YEREMIA 2:6 - Susula Malalaok Hehelu Palak Ma Hehelu Beuk

⁶ Au ta afaduli fa; Au fo, manahela-noles nai enok so, ma Au os kalua leme Masir mai la'ola'di moo solokaek-ka, dae tokotiik fo dopelele'un makadotok, boema tuuk, bai te henuk no soe-a – mook fo, nanaleo taak ma ta la'ok tunga fan!

YEREMIA 2:6 ပူးပေါင်းရင်းမြစ်များ

2RAJA-RAJA 2:14

boema ana fepa Elia ba'du manalun ndia, neu oe lain, ma nafa'da nae, “Amak, fo Elia Manetualain ndia, nai bee?” Basa ndia boema, ana fepa ba'du manalu ndia, neu lee oen lain, de oe ndia natasi'da neu dua, de ana la'ok leo selik neu.

AYUB 3:5

Tao-ma faik ndia, da'di fai makahatuk kikiuina, keluha'buk fo ta nasalaa fa; poti-man, nenik ko'as, ma masakoko'ak-ka, babaaketun neme le'do-a haan-na mai.

AYUB 35:10

Tehu ta loke neu Manetualain, fo mana makadada'dik sila fa, fo manafe namahehenak neu sila, nai lelek sila susa,

MAZMUR 23:4

Leomae au la'ok tunga bafak makahatuk dale boe, au tabii soe-a fa, nana O sama-sama mo au O masulu-mahapa au, sama leo hataholi manafoo esa nasulu-nahapa bi'ilopon-na nenik ai tete'ek ma ai kalapu'ak.

MAZMUR 77:5

Manetualain taon-na au, ta bisa sungu nai fai le'odaen-na, au hela-hae, nalosa au ta hapu kokolak fa.

KELUARAN 20:2

nafa'da nae, “Au nde emi Manetualain, fo mananoo emi kalua meme Masir mai, mamanak fo manatao emi da'di ata.

YESAYA 63:9

Ndia mesak-kana, nde lu'a-lepa sila toto'a-tataan-na. Manetualain ta haitua hataholi nadedenuk, do lima boboa konan-na fa; Ndia mesak-kana, nde soi-po'is-sala, nanahu susue-lalain, ma dalek-kasian-na. Ana nakabobois tataas esa, neme makahulun eli mai.

YESAYA 64:7

Ta hapu manahule-haladoi neu O, do noke O tutulu-fafalim fa, nana O mafuni o mata-panam neme ami mai, ma O po'ilotak ami sala-singom tao namate-namopo ami.

YEREMIA 13:16

Emi muse mamatua-mamadema emi Amam Manetualain-na, te ana beita fe makahatuk-ka mai fa, emi eim-ma makatunun nai letelepak-ka, te mangale'dok fo emi mamahehenak-ka beita tao nasafali fan da'dik makiu-makahatuk fa.

YEREMIA 2:2

po'a-benga halak ia neu basa hataholi manai Yerusalem-mala nae, “Hai Israel, Au afandele, o lilineka manseli, nai lelek o bei muli-solum-ma; o susue-lalaim ba'un-na seli nai lelek ita da'di manaka'bing beuk-ka. Au u leo moo solokaek-ka u, boeo o tunga o la'ok tunga dae fo, nanasele-nggali taak-ka.

YEREMIA 2:8

Ta hapu imam esa boen, fo natane nae, Au, fo ndia Manetualain-na nai bee fa. Basa manaketu-mala'dik-kala boeo, ta bubuluk see Au fa basa manakoasa-la, lena-la'ban Au paletang-nga. Basa nabi-la, kokolak pake Baal na'den-na, ma ala sene-do'ok neu sosongo-tatangok fo, sosoa-ndandaa taak-ka.”

YEREMIA 5:12

Manetualain anan-nala, lafa'da hata fo ta la'e fan, la'eneu Manetualain. Ala lafa'da lae, “Ah, neukose Ana ta tao hata-hata fa. Neukose soe ta la'e ita fa, ma neukose ita ta la'ola'di natee-natatik, do la'a-ndoes fa.

YEREMIA 5:2

Emi mafa'da mae emi sene-do'ok neu Manetualain, te se'kona emi dale dodoom-ma, ta leondiak fa.

YEREMIA 51:43

Kota-kota-nala da'di mamana bibik nan seli, sama leo moo loak ma'da-ka. Ta hapu hataholi fo tunga ndia ma nau leo nai na fa.

HOSEA 12:13

Yakob fo ita bei-ba'i kain-na, nalai leo Mesopotamia neu, boema soaneu hapu saoinak, de ana da'di ata neu hataholi manai naa-la, ma ana foo hataholi ndia bi'ilopon-nala.

HOSEA 13:4

Manetualain nafa'da nae, “Au nde Manetualain, fo emi Manetualaim-ma, nde noo emi kalua meme Masir mai. Emi ta manuu Manetualain fe'ek neme Au mai fa. Au nde emi manasoi-manatefam fo kisak.

AMOS 2:10

Au o falik emi kalua meme dae Masir-ra mai so, ma Au hela-nole emi teuk haahulu dalen-na neme moo solokaek-ka. Au fe hataholi Amori-la daen-na neu emi fo da'di emi nusam-ma.

MATEOS 4:16

Hataholi fo naso'da nai makahatuk dale a, Lita mangale'do mandela-masa'a ka so! Ba'eneu hataholi fo ana leo nai nusa makahatuk ma mamate sa dale ka, mangale'do ka sa'a na tii-to'da mai so!”

ULANGAN 1:19

“Boema, nandaa no ita Manetualain paletan-na, de ita la'oela Letek Sinai-a, boema ita la'ok tunga moo solokaek maloina, ma henuk no bibii-namata'uk-ka, ita teu leo hataholi Amori-la dae letelepan-na teu. Nai lelek ita losa Kades-Barnea boema,

ULANGAN 32:10

Ana nitas laleu-lalaak nai mamanak nee-nee lino-linok nai moo solokaek-ka. Boema Ana nasulu-nahapas ma nakabobois ma naneas sama leo Ndia pusakan-na.

ULANGAN 8:2

Mafandendelek leona! Te nai teuk haahulu dalen-na, emi Manetualaim-ma nauli-nalanga emi, nai emi leleo-lala'o dae doom-ma dalek, tunga moo solokaek-ka. Manetualain dudu'a basa leleo-lala'ok ndia, soaneu Ana so'ba emi, fo ela Ana nita beek nanape'dak nai emi dalem dale, ma ade neukose emi tunga paletan-nala do ta.

HAKIM-HAKIM 6:13

Boema Gideon nataa nae, “Ampon tuan! Metema tete'ek-ka, Manetualain no ami soona, tao le'e de, basa dede'ak ia-la tuni la'e ami? Basa manada'di beuk fo makahulun-na Manetualain tao hai-ka, nai bee, ma hata fo ami bei-ba'i kaim-mala tuin la'eneu, tao leo beek, de Manetualain kalua heni sila leme Masir mai? Besak ia, Manetualain la'oela ami so, de Ana po'ilotak hataholi Midian-nala, koasa ami.”