YEREMIA 5:17 - Susula Malalaok Hehelu Palak Ma Hehelu Beuk

¹⁷ Neukose la'a heni emi daem-ma buna-boan, ma emi nana'am-ma, boema ala taolisa emi anam-mala. Neukose ala ta'ti emi sapim-mala, ma ala do'do emi bi'ilopom-mala, ma ala tao lakalulutuk emi osi angom-mala, ma emi ai kaam-mala. Neukose ala tao lakalulutuk kota-kota makota musuk fo, emi masalai emi deam-ma neus-sala.

YEREMIA 5:17 ပူးပေါင်းရင်းမြစ်များ

YESAYA 62:8

Manetualain helu basa pake soo-supak so, de neukose, Ana tao natetun nenik koasan-na: “Neukose, Au ta fe seluk o gandum-ma, leo musu-a neu so'on; hataholi nusa dea-la, neukose ta linu seluk o angol fo, emi ketu-seun no sosota-mamanguk fa.

YESAYA 62:9

Tehu emi fo, manaketu-koluk-kala, neukose emi mi'a buna-boan, ma koa-kio Manetualain; ma emi fo manaseu angol-la boan-na, neukose emi minu oe angol nai Au Umang-nga so'dan-na.”

YEREMIA 1:15

Neukose Au adenu basa leoina manai boboak kii-la, ala mai, fo ala koasa Yerusalem. Neukose ala loso-la, papala nanadamak fo manaokofefeo-la kota ia, boema lelesuinan-nala, ma basa kota-kota manai Yehuda-la.

YEREMIA 4:26

Dae malolek-ka, ana da'di moo solokaek tuuk kota-kota-la lakalulutuk, de ala da'di ai batu mana tapasasalak, nanahu Manetualain namanasa anan-nala nanseli. (

YEREMIA 4:7

Sama leo singa, ana kalua neme mamana keke'ken-na mai, leondiak boe, leoina fo manatao nakalulutuk-ka, ana la'o so ana mai, fo ana sanga tao namopo-namate Yehuda. Kota-kota manai Yehuda-la, neukose ala lakalulutuk da'di batu madodouk mamanak fo, hataholi ta leo fan.

YEREMIA 5:18

Manetualain nafa'da nae, “Leomae leondiak boe, nai lelek ndia boe, neukose Au ta tao amopo-amate Au anang-ngala fa.

YEREMIA 50:17

Manetualain nafa'da nae, “Hataholi Israel-la sama leo bi'i lopo nanausik-kala ma nanabibinga-baba'ek neme meoasu-a mai. Makahulun-na manek Asyur de sapu-na sila, boema Nebukadnezar manek Babel-la napangge na sila duin-nala.

YEREMIA 50:7

Basa hataholi manamatongo no sila sapu las ma ala fe doidosok. Au anang-ngala musu-la lafa'da lae, ‘Beek fo ita tao ndia ta sala fa hu ka nde hataholi sila tao salak neu Manetualain. Bei-ba'ikain-nala lamahele neu Manetualain, boeo sila lamahele ka'da neu Manetualain.’

YEREMIA 8:13

Au ahiik anseli, tao akabubua Au anang-ngala, sama leo hataholi-a, tao nakabubua dae-oen buna-boan. Tehu Au anang-ngala, sama leo ai angol ma ai kaak boa tak-ka, lena-lenak doon-na boeo, male henin so. Hu ndia de, Au fe basa, hataholi nusa dea-la loak, fo ala koasa sila nusan-na so. Au, fo Manetualain nde manakokolak-ka.”

YEREMIA 8:16

Musu-a, nai kota Dan-na so; ndalan-nala lakadii, de tamanenen so, de basa nusak-ka lala'en-na, bii-lamata'u. Musu-a ana mai, fo tao nakalulutuk la'iesak ita nusan-na, boeo ita kotan-na, no basa laun-na.”

RATAPAN 2:12

Ala sota no kikiik-ka loke inan nana'ak ma nininuk. Ala bala leu enok-kala lain, sama leo hataholi makahinak-ka, boema mates lai inan-nala ifan lain.

RATAPAN 2:2

Ana tao nakalulutuk basa mook manai nusak Yehuda, ta no dale susuek fa. Nai nasa-melun-na dalek, Ana honan losa ndefa heni basa kota musu manamasulu-mahapa nusak ndia. Nusak ndia no basa mauli-malangan-nala, Ana tao natu'das, nalosa ala da'di nakadadaek.

HOSEA 2:12

Neukose, Au tao amate basa ai angol-lala, ma ai kaak-kala, fo tunga ndia soona, ndia ngga'di lau-onon neu basa tou susuen-nala nde ndia. Neukose, Au tao asafali ndia osi angol-la, ma osi ai kaan-na da'di nula; ma neukose bana fuik-kala tao lakalulutuk-kasa.

HOSEA 8:14

Hataholi Israel-la, lafofo'a uma manek-kala, tehu lafandele heni manamakadada'dik sila. Hataholi Yehuda-la, ala tao lamaba'u sila kota-kota makota musun-nala, tehu neukose Au akona ha'i-a mai, fo ana hotu heni sila uma manen-nala ma sila kotan-nala.”

YOEL 2:3

Ala tao lisa basa bubu'u-palusa lala'en-na, sama leo ha'i na'as de putus. Makahulun-na, nusak ndia sama leo Eden, fo Manetualain osin-na, Basa ndia boema, nalupa leo mo solokaek fo na'u-aiana ta moli fan. Ta ela hata esa boen, ta hapu hata esa boen, fo naladeak neme lamak sila mamain-na fa.

IMAMAT 26:16

neukose, Au huku emi. Neukose, Au fe soe-a la'e emi, he'di-laus ma sumaik manalea-hai taak-ka, nalosa poke emi matam-ma, ma emi maso'da doi-doso. Neukose, emi foi-fala, tehu emi ta mi'a buna-boan fa, nana emi musum-mala mai, fo ala ho'i leni la'iesak, emi sele-nggalik-kala, buna-boan.

ZEFANYA 3:6

Manetualain nafa'da nae, “Au tao amopo leoina makadotok so. Au tao akalulutuk kotan-nala, ma papala nanadaman-nala, boema Au tao akalulutuk uma puni mademan-nala, de besenggela-besenggali. Kotan-nala da'di kota nees, de hataholi ta leo nai ndia so'on, boema nee-nee lino-lino.

MALEAKHI 1:4

Leouni'ka, Esau tititi-nonosin, fo hataholi Edom sila-la lae, “Ami kotam-mala, nanatao nakalulutu basak so, tehu neukose ami mafofo'a falik-kana,” soona neukose, Manetualain nataa nae, “Sila bole lafofo'a falik-kana, tehu neukose Au tao atu'un. Neukose lokes soona lae, ‘Nusak nanasoo-supak’, ma loke sila soona lae, ‘Leoina manahapu Manetualain nasa-melun, losa dodoon-na.’ ”

ULANGAN 28:33

Leoina fe'ek esa, neukose ana ho'in-na basa emi dae-oem-ma buna-boan, fo emi hapun neme emi sosota-mamangum mai, fo emi ta hapu hata esa boen, te emi hapuk-ka nde, tuni-ndenik ma heheta-aa'ik nakandondoo henin.