YEREMIA 32:44 - Susula Malalaok Hehelu Palak Ma Hehelu Beuk

⁴⁴ Neukose susulak nase'o-banasan-na nanalima leek, ma nana segel, ma nana tao natea-nahelek neme sakasii-la mai. Ndia neukose ana da'di nai Benyamin mamanan-na nai Yerusalem nggolo-ta'dun-nala boboa-kaisun, nai Yehuda kotan-nala, nai letelepak kotan-nala, nai nggolo-ta'duk manai letelepak-kala huun-na, ma nai Yehuda boboan kona, Neukose Au tao ahii leoina ia heheo-hihilun nai nusak ia. Au, Manetualain, nde manakokolak-ka.”

YEREMIA 32:44 ပူးပေါင်းရင်းမြစ်များ

YESAYA 44:26

Au nde atetea-ahehele Au atang-nga, dede'a-kokolan, ma Au tao-no'i dale tutu'uk fo, Au atang-nga nafa'dan. Au afa'da, ae neukose Yerusalem-ma, nanaleok seluk, ma kota-kota manai Yehuda-la, neukose Au afofo'a falik-kasa; ai-batu manatapasasalan-nala, neukose nanatao matalololek.

YEREMIA 13:19

Yehuda kota-kotan manai kona-la nana sapu nak so, ma ta hapu masok leo nanasapunak sila-la dalek neu fa. Basa hataholi Yehuda-la nanafua leo mamana ookak-ka neu.”

YEREMIA 17:26

Neukose hataholi mai leme kota-kota Yehuda, ma leme desa-desa manai Yerusalem titia-tatain-nala mai; neukose ala mai leme Benyamin ngolo-ta'du, leme nggolok manai letek-ka hun-na, leme nggolok manai lete lepak-ka, ma leme Yehuda boboan kona. Neukose ala leni bana-manu tutunu-hohotuk lo O umam leomae soaneu tunun, do ta tunu fan boema fefeek gandum ma kemenyan ma fefeek makasi.

YEREMIA 30:18

Manetualain nafa'da seluk bai nae: “Neukose Au sue-lai emi fo Au anang-ngala ma Au tao matalolole emi heheo-hihilum-mala nai emi dae oem-mala. Yerusalem neukose nananafofo'a seluk, ma uma manen-na nanaao mahiik.

YEREMIA 30:3

Nana neukose fain-na losa, Au tao ahii Au anan Israel no Yehuda heheo-hihilun-nala. Neukose Au o falik-kasa lo nusak fo Au fen neu sila bei ba'ikai manamaten-nala. Neukose ala hapu falik nusak ndia. Au, Manetualain, nde manakokolak-ka.”

YEREMIA 31:23

Manetualain Fo Manakoasa, fo Israel Manetualain-na nafa'da nae, “Metema Au tao-a Au anang-ngala lalole-lanapu sama leo makahulun-na soona, nai nusak Yehuda no nggolo-ta'dun-nala neukose hapu lamanene seluk hataholi-la kokolak lae, Sa'di leo Manetualain been-na ba'e-pala pupukuk malalaok-ka nai Yerusalem fo mamanak leleok fo malalaok ba'eneun.

YEREMIA 32:37

Neukose Au tao akabubua leoina ia, neme basa nusak fo Au tao tapasasalas nanahu Au nasa-melung neus. Neukose Au o falik-kasa lo mamanak ia, ma Au fes leo nai mamanak ia no nene-lino-linok.

YEREMIA 33:11

Tehu nai mamanak ndia hapu lamanene halak namahokok-kala ma setelek-kala ma halak feta ka'bing-ngala seluk. Hapu lamanene hataholi-la leni nakamek tutunu-hohotu makasi lo Au umang-nga neu boe. Neukose lafa'da lae, ‘Toke makasi neu Manetualain Fo Manakoasa, nanahu Ndia malole-a, ma susue-lalain manaketu basa tak, ma matetuk.’ Neukose nusak ia Au taon da'di manahapu-manadaik sama leo makasososan-na. Au, Manetualain, nde manakokolak-ka.”

YEREMIA 33:13

Basa manafoo-la leke seluk sila bi'ilopon-nala nai kota-kota manai letelepak-kala, letelepak-kala huun-na, nggolo-ta'duk manai Yehuda boboan kona, ma nai Benyamin dae paletan-na, boema nggolo-ta'duk manai Yerusalem boboa-kaisun, ma nai Yehuda kotan-nala. Au, Manetualain, nde manakokolak-ka.”

YEREMIA 33:26

leondiak boe neukose Au ho'u ahele Au hehelung-nga neu Yakob tititi-nonosin ma neu Au atang Dauk. Neukose Au hele-a hataholi esa neme Dauk tititi-nonosin-na soaneu ana paleta Abraham, Isak, ma Yakob tititi-nonosin. Neukose Au sue-lai an seli neu Au anang-ngala, ma Au tao-a so'dan-nala latetu seluk.”

YEREMIA 33:7

Yehuda ma Israel neukose Au taos lalole-lanapu sama leo makahulun-na, ma neukose ala lapadeik lasafali da'di leo Au anang-gala.

OBAJA 1:19

Hataholi Yehuda Kona-la, neukose langatuu-la Edom. Hataholi maneme letelepak muli-la, neukose latona-la nusa Filistin-na. Leo Benyamin-na, neukose nagatuu-na Gilead, ma Au anang Israel, neukose koasa-na Efraim no Samaria lala'en-na.

OBAJA 1:20

Hataholi Israel Kii-la, neukose fali ma'is leme mamana tu'u-tapak mai, fo langatuu-la Fenisia losa Sarfat. Hataholi Yerusalem nanafook manai Sardis-sala, neukose ala fali ma'is, fo lanuu kota-kota manai Yehuda boboan kona.

ZEFANYA 2:7

Neukose Yehuda laun fo laladeak-ka, langatuu-la o nusam ndia. Neukose, ala foo bana-manun-nala nai mamanak ndia, ma nai fai le'odaen-na, neukose ala sungu lai hataholi Askelon-na uman-nala. Nana, neukose Manetualain, fo sila Manetualain-na, nasulu-nahapa seluk-kasa, ma Ana fes lamasu'i-lakabete seluk.

ZAKHARIA 7:7

Dede'ak ndia nde Manetualain nafa'dan tunga nabi-la nai tepo-lelek maneuk-ka, fo nai lelek hataholi bei leo nai Yerusalem, de laun-na tetu-temak. Nai lelek ndia, hataholi ta ka'da leo nai nggolo-nggolok manai kota boboa-kaisun fa, tehu lena-lenak, ala leo nai boboan kona, ma nai pupukuk-kala huun-na, fo nai boboak muli.