Mitak, ala mai so! Solda'du manasa'e ndala-la, ala mai dua-dua. Basa boema, manamanea ndia, ana fe halak-ka mai nae, “Babel tu'da so! Ala sene-do'ok dodoki-dudulak-kala, lakalulutuk de besenggela-besenggali lai dae lain.”
Hu ndia de, Manetualain Fo Manakoasa nafa'da nae, “Neukose Au huku sila! Sila hataholi-hataholi muli-solun-nala neukose mates nai matematatik-ka dalek, ma sila anan-nala neukose mates nenik la'as-sa.
Fo neukose emi mafa'da beek-ka metema hataholi-hataholi fo emi taos sama leo emi tolanom-mala ala tao lakala emi, ma ala koa emi? Tao leo beo neukose emi mame'da he'dis sama leo inak-ka fo ana sanga bongi.
Metema hataholi esa neme Au anang-ngala do nabi do imam fo ala bei kokolak la'eneu ‘Manetualain lelepa mabelan-na’, soona ndia no basa uma isin lala'en-na Au hukus.
Basa ndia soona neukose Au huku leoina Babel-la no manen-na, nanahu sila sala-singon-nala. Neukose Au tao atu'u nusak Babel-la ma Au po'ilotak-kana nakalulutuk soaneu losa dodoon-na.
“Tao ta'du-tana ma mafa'da basa nggileom-mala mae Babel tu'da so! Boso mafuni dede'ak ndia! Merodakh sila lamatuan-na nakalulutuk so, ma tao naba'e dodoki-dudulak hohongek-kala, no basa sosongok-tatangok nananakadadaek-ka.
Hei mafandele neu Au halang-nga ia. Neukose fain-na losa fo Au huku Babel sosongok-tatangon-nala. Hataholi-la lakadii nai basa nusak ndia hu ka nde lakahina matua.