YEREMIA 6:14 - Susula Malalaok Hehelu Palak Ma Hehelu Beuk

¹⁴ Ala mete Au anang-ngala bisun-nala soona lae, ka'da bisu anak mesan. Lafa'da lae, ‘Ah, ta hata-hata fa,’ basa-basan malole ma ta hata-hata fa. Te se'kona, ‘ta leondiak makandondook fa.’

YEREMIA 6:14 ပူးပေါင်းရင်းမြစ်များ

2 SEMUEL 17:3

Tehu neukose, au fe falik basa solda'dun-nala lala'en-na leo Tuan mai, sama leo manaka'bing inak-ka, ana fali ne'un leo saotoun-na neu. Ade, Tuan nape'da dale nasak ka'da hataholi esa mesak-kana samanen-na fa hetu? Neukose fe'ek-kala, ala ta taos le'e esa boen.”

YESAYA 1:6

Neme emi langam-ma, losa emi eim-ma, ta hapu so'da-la'dak fa. Emi aom-ma henuk no peta-paek, bisu piik ma bisu mesa-mesan. Emi bisum sila-la, beita nanasafe balisik do nanapopoti-papaluk, ma ta nanapuli-namo'dok nenik mina boen.

YESAYA 30:10

Ala lafa'da basa nabi-la lae, “Boso mahahala! Boso mafa'da ami, hata fo ndoos-sa, te mafa'da ami, hata fo ami hii mamanenen. Nemen-na fo, ami dodoo dede'a me'i-afek mahele.

YESAYA 30:26

Neukose bulak-ka mangale'don-na, sama leo le'do-a mangale'don-na, ma le'do-a namaneu la'i hitu neme biasan-na mai, ma le'do mangale'don-na, sama leo mangale'dok faik hitu dalen-na. Basa sila-la, neukose ala da'di nai lelek Manetualain popoti-papalu, ma nakahahaik anan-nala bisun fo, lakahinak-kala so.

YEREMIA 14:13

Boema au afa'da ae, “Ou Manetualain Fo Madema ina, O bubuluk te nabi-nabi-la lafa'da basa neu laun-nala lae, neukose ta hapu natee-natatik do la'a-ndoes, nanahu O helu basa mae, nai nusak ia hapu ka'da mole-dame.”

YEREMIA 14:17

Manetualain nadenu au afa'da au dale he'ding-nga neu ndia anan-nala. Muse au afa'da ae leoia, “Memena fo au kii ta pake tata'da fa, lele'do le'dodaen lu'u oe-la titi-beboto Nana au leoinang bisu matua ma ala doidoso lanseli.

YEREMIA 23:17

Ba'eneu hataholi-hataholi fo tanau lamanene Au hala-kokolang-nga fa, ala lafa'da tatas esa lae, ‘Neukose emi maso'da-mamole.’ Ma neu basa hataholi fo malanga batuk-ka, ala lafa'da lae, ‘Neukose o ta hapu susa-soe fa.’ ”

YEREMIA 28:3

Nai teuk dua dalen ia neukose Au ho'i falik hata-heto maneme Au umang-nga, fo nanaho'i nenik neme anek Nebukadnezar-ra lo Babel neu-a.

YEREMIA 4:10

Boema au afa'da ae, “Manetualain Fo Mademaina, O ke'di-ndiu basa hataholi Yehuda-la, ma laun Yerusalem-mala so! O mafa'da, mae neukose hapu mole-dame, te se'kona besak ia, ami so'dam-ma, nai tafaina pe'dan-na.”

YEREMIA 5:12

Manetualain anan-nala, lafa'da hata fo ta la'e fan, la'eneu Manetualain. Ala lafa'da lae, “Ah, neukose Ana ta tao hata-hata fa. Neukose soe ta la'e ita fa, ma neukose ita ta la'ola'di natee-natatik, do la'a-ndoes fa.

RATAPAN 2:14

Hata fo nabi-la landuku-lalosak-kana neu o, ka'da ke'di-ndiuk ma pepekok mesa-mesan. Beita la'iesa fo ala buka o sala-singom fa, nalosa hu kande ndia de, o ta tukatei-saledale fa. Nasafalin-na, ka'da ala tui-benga fe emi dede'a-kokola pepekok mamina-makeek.

YESKIAL 13:10

Hai nabi masapepekok-kala lemin! Emi taom-ma Au anang-ngala latofa-latalak, nenik emi mafa'da mae basa hata lala'en-na, nee-nee lino-lino. Te se'kona ta leondiak fa! Au anang-ngala, ala tao papala nanadamak nenik batu bata, de basa boema emi mai de, emi lose ha'o neu papala nanadamak sila-la.

YESKIAL 13:16

hai nabi masapepekok-kala lemin! Emi malame'i mae Yerusalem nee-nee lino-lino, te se'kona ta leondiak fa!” Manetualain Fo Mademaina, nafa'da nae leondia.

YESKIAL 13:22

Hataholi malole fo, ala ta nau Au taos le'e esa boen-na, emi taom-ma, dalen-nala ba'ihana, nenik emi masapepeko-masandandalim-ma. Emi tao mamatua hataholi mangalauk-kala dalen-na, fo ela lasala-lasingo lahele, ma boso soi-tefas.

YESKIAL 14:9

Metema, nabi esa nanake'di-ndiu basak, nalosa ana fe natataa masalak soona, Au nde ke'di-ndiu nana. Au, Manetualain Fo Mademaina, neukose kalua henin neme hataholi Israel-la dalek mai.

MIKHA 2:11

Emi mahiik nabi fo ana nau nasapepeko-nasandandali ma tipu-dai, boema ana bubuluk hata fo neukose ana da'di nae, neukose emi manuu angol ma ala-lalu sasi kao-kao.”

MIKHA 3:5

Nabi-nabi fo lafa'da memak hata fo malole neu hataholi manafes doik-ka, ala ke'di-ndiu Au leoinang-nga, tehu ala tao musu ma ala heheta-aa'i hataholi manafe taak-kala. Manetualain nafa'da nabi-nabi leo silak-ka nae,

1 TESALONIKA 5:3

Nai faik fo hataholi a nafa'da nae, basa hata lala'na neenee-lino linok ma malole mesa-mesan soona, nai faik ndia nde, susa-soe a, ana mai no kaiboik fo tuni-ndeni nalas, sama leoinak esa nameda he'di bobongik, nai lelek fo ana sanga bongi a.

2 PETRUS 2:1

Makahulu na, hapu nabi masapepeko kala, ala mai leo Manetualain hataholi kamahehele nala dalek mai. Leondiak boe, neukose mese pepeko kala, ala mai leo emi tala'da mai boe. Mesen sila la, lanoli nanoli masalak, fo nini ka'da momopo-mamates fe hataholi a. Ma neukose lalelesi Mana Koasa fo mana soi-po'i sila. No enok ndia, sila nde lini momopo-mamates fe sila ao ina na, fo ta doo anak so'on te, ana tuni nalas so.