YEREMIA 5:7 - Susula Malalaok Hehelu Palak Ma Hehelu Beuk

⁷ Manetualain nafa'da nae, “Tao le'e de, Au muse fe do'o do ampon neu Au anang-ngala sala-singon? Ala la'o ela Au so, de ala sene-do'ok neu lamatua daebafak fe'ek. Au fes nana'ak, de la'a losa lakabete, tehu ala hohonge, ma nasi'a leu leo ina manasosoa-piaok-kala leu.

YEREMIA 5:7 ပူးပေါင်းရင်းမြစ်များ

2TAWARIKH 13:9

Ade emi ta usiheni la'iesak Manetualain imam-imam fo Harum tititi-nonosin ma hataholi Lewi-la so hetu? Da'di neu ngganggatin-na emi ho'i su'di see fo nahiik da'di imam, sa'di hataholi ndia neni sapi esa do bi'ilopo hitu, soona emi fen da'di imam soaneu hata fo Manetualain ta nde ndia fa, nana eno-na leondiak ba'eneu leoina fe'ek-kala so'u sila imam-ma. Tehu ami ta tao leo ndiak fa.

AYUB 31:12

Sala-singok ndia, ana tao namopo-namate, sama leo ha'i manai tasi ha'ik dale-a, ana hotu heni, basa au hata-hetong lala'en-na.

MAZMUR 50:18

Metema o mita hataholi nakodaa esa soona, o tunga moon, ma o leo-mapalasa moo hataholi manahohongek-kala.

YEREMIA 12:16

Metetma ala sipok Au anang-ngala so'da salanin-nala no dale katematu, ma ala nau soo-supa no lafa'da lae, ‘Manetualain fo so'dak-ka,’ – samaleo makahulun-na ala lanoli Au anang-ngala soo-supak neu Baal-la – soona neukose sila da'di Au anang ma so'dan-nala latetu.

YEREMIA 13:27

Au ita basa emi tao-no'i dede'ak-dede'ak fo Au ta hii fan. Au ita basa emi tunga lamaua daebafak fe'ek-kala nai pupukuk-kala ma nai tina-osi-la, sama leo hataholi touk-kala lamula hataholi saoinan, do sama leo ndala mane-a asa sasaon-naneu ndala ina. Yerusalem Laun-nala lemin, soe ba'eneu emi! Neukose faihi'da de fo emi matapo'i neme basa mangalauk-kala mai?”

YEREMIA 16:11

Mafa'da meu sila mae Au afa'da leo ia, em bei ba'i mamaten-nala la'o ela Au, ‘De ala sene-do'ok ma lamahele neu lamatua daebafak fe'ek. Sila lasanggango heni Au, de ala ta nau tunga Au paletang-nga fa.

YEREMIA 16:20

Hapu hataholi daebafak tao aon ndia lamatua daebafan-na do? Tao leo beo ta! Manataok ndia tao leo beo ta Manetualain fa.”

YEREMIA 2:11

Beita hapu leoina esa, ana tuka heni lamatuan-na, leomae lamatuak ndia, Manetualain ta nde ndia fa. Tehu, Au anang-ngala tuka heni Au, fo sila mandela-masa'an-na, nenik hata esa fo, sosoa-ndandaan ta.

YEREMIA 2:31

Hai hataholi Israel-la lemin, mamanene Au hala-kokolang ia-la. Ade Au da'di hai moo solokaek ba'eneu emi, do sama leo dae fo makahatu kiu-kiuina so do beik? Tehu tao le'e de, emi mafa'da, mae emi nau maso'da no aoloak, ma ta nau fali seluk leo Au mai fa?

YEREMIA 23:10

Ita nusa-namon-na henuk no hataholi fo ta manalilineka neu Manetualain fa. Sila so'dan-na mangalauk, ma ala tao sala sila ha'da palin-na. Nanahu Manetualain supa-soo de, na'u manai mook-ka ana da'di tuk, ma basa nusak lala'en-na kii-lamatani.

YEREMIA 3:19

Manetualain nafa'da nae, “Israel, Au hii sipok o da'di leo Au anang, ma Au fe o, nusak fo nandaa no o dalem-ma, nusak fo malole nanseli, nai basa daebafak-ka lala'en-na. Au hii o maloo Au mae ama, ma o ta malai meme Au mai so'on.

YEREMIA 7:9

Emi mamanako, manisa, hohonge, fe sakasii pepekok, fe tutunu-hohotuk neu Baal, ma sene-do'ok neu lamatua daebafak fo, emi ta malelak-kana fa.

YEREMIA 9:1

Malole lenak, au langang-nga sama leo oedolu, fo oe henun, ma au matang-nga da'di oelolok, fo ana faa nakandoo! Boema au kii lele'do-le'odaen, kii-makaleleu hataholi fo, ami leoina esa, de musu nok-ka taonisas.

YEREMIA 9:2

Ela leo been-na, au hapu mamana susunguk, nai moo solokaek-ka, ba'eneu hataholi fo, nai leleo-lala'on-na dalek! Soona neukose, au la'oela au leoinang, fo au alai leo naa u, fo au dook-ka eme sila mai. Sila basa-basas manatipu-daik-kala, hataholi manalilineka tak, bubuak esa,

RATAPAN 3:42

“Ou Manetualain, ami masala-masingo ma lena-la'ban O so, de O ta fe do'o do ampon fa.

YESKIAL 22:11

hataholi fe'ek saoinan, do manafeun-na, do fa'din fo esak inan, fo ana sungu non.

HOSEA 11:8

Manetualain nafa'da nae, “Hai Israel, hapu nai bee, Au po'ilotak do Au la'oela o. Hapu nai bee, Au tao akalulutuk o, sama leo Adma do? Do Au tao o, sama leo Zeboim do? Au daleng-nga ta losa soaneu tao dede'ak ndia fa, nanahu Au susue-lalaing ba'un-na seli ba'eneu o!

HOSEA 13:6

Tehu nai lelek emi losa nusa malole-a, de emi makabete boema, emi mame'da-nana, dai so, de emi da'di manakoao-ndaeaok, boema emi mafandele heni Au.

HOSEA 4:2

Ala soo-supa tehu ala ta tao tunga fan; ala lasapepeko-lasandandali, lanisa, lamanako, ma ala hohonge. Tatao-nono'i mangalauk-ka boetai nakadele, ma kanisak-ka ana da'di, latutungao.

HOSEA 7:4

Sila basa-basas manadea-dalek, ma ta manalilinekak-kala fa. Sila dale nakamuu-nakadaun-na, sama leo ha'i nai la'o dale, fo nai lelek manatunu loti-a, beita kame ha'desopun-na fo ana tunun, de ana ta nggengge'u ha'i ndia fa.

IMAMAT 20:10

Metema, hataholi Israel esa, ana hohonge no hataholi fo bei sila leoina esa saoinan-na soona, muse hukunisan no inak ndia.

AMOS 8:14

Hataholi fo ana soo-supa nenik Samaria sosongo-tatangon no nafa'da nae, ‘No leoina Dan-na lamatua daebafan-na na'den-na’, do ‘no Bersyeba lamatua daebafan-na, na'den-na’. Soona neukose ana tu'u neu, fo ana ta fo'a so'on.”

ZEFANYA 1:5

Neukose Au sapu balisi su'di see, fo ana kae leo uma kalan lain neu, fo ana sene-do'ok neu le'do-a, bulak-ka, ma nduuk-kala. Neukose Au tao amopo-amate sila, fo ala sene-do'ok neu Au, ma ana soo-supa lilineka nahele Au, tehu ana soo-supa nenik lamatua daebafak Milko na'den-na boe.

MALEAKHI 3:5

Manetualain Fo Manakoasa, nafa'da nae, “Neukose Au mai neu emi, fo aketu-ala'di. Neukose no lai-laik, Au da'di sakasii neu hataholi manasuangik-kala, manahohongek-kala, manasakasii pepekok-kala, hataholi fo ana ta bae natetu hataholi mana'a ngga'di-la, ngga'din-na fa, manatuni-ndeni faluina-anamaak-kala, hataholi nusa dea, ma neu basa hataholi fo ana ta fe ha'da-holomata neu Au fa.”

1 KORINTUS 6:9

Ade emi bubuluk hataholi ta manatunga Manetualain hihii-nanau na, neukose ala ta da'di lima eik neme Manetualain hataholi kamahehele nala mai fa do? Boso fe hataholi ke'dindiu na emi! Hataholi manatao-no'i sosoa-piao kala, manasongo-tango kala, manahohonge kala, touk fo nase'o ao paa na neu ina kala fo ana hapu doik, touk manatao tatao-nono'ik fo manini mamaek soaneu nonoo tou na ma saoina na,

1 KORINTUS 8:4

La'eneu na'a nana'ak fo nanafe basak neu sosongo-tatango ka, ita bubuluk tae, tunga ndo na sosongo-tatangok ta. Boema ita boeo bubuluk basa, Manetualain ka'da esa; ta hapu fe'ek so'on.

GALATIA 4:8

Makahulu na, emi ta malelak Manetualain fa, hu ndia de emi da'di ata neme koasa fo lafa'da lae lamatuak, tehu tunga ndo na, Manetualain ta nde ndia fa.

ULANGAN 32:15

Manetualain anan-nala da'di kamasu'i-makabetek, tehu ala hii lena-la'ban paleta laao bebonu, ma lakabete nana'ak. Boema ala la'oela Manetualain fo Manamakadada'dik sila ma ala ta sipok Manasoi-manatefa palani tatibatu-na fa.

ULANGAN 32:21

Ala tao-la au ta ahiik hata fo, Manetualain ta nde ndia fa, ma Au amanasa sila dodoki-dudula sosongo-tatangon. Boema Au tao-a, Au anang-ngala ta lahiik hataholi fo, leoina ta ndia fa, ma Au amanasa leoina nggoak-ka.

IBRANI 13:4

Basa hataholi lala'ena, muse latu'du heo-hilu ha'da-holomata soaneu uma lo a, hu ndia de ela leo bee na saotou saoinak, esa lilineka nahele no esa. Hataholi mana sosoa-piao ka ma manahohonge ka, neukose Manetualain naketu-nala'dis.

YAKOBIS 4:4

Emi nde bee na, hataholi ta mana lilinekak fa! Ade emi ta bubuluk fa te, metema emi tao tia-laik mo daebafak ia soona, emi da'di Manetualain musu noon fa do? Hu ndia de, metema see tao tia-laik noo daebafak ia soona, hataholi ndia tao ao ina na da'di, Manetualain musu noon.

YOSUA 23:7

No enok ndia, neukose emi ta sese'do-babalik moo leoina fo ala bei leo lai emi tala'da fa. Neukose, emi ta seseik sila lamatua daebafan-nala na'den-na, do soo-supa menik na'dek ndia fa. Boeo emi ta hule-haladoi do sene-do'ok neu lamatua daebafak sila fa.