YEREMIA 26:18 - Susula Malalaok Hehelu Palak Ma Hehelu Beuk

¹⁸ “Lae nai lelek Hizkia da'di manek nai Yehuda, boema Nabi Mikha neme Moresyet nanduku-nalosak kokolak-ka nde ia, neme Manetualain Fo Manakoasa nae, ‘Sion nana foi-falak sama leo tina, Yerusalem neukose ana da'di batu ai madodouk, ma pupukuk Manetualain Uman-na neukose ana da'di nula.’

YEREMIA 26:18 ပူးပေါင်းရင်းမြစ်များ

2RAJA-RAJA 19:25

Ade, o beita mamanene, lae basa sila la, Au tutu'u basan, neme makahulun eli mai so do? De besak ia, Au akalala'ok-kana. Au nde fe o koasa, fo tao makalulutuk kota-kota-la, ma kota musu-la, fo ala da'di ai batu manatapasasalak.

2TAWARIKH 32:26

Tehu mate'e-na Hizkia ma hataholi Yerusalem-mala lakaloe-lakadae aoina-nala, de nai Hizkia fai maso'da-na dalek, ana ta nakalala'ok huhukuk ndia fa.

NEHEMIA 4:2

Ana kokolak nai tia-lain-nala ma solda'du Samaria-la matan nae, “Hataholi Yahudi manafuu-mopok, ma ala ta bisa tao hata esa boen ndia, ala tao bek ndia. Ade ala sanga lafofo'a falik kota ia do? Sila laedaenga tataos ndia bisa basan nai faik esa dalen-na, ka'da nenik tunu-hotu tutunu-hohotuk do? Ade ha'i na'a naputu kadafu madodouk sila-la, sila bisa taos da'di papala nanadamak-ka batun-nala do?”

MAZMUR 79:1

Asaf Kokoa-kikion. Ou Manetualain, leoina fo, ta lalelak O fa, langatuu-la, O dae pusakam-ma so, Ala tao langgenggeo O Umam-ma, ma ala tao-la Yerusalem da'di ai-batu madodouk.

YEREMIA 17:3

ma nai letek-kala fo nai kota deak. Nanahu basa mamana nakaluku-nakatele sosongok-tatangok fo emi mapadedeik basan nai basa nusa lala'en-na, nanahu basa sala-singok fo emi tao-no'ik-kala, hu ndia de neukose Au tao emi musum-mala kalo leni basa emi hata-hetom-mala ma emi su'i-betem-mala.

YEREMIA 51:37

Neukose nusan ndia da'di bua-lo'a bibiak, ma busa fuik-ka mamana nafunin. Hataholi litan soona ala bii ma esa ta nau leo nai na.

YEREMIA 9:11

Manetualain nafa'da nae, “Neukose Au tao Yerusalem da'di ai-batu madodouk, fo ana da'di, busa fuik-kala mamana keke'ken. Kota-kota Yehuda-la, neukose ala da'di nee-nee lino-linok, mamanak fo, hataholi ta leon so'on.”

MIKHA 1:1

Mikha neme kota anak esa na'de Moresyet. Nai lelek Manek Yotam, Ahas ma Hizkia ala paleta beiko nai nusa Yehuda. Mikha sipo Manetualain hala-hehelun la'eneu Samaria ma Yerusalem.

MIKHA 3:12

Hu kande emi tatao-nono'i mangalaum ndia, de neukose lakauuk Sion sama leo hadeoe, neukose Yerusalem da'di ai-batu madodouk, ma pupukuk fo Manetualain Uman-na, neukose ana da'di nula na'u-aiana.

MIKHA 4:1

Nai fai-fai manamaik-kala, pupukuk, fo Manetualain Uma mamanan-na, neukose napadeik natetu ma boetai namadema lena heni letek-kala ma pupukuk-kala. Leoina lala'en-na, faa beosu leo naa leu.

ZAKHARIA 8:3

Neukose Au fali leo Yerusalem, fo Au kota malalao-malalafung ndia u, fo Au leo nai ndia. Neukose lalelak Yerusalem, da'di leo kota manalilinekak, ma neukose loke Manetualain Fo Manakoasa pupukun-na soona, lae Pupuku Malalao-malalauk.