon. Neukose Ana mai seluk nai kala'i dua na, tehu Ana ta mai naketu-nala'di dede'a sala-singok fa, te Ana mai soi-tefa hataholi mana mahani mamai na.

1 YOHANIS 2:1

Ana ngala lemin! Au sulak fe emi susulak ia, fo ela emi boso boe tao sala-singok bai. Tehu metema bei hapu emi nggelok tao sala-singok soona, hapu ita hataholi mana masala'en esa na'de Yesus Kristus. Ana tao tunga ka'da ndo na. Neukose nasala'e ita nai Ama ka matan.

1 YOHANIS 2:12

Ana ngala lemin! Au sulak fe emi susulak ia nana hu ka nde Kristus de, emi sala-singom hapu do'o do ampon so.