YEREMIA 6:23 - Susula Malalaok Hehelu Palak Ma Hehelu Beuk

²³ Tafa-sisilon-nala nde kokouk ma tee; hataholi sila manalaun-na seli, ma ta lalelak do'o do ampon fa. Sama leo lii mapoponuk-ka ngguun-na, leondia boe, sila ndalan-nala ei ndu'un-na, nai lelek fo leu sapu-la Yerusalem-ma.”

YEREMIA 6:23 ပူးပေါင်းရင်းမြစ်များ

YESAYA 10:32

Faik ia, musunok-ka nai kota Nob-pa, de nai naa, ala kukumu liman-nala lasale leo Pupuku Sion-na, ma leo kota Yerusalem-ma neu.

YESAYA 13:18

Neukose, ala kou lisa hataholi muli-soluk-kala nenik sila kokoun-na. Ala ta sue ni'iana bongi beuk-kala, ma dalen-nala ta sue-lai neu ni'iana-la fa.

YESAYA 17:12

Leoina mabe'i-balakaik-kala lakalupu; halan-nala ladodolo sama leo lii tasi matuaina nggun-na.

YESAYA 19:4

Neukose Au fe Masir leo mane ha'da hataholi tak esa liman neu, fo ana paletas no ta pake ha'da hataholik fa. Au, Manetualain Fo Manakoasa nde manakokolak-ka.”

YEREMIA 25:32

Manetualain Fo Manakoasa nafa'da nae, “Anin-na nadodolo neme pe'dak leu pe'dak neu; susa-soe tuni-ndeni leoina esa basa soona esa.”

YEREMIA 25:9

‘Neukose Au alo basa leoina manai neme ki mai-a, ma Au atang Nebukadnezar fo manek Babel-la boe. Neukose Au fe sila soaneu latee-latati la'ban Yehuda no laun-nala, ma basa leoina manai boboa-kaisun-nala. Leiona Yehuda no leoina titia-tatain-nala neukose Au tao akatoto'a-akatatak-kasa ma Au po'ilotak-kasa lakalulutuk soaneu losa dodoon-na. Hataholi fo manamitas-sala neukose ala nggenge-la ma lame'da bibi-namata'uk. Au, Manetualain nde manakokolak-ka.

YEREMIA 30:14

Basa emi manasue-manalain-nala lasanggango heni emi so; Ala ta nau lafandele emi so'on. Sama leo musu-a sapun-na emi, ma Au huku emi nenik nasak, nanahu emi sala-singom ba'uk-ka ma emi kilu-salam-mala matuaina.

YEREMIA 4:13

Mitak musu-a, ana to'da mai, sama leo ko'as-sa. Kaleta musun-nala, sama leo ani-sangu matuaina, ndalan-nala nggafan-na lena heni manupui kaka'ka. Wah, ita soe! Ita mopo-mate!

YEREMIA 4:16

Ala fe nasanene'dak neu leoinak-kala, ma lafa'da laun Yerusalem-mala, lae musu-a ana mai neme nusa dook mai. Neukose ala eki, eeki musu-a soaneu Yehuda kotan-nala,

YEREMIA 4:29

Solda'du manasa'e ndala-la, ma manakouk-kala nakoten-nala, nananamanenek, de taon-na, hataholi-a esa-esak nalai, de bafan ka'u-ka'u. Ala masok leo nula-la dalek leu, ma ala kae pupuku batu-la. Basa kota-la, ala da'di nee-nee lino-linok, hataholi ta nau leo nai ndia so'on.

YEREMIA 5:16

ma hataholi manaho'u kokoun-nala, ao makadelek ma palani; ala lanisa, no ta pake ha'da hataholik fa.

YEREMIA 50:41

Leoina mahelek esa ana nakababale neme nusa dook fo manai kii. Ala mai sama-sama no manek ba'uk-kala fo ala tao musu.

YEREMIA 50:42

Ala leni kokouk ma tee; sila mangalaun-nanseli ta lalelak do'o do ampon fa sama leo tasi fo'a, ndala-la lakadi, fo sila nde fes leu tao musu no Babel.

YEREMIA 6:4

Neukose lafa'da lae, “Ayo, maheheleaom leona, fo ata sapu-ta, Yerusalem! Mai fo, ata sapu-tan, nai faik ia boe!” Tehu basa boema, neukose lafa'da lae, “Wah, ita ta tasi'a fa, de le'do-a sanga tenak so, salao le'donosok-ka mulai namanalu so.

YEREMIA 8:16

Musu-a, nai kota Dan-na so; ndalan-nala lakadii, de tamanenen so, de basa nusak-ka lala'en-na, bii-lamata'u. Musu-a ana mai, fo tao nakalulutuk la'iesak ita nusan-na, boeo ita kotan-na, no basa laun-na.”

YESKIAL 21:31

Neukose, Au kaluaheni Au nasa-melung fo, manalua ponu-ponung-nga neu emi. Neukose, Au fe emi leo hataholi fo, dale susue-lalai tak-kala neu, fo ala tao lamate-lamopo emi.

ULANGAN 28:49

Neukose, Manetualain nadenu leoina esa, ana mai neme daebafak-ka pe'dan-na mai, fo ana la'ban emi, tehu emi ta malelak dede'an-na fa. Neukose, ala la'u leni emi, sama leo manupui kaka'ka, ana la'u neni manuana.