YESAYA 53:10 - Susula Malalaok Hehelu Palak Ma Hehelu Beuk

¹⁰ Manetualain nde nahiik, nae ana doi-doso-a, ma ana fe aoinan-na neu, fo da'di leo tutunu-hohotuk fo, sala singok hapu do'o do ampon. Boema, neukose teun-na namanalu, fo nita tititi-nonosin, Neukose Manetualain hihii-nanaun nanatao natetuk, tunga ndia.

YESAYA 53:10 ပူးပေါင်းရင်းမြစ်များ

MAZMUR 110:3

Nai faik o mai no koasa, nai pupukuk malalao-malafuk-ka, o laum-mala tutulumatak no sila hihii-nanau mesan-na. Sama leo dinis-sa nai fai fafain-na, basa touana muli-soluk-kala, ala mai leo o mai.

MAZMUR 147:11

Manetualain namahoko neu hataholi kamahehelek-ka, neu hataholi fo, namahena nalele neu susue-lalain.

MAZMUR 149:4

Manetualain dalen-na nahiik anan-nala; Ana fe hataholi dale taidaek-ka, ana sengi.

MAZMUR 21:4

O mai neun no baba'e-papala manasasi kao-kaok-ka, ma O tao ti'ilanga lilopilas-sa neu langan lain.

MAZMUR 22:30

Basa hataholi matua-la, neukose ala sene-do'ok lai matan-na, basa hataholi daebafak fo, manasapu-manalalok-kala, neukose ala sene-do'ok-kana.

MAZMUR 22:31

Bobongi manamaik-kala, neukose lakaluku-lakatele ma fe ha'da-holomata neu Manetualain, Neukose nanatui-bengak neme tititi-nonosik leo tititi-nonosik neu.

MAZMUR 69:26

Nemen-na fo, sila lalaa teman-na, da'di nee-nee lino-linok ma hataholi ta leo nai sila lalaa teman dale fa.

MAZMUR 72:17

Ela leo been-na, na'de manen-na nananafandendelek losa dodoon-na, ma ela leo been-na, na'den-na boetai nanakoa-kiok nai lelek le'do bei nai lalai-a. Ela leo been-na, leoina-la loke, fo fes baba'e-papalak sama leo ndia, ma basa hataholi-la loken soona lae, maua-manalek.

MAZMUR 72:7

Ela leo been-na, ndoos ma matetuk-ka nakapela nai tepo lelen-na, ma tetu-temak-ka sasi kao-kao nai lelek bulak-ka bei nai lalai.

MAZMUR 89:29

Neukose Au sue-lai ahelen, neme doon losa dodoo-na, Au hehelu-balataang, matea-mahelek ba'eneun

MAZMUR 89:36

La'i esa losa dodoon-na, Au soo-supa nenik Au na'de malalao-malalafung-nga; neukose Au ta asapepeko-asandandali neu Dauk fa.

YESAYA 42:1

Manetualain nafa'da nae, “Au atang fo, Au tia-to'ban-na, nde ia, Au hataholi heheleng fo nandaa no Au daleng-nga. Au fe basa Au koasang-nga neun so, soaneu neni ndoos ma matetuk-ka, ba'eneu leoinak-kala esa-esak.

YESAYA 46:10

Neme makasososan-na, Au tui-benga dede'a makabuik-kala, neme makahulun-na, Au afa'da ela, hata fo, neukose ana da'di. Au afa'da ae, Au nakeketung-nga, nanatao natetuk, tao leo bee-o, Au tao tunga, Au dale hihiing-nga!

YESAYA 49:4

Tehu au afa'da ae, “Au sosota-mamangung, palsuma; au basa au be'i-balakaing, no sosoa-ndandaa tak!” Tehu au amahele Manetualain nasala'e au hak-ka, Manetualain balas au, tunga au tatao-nono'ing.

YESAYA 53:12

Ana fe heni so'dan-na, no dale hihii-nanau mesan-na, de nanalekek nai hataholi mangalauk-kala, dede'un-na dalek. Ana nasaa, hataholi makadotok sala-singon, ma ana hule-haladoi, fo ela hataholi sila, hapu do'o do ampon. Boema Au fen hataholi makadotok, da'di leo bua palsen, ma ana hapu baba'ek sama-sama no hataholi ndoos-sala.”

YESAYA 54:3

Neukose o boetai mamaloa leo kona, ma leo kii muu, neukose o laum-ma, langatuu-la, leoinak-kala daen-na, ma ala leo kota-kota fo besak ia, nee-nee lino-linok-kala.

YESAYA 61:9

Emi tititi-nonosim, nananita-nalelak nai basa mamanak lala'en-na, nanakoa-nanakiok, nai basa leoina lala'en-na tala'da. Boema basa hataholi fo nitan, neukose ala manaku, lae Au ba'e-pala leoina ia.”

YESAYA 66:22

Sama leo lalai beuk ma daebafa beuk-ka, neukose lakatatakak, nanahu Au koasang-nga, leondiak boe, emi tititi-nonosim, ma emi na'dem-ma nahele.

YESAYA 9:7

Manetualain naketu basa nusa Israel-la, huhukun-na so.

YEREMIA 32:41

Neukose Au hii ka'da tao malole ba'eneu sila, ma Au tao-as leo lahele nai nusak ia soaneu losa dodoon-na.

YESKIAL 33:11

Mafa'das mae no Au, Manetualain fo maso'dak-ka na'den-na, Au ta amahoko fa, metema mate hataholi masala-masingok esa; nasafalin-na, Au hii ana tukatei-saledale neme sala-singon-nala mai, fo ela naso'da nahele. Hai leoina Israel-la lemin, hahae tao tatao-nono'i mangalauk-ka leona! Tao le'e de, emi nau mate?

DANIAL 9:24

Teuk hituhulu la'i hitu ndia nde faik fo Manetualain naketun soaneu Ana soi-po'i o leoinam-ma, ma o kotam fo malalao-malalafuk ndia neme sala-singok ma tatao-nono'i mangalauk-ka mai. Basa sala-singok lala'en-na, neukose hapu do'o do ampon ma napadedeik natetu ndoos ma matetuk fo manaketu basa taak-ka, nalosa ninitak ma hala nafa'da elak ndia, neukose ala da'di, ma Manetualain Uman fo malalao-malalafuk ndia, neukose pake falik-kana soaneu Manetualain.

MIKHA 7:18

Ta hapu Manetualain sama leo O fa, ou Manetualain, fo manafe do'o do ampon neu bei ela O hataholim nanahelek-kala, sala-singon. O ta mamanasas losa dodoon-na fa; nasafalin-na, O mamahoko matu'du O susue-lalaim fo too-lanen ta ndia.

ZEFANYA 3:17

Emi Manetualaim-ma fo mabe'i-balakaik-ka, nananasulu-nahapak emi. Emi sengi nanahu koasan-na. Manetualain namahoko ma setelee, nanahu emi, Nai susue-lalain-na dalek, Ana fe emi so'da beuk. Hu ka nde emi, de nakamee no namahokok

ZAKHARIA 13:7

Manetualain Fo Manakoasa, nafa'da nae, “Fo'a leon, hai tafaina, fo sapu-ma manafoo fo naue-nale'di fe Au! Taomisan leona, soona neukose bi'ilopo-la tapasasala. Neukose Au sapu-a Au anang-ngala,

MATEOS 17:5

Petrus bei kola-kola te, ko'a fulak bubuak esa fula elu-elu ana poti nalas, ma hala ka nananamanemek neme ko'as ndia dalek mai nae, “Ia nde Au ana susue nga. Nandaa no Au dale nga. Mamanene neun!”

MATEOS 3:17

Basa ndia boema Manetualain hala na nana namanenek nae, “Au ana susue-lalai nga nde ia. Ana tao namahohoko Au dale nga.”

LUKAS 1:33

Ma neukose Ana paleta sama leo manek neu Yakob tititi-nonosin losa dodoo na. Nusa na neukose ta hapu mate'e na fa.”

YOHANIS 1:29

Balahaa boema, Yohanis nita Yesus mai boema nae, “Mete mitak, Manetualain Bi'ilopo Anan, fo mana kokaheni daebafa ka sala singo na, ana mai nde ndia.

YOHANIS 12:24

Au dede'ang ia, tete'e ka la'en: Makanaema ha'de de'ek esa, ta selen leo dae dale neu, fo ha'de de'ek ndia po'o fan, soona neukose ana da'di de'ek esa nahele. Tehu makanaema ha'de de'ek ndia po'on nai dae dale, soona besa ka ana moli, fo nabuna-naboa ha'de de'e ba'u.

YOHANIS 13:32

Metema Manetualain nananamatutua-namadedemak tunga Ana Hataholik ndia soona, Manetualain namatutua-namadedema Ana Hataholi ka, tunga Ao inana. Lena-lenak, neukose Manetualain namatutua-namadedeman no laik-laik.

ROMA 6:9

Nana ita bubuluk basa, Manetualain tao naso'da falik Kristus neme mamate sa mai so, de Ana ta mate so'on; nana mamate sa, ana ta koasan so'on.

ROMA 8:32

Hu ka nde ita paluu na de Ana fe ita, Ana susue na; na masa bole, Ana ta fe ita, basa hata lala'ena fa?

ROMA 8:8

Basa hataholi fo laso'da tunga hataholi daebafa ka ha'da-palii na, hataholi ndia ta nandaa no Manetualain fa.

2 KORINTUS 5:21

Kristus sala-singon ta, tehu Manetualain fen Ana lu'a-lepa ita sala-singo nala, fo ela ita malole falik to Manetualain, nana ita da'di esa to Kristus.

GALATIA 3:13

Tehu Kristus soi-po'i ita teme agama hoholo-lalanen soo-supan mai so. Ana tao dede'ak ndia tunga, Ana po'i lotak ao ina nanasoo-supak, hu ka nde ita. Nana nai Susula Malalaok dale, nanasulak nae, “Sosoo-susupak ba'eneu hataholi fo maten nanalonak nai dii ai lai na.”

EFESUS 1:5

de, naketu basa nakahuluk nae, tunga Yesus Kristus de, neukose Ana so'u ita da'di Ndia anan. Ma memak dede'ak ndia nde, nahiik Ana tao nana.

EFESUS 1:9

Tunga Manetualain hihii-nanau mesa na de, nafa'da dale tutu'u nafuni na neu ita; naketu basa nae, neukose Ana tao nakababasak dale tutu'u nafufunin ndia, tunga Kristus.

EFESUS 5:2

Ela leo bee na, susu'e ka koasa emi so'da ma, sama leo Kristus boeo, Ana sue-lai emi. Ana fe heni ao ina na soaneu ita, da'dileo tutunu-hohotu kaboominik esa fo ana tao namahoko Manetualain dale na.

2 TESALONIKA 1:11

Hu ndia de, ami hule-haladoi tataas esa fe emi. Ami hule-haladoi neu Manetualain fo ela emi hapu maso'da tunga hihii-nanaun; hu no dede'a ka nde ndia de, nalo emi. Ela leo bee na, Manetualain koasa na, tao natetea-nahehele emi, fo ela emi tao-no'i dede'a malole. Manetualain koasa na boeo, sama-sama no emi fo, emi tao-no'i tatao-nono'i mateu-mandaak, hu ka nde emi mamahele Kristus.

IBRANI 2:13

Yesus boeo nafa'da nae, “Neukose Au tao Au namahehena nga neu Manetualain.” Ma nafa'da boe nae, “Au nde ia, sama-sama o ni'iana-ni'iana fo O fe basan neu Au a so.”

IBRANI 7:27

Ana ta sama leo imam matua ina fe'e kala fa, fo tunga faik, muse ala fe tutunu-hohotuk nakahuluk nana sila sala-singo nala, fo besa ka soaneu hataholi kamahehele kala sala-singon. Tehu Yesus fe tutunu-hohotuk ka'da la'iesa mesa kana, soaneu losa dodoo na, nai lelek Ana tunu-hotu ao ina na mesa kana, da'dileo tutunu-hohotuk.

IBRANI 9:14

Naa, metema bi'i daa no sapi daa, ala hapu tao balisi hataholi a neme sala-singon mai soona, muda hata no Kristus daa na bai! Tunga Dula Dale mana ketu basa ta ka, de Kristus tunu-hotu aoina na da'dileo tutunu-hohotu matetu-mandaak soaneu Manetualain. Kristus daa na, ana tao nalalao ita dale na, neme agama ito ato mana da'di taan ndia mai, fo ita hapu talalau-taoono Manetualain fo maso'dak dia.

1 PETRUS 2:24

Kristus lu'a-lepa ita sala-singon neme ai nggangek lain, fo ela ita tatapo'i teme sala-singo ka koasa na mai, fo taso'da tunga Manetualain hihii-nanaun. Kristus hina nala, nde lakahahaik emi a.

NINITAK 1:18

Au nde Ndia fo maso'da ka! Au mate so, tehu mete leona te, Au aso'da losa dodoo na. Au koasa mamate sa, ma daebafa hataholi manamate ka.