YEREMIA 16:16 - Susula Malalaok Hehelu Palak Ma Hehelu Beuk

¹⁶ Manetualain nafa'da nae, “Au sanga alo manadolu-dala ba'uk-ka soaneu ala ho'u-la hataholi-hataholi ia la. Basa soona neukose Au aloo-a manasopu-danga ba'uk-ka soaneu ala sapu-la sila nai basa letek-kala ma pupukuk-kala ma nai basa lea-luak-kala nai batu piak-kala.

YEREMIA 16:16 ပူးပေါင်းရင်းမြစ်များ

KEJADIAN 10:9

No Manetualain tutulu-fafalin, de ana da'di hataholi manasopu-manadanga malelaina. Hu ndia de, hataholi-a biasa nafa'da-nae, “Sa'di leo been-na, Manetualain tao o da'di manasopu-manadanga malelaina, sama leo Nimrod.”

YEREMIA 25:9

‘Neukose Au alo basa leoina manai neme ki mai-a, ma Au atang Nebukadnezar fo manek Babel-la boe. Neukose Au fe sila soaneu latee-latati la'ban Yehuda no laun-nala, ma basa leoina manai boboa-kaisun-nala. Leiona Yehuda no leoina titia-tatain-nala neukose Au tao akatoto'a-akatatak-kasa ma Au po'ilotak-kasa lakalulutuk soaneu losa dodoon-na. Hataholi fo manamitas-sala neukose ala nggenge-la ma lame'da bibi-namata'uk. Au, Manetualain nde manakokolak-ka.

YEREMIA 4:29

Solda'du manasa'e ndala-la, ma manakouk-kala nakoten-nala, nananamanenek, de taon-na, hataholi-a esa-esak nalai, de bafan ka'u-ka'u. Ala masok leo nula-la dalek leu, ma ala kae pupuku batu-la. Basa kota-la, ala da'di nee-nee lino-linok, hataholi ta nau leo nai ndia so'on.

YEREMIA 49:5

Neukose Au fe mei makata'ak neme basa boboak lala'ena. Neukose emi malai, esa-esa sanga enok kalua fo so'dak, ma ta hapu falik esa nakabubua emi so.

YEREMIA 6:9

Manetualain Fo Manakoasa, nafa'da au nae, “Neukose Israel-langan-na, nananggeupolik losa dilak, sama-na leo osi angol fo, seu basa angol-la boan-na so. Hu ndia de, lelek bei hapu fai loak soona, soi-tefa-mala bei elak-kala.”

RATAPAN 4:18

Ami ta hapu kalua leo enok lain meu fa, nana metema ami kalua soona, musu nook-ka maku ami tataas esa. Ami so'dam-ma sanga deka nate'e, nanahu ami faim-ma dai so.

RATAPAN 4:19

Manausi ami-la, lalaik lai-lai nanseli lai lena heni manupui kaka'ka. Ala usi ami nai letek-ka ma lapadei-la ami nai moo solokaek-ka.

HOSEA 10:10

Neukose Au sapu-a hataholi masala-masingok sila-la, fo Au hukus. Neukose leoina-la lakabubua, fo ala lena-la'ban-nasa, ma neukose sila nanahukuk, nanahu sala-singo makadoton sila-la.

AMOS 4:2

Au, Manetualain Fo Mademaina, nde been-na Manetualain fo malalao-malalafuk, ma Au helu basa ae neukose emi nanalele'a-lolosok nenik besi kakaik. Emi basa-basam-mala neukose sama leo i'ak-ka nai dolu isin-na.

AMOS 5:19

Heo-hilun sama leo hataholi fo nalai neme singa mai, tehu natongo no meoasu-a. Do sama leo, hataholi fo ne'un leo uma neu, de ana to'ba liman-na neu uma papala nanadaman-na, boema menge kaan!

MIKHA 7:2

Hataholi manatao tunga ndoon-na, mopok-kasa leme nusak-ka mai so, hataholi manalilinekak neu Manetualain-na, ta hapus so'on. Hataholi-la esa-esak nahani fai loak soaneu nanisa, esa-esak lona hihi'ik soane nonoo hataholin-na.

ZEFANYA 1:12

Nai faik ndia, neukose Au de'de obor, fo Au palisak lutu-lutuk kota Yerusalem-ma. Neukose, Au huku laun fo ta namahele te'e-te'e ndia fa, boema name'da-nana, dai so, ma hataholi fo ana dodoo nae Au, fo Manetualain ta la'iesa fo Ana ho'i nakeketuk leo iak do leonak boen.

SEMUEL SUSULAK-KA ESAN-NA 24:11

Besak ia, Ama Manek mita matam, na'kasa neme leak dale ndia, Manetualain, fe basa Ama Manek neu au so. Hataholi esa fufu'di-oodok basa atam-ma, fo taoisa Ama Manek, tehu atam-ma ta nau fa. Atam-ma nataa nae, atam-ma tau nau tao nahe'di atam-ma manen fo Manetualain helek-ka fa.

SEMUEL SUSULAK-KA ESAN-NA 26:20

Boso po'ilotak atam-ma mate nai dae nusa dea, fo dook-ka neme Manetualain mai. Sosoak hata, mane Israel-la mai, ka'da soaneu taonisa utu esa, sama leo atam ia? Sosoak hata, ana sopu atam-ma, sama leo hataholi-a sopu manu fuik-ka?”