YESAYA 2:3 - Susula Malalaok Hehelu Palak Ma Hehelu Beuk

³ basa-basas lafa'da lae, “Mai fo, ata kae leo Manetualain Pupukun lain teu, leo Israel Manetualain Uman-na teu. Neukose nanoli ita hata fo ita muse taon. Neukose ita tunga enon-na, nana Manetualain nanolin-na, ana mai neme Yerusalem mai, Ana kokolak neme Sion mai.”

YESAYA 2:3 ပူးပေါင်းရင်းမြစ်များ

ESTER 9:27

nininin-na, ala tao nakanenetek esa, ba'eneu sila, ba'eneu sila tititi-nonosin, ma ba'eneu basa hataholi fo neukose, ala masok leoina Yahudi-a. Tunga nakanenetek ndia, de tunga teuk soona, sila muse tao feta nai faik ka duak fo Mordekhai naketu basak-ka so.

MAZMUR 102:23

lelek leoina-la, ma nusa-nusak-kala lakabubua soaneu fe ha'da-holomata neu Manetualain.

MAZMUR 110:2

Neme Sion mai, neukose Manetualain tao namaloa o nusam-ma; koasa o musum-mala leona!

MAZMUR 119:171

Au nau koa-kio O, tataas esa, nana O manoli au, O nakeketum-ma.

MAZMUR 122:1

Dauk nakamee dodonge-dadaman. Au amahoko-setelee, nai lelek hataholi-la lafa'da au lae, “Mai fo, ata teu leo Manetualain Uman-na teu!”

MAZMUR 48:1

Teidalek Korah kokoa-kikion-na.

YESAYA 1:26

Neukose Au fe seluk emi manakee-manafula, ma manamanoli-mafa'dak sama leo makahulun-na. Soona neukose Yerusalem nanafoik na'de kota fo, ndoos ma matetuk, ma manalilinekak.”

YESAYA 11:10

Neukose fain-na losa, leoina-la tao matak neu manek esa, neme Dauk tititi-nonosin mai. Neukose ala mai neun, ma ala koa-kio mamana leleon-na.

YESAYA 19:23

Nai lelek ndia, neukose hapu okofoo nai Masir ma Asyur tala'da. Fo nusa ka duak-sila laun-nala, neukose leu-mai tunga enok ndia, fo ala sene-do'ok sama-sama.

YESAYA 28:9

Ala haladoi la'eneu au lae, “Naedaenga, ndia nanoli see? Boeo, see kande, paluu ndia nanolin-na? Dale dodoon-na, ita ia, ni'iana kalafina beuk do?

YESAYA 44:5

Neukose hataholi-la, esa-esak manaku nae, ndia aoinan-na, Au nuung ndia, ma ana mai nakabubua no Yakob tititi-nonosin. Esa-esak sulak nai liman-na nae, Manetualain Nuun, ma noke aoinan-na soona nae, Manetualain anan-nala lima-ein.”

YESAYA 56:5

soona neukose, o na'dem-ma, nananafandendelek nai Au Umang dale, ma nai Au leoinang dale. Ndia malole lena neme, o manuu ana touk ma anainak. Au fe emi na'dek fo, manaketu basa taak-ka, fo neukose, ta nananafandele henik fa.”

YESAYA 56:7

“Neukose Au o emi leo Sion, leo Au pupukung fo, malalao-malalafuk-ka neu, ma Au fe namahoko-seteleek, nai Au uma mamasong-nga Tutunu-hohotuk fo, emi tunu-hotun nai Au mei tunu-hotung lain-na, neukose Au sipok-kana. Neukose loke Au Umang-nga soona lae, uma huhule-haladoik soaneu leoina lala'en-na.”

YESAYA 60:3

Leoina-kala, ala faa beosu, mai leo o mangale'dom-ma mai, masa'ak fo ana tii nai o lain-na, ana taon-na manek-kala, dalen-nala lahiik-kana

YESAYA 65:11

Tehu hataholi fo, manala'oela Au-a, ma ta manataoafik neu Sion, fo Au pupuku malalao-malalafung-nga, fo manatunu-hotu nana'ak fe Gad ma Meni, fo lamatua daebafak maneni nanalak ma ua-nalek-ka, hataholi sila-la, ua-nalen ta leondiak fa.

YESAYA 66:20

Neme nusak sila-la mai, neukose ala loo falik emi tolano-tolanoom fo, leoina esa, da'di leo bua palsen soaneu Au. Neukose ala lo hataholi sila-la, leo Au pupukung fo malalao-malalafung-nga neu nai Yerusalem no ala sa'e ndala, keledei ma onta, ma no kaleta boema nggalobak, sama leo hataholi Israel-la biasa leni tunu-hotu gandum nai mamana balisi dale, leo Manetualain Uman neu.

YEREMIA 12:16

Metetma ala sipok Au anang-ngala so'da salanin-nala no dale katematu, ma ala nau soo-supa no lafa'da lae, ‘Manetualain fo so'dak-ka,’ – samaleo makahulun-na ala lanoli Au anang-ngala soo-supak neu Baal-la – soona neukose sila da'di Au anang ma so'dan-nala latetu.

YEREMIA 26:18

“Lae nai lelek Hizkia da'di manek nai Yehuda, boema Nabi Mikha neme Moresyet nanduku-nalosak kokolak-ka nde ia, neme Manetualain Fo Manakoasa nae, ‘Sion nana foi-falak sama leo tina, Yerusalem neukose ana da'di batu ai madodouk, ma pupukuk Manetualain Uman-na neukose ana da'di nula.’

YEREMIA 31:6

Tete'ek-ka, neukose losa fain-na te, basa manamanea kota-la leloo-bebou nai lete-lepak Efraim-ma lae, ‘Mai fo ata kae lo Sion teu, lo ita Amam Manetualain teu.’ ”

YESKIAL 40:2

Nai ninitak esa dalek, Manetualain noo au leo dae Israel-la neu, de Ana pe'da au nai lete mademaina esa poin-na. Au ita nai au matang-nga, uma bubuak esa, nalupa kota esa.

HOSEA 3:5

Tehu neukose fain-na losa, leoina Israel-la fali le'us leo sila Manetualain-na leu, ma leo sila manen-na neme Dauk tititi-nonosin mai. Boema, neukose ala bii, ma ala fe ha'da-holomata neu Manetualain, boema ala sipo baba'e-papalan.

HOSEA 6:3

Hu ndia de, mai fo ata sanga enok, soaneu te'e-te'e talelak Manetualain. Tao leo bee-o, neukose Ana mai leo ita mai, sama leo le'do-a tii mai, ma sama leo u'dan-na tao nakadoe daebafak-ka nai faik u'dan-na nate'e.”

MIKHA 4:2

Neukose basa-basas lafa'da lae, “Mai fo ata kae leo Manetualain pupukun lain teu leo Israel Manetualain Uman-na teu! Neukose nanoli ita hata fo ita muse taon. Neukose ita tunga eno-dalan nana Manetualain nanolin-na neme Yerusalem mai; ana kokolak no anan-nala neme Sion mai.”

MATEOS 7:24

“Naa, ba'eneu see fo namanene Au dede'a-kokolang ia boema ana tao tungan, soona hataholi ndia sama na leo hataholi malela ka napadedeik uma na nai batu lain.

LUKAS 11:28

Tehu Yesus nataa nae, “Maua-manalek lena seluk, hataholi mana namanene Manetualain dede'a-kokolan ma nakalala'o kana!”

LUKAS 24:47

Susulak ia la boeo lafa'da lae, no Mane Mana Fe So'dak ndia na'de na, muse nanatui-bengak neu basa leoina lala'ena mae, hataholi daebafa ka muse tukatei-saledale, ma mafa'da mae Manetualain fe do'o do ampon neu sala-singo ka. Halak ndia muse nanatui-bengak mulai neme Yerusalem mai.

YOHANIS 4:22

Ba'eneu emi hataholi Samaria la soona, emi sene-do'ok meu hata fo emi ta malela kana fa, tehu ba'eneu ami hataholi Yahudi a soona, ami sene-do'ok neu Ndia fo ami malela kana, nanahu so'da-mole ka da'di neme hataholi Yahudi a mai.

YOHANIS 7:17

Hataholi fo ana tunga Manetualain hihii-nanau na, neukose ana bubuluk, ade Au nanoling sila la neme Manetualain mai, do neme Au a mai.

HATAHOLI 1:8

Tehu neukose emi hapu koasa, metema Manetualain Dula Dale na ana kona mai emi. Ma neukose emi da'di sakasii soaneu Au nai Yerusalem, nai basa Yudea lala'ena, ma nai Samaria, losa daebafa ka bu'u-bu'u nala.”

HATAHOLI 10:33

Hu ndia de no lai-laik, au adenu hataholi neu nalo Tuan. Tuan dale na malole hiik, de Tuan mai so. Besak ia, ami basa-basa mala makabubua nai ia, nai Manetualain matan, fo mamanene basa hata fo Manetualain nadenu Tuan nafa'dan neu ami.”

ROMA 10:18

Tehu au atane bai, Ade memak sila beita lamanene halak ndia fa do? Tao leo beeo, lamanenen so! Nana nai Susula Malalaok dale nanasulak nae leo ia, “Sila hala nala dolodolo nai basa daebafa ka lala'ena so, sila hala-kokolan losa daebafa ka bu'u nala so.”

ULANGAN 33:19

Ala ka'i basa leoinak-kala, ala mai leo sila leten lain mai, fo ala tunu-hotu tutunu-hohotu matetuk-ka nai ndia. Ala hapu su'i-betes neme tasi-a mai, ma neme solokaek manandolo tasi su'un-na mai.”

ULANGAN 6:1

“Emi Manetualaim-ma, nadenu au fo, au anoli emi basa hoholo-lalanek ia'la, fo ela emi tao-no'in nai nusak fo, ta dook-ka so'on te, emi leon ndia.

YAKOBIS 1:25

Manetualain hoholo-lalanen matetu-mandaak, ma nanuu be'i balakaik fo ana soi-po'i hataholi daebafa ka. Hu ndia de, hataholi fo ana palisak matalolole ma ana taoafik matalole boema ana tao tunga hoholo-lalanek sila la, ma ta ka'da namanene fo nafandele heni fas soona, Manetualain fe hataholi ndia baba'e-papalak nai basa tatao-nono'i na dalek.