ULANGAN 8:2 - Susula Malalaok Hehelu Palak Ma Hehelu Beuk

² Mafandendelek leona! Te nai teuk haahulu dalen-na, emi Manetualaim-ma nauli-nalanga emi, nai emi leleo-lala'o dae doom-ma dalek, tunga moo solokaek-ka. Manetualain dudu'a basa leleo-lala'ok ndia, soaneu Ana so'ba emi, fo ela Ana nita beek nanape'dak nai emi dalem dale, ma ade neukose emi tunga paletan-nala do ta.

ULANGAN 8:2 ပူးပေါင်းရင်းမြစ်များ

KEJADIAN 22:1

Basa teuk de'ubee boema, Manetualain fola Abraham namahehelen-na. Manetualain naloo nae, “Abraham!” Boema Abraham nataa nae, “Ou Manetualain.”

2TAWARIKH 32:31

Ma nai lelek hataholi nadedenuk-kala leme Babel mai fo latanen la'eneu ana lea-hai no kaiboik, Manetualain po'ilotak Hizkia nataa tunga dale hihii-nanau mesan-na, fo ela Manetualain hapu fola dalen-na.

2TAWARIKH 33:12

Nai doi-doson-na dalek, besak-ka ana nakaloe-nakadae aoinan-na neu Manetualain ma ana hule-haladoi noke tutulu-fafalik neun.

2TAWARIKH 33:19

Nai Nabi-la susula Tutuin dale boeo, nanasulak Manasye huhule-haladoin ma Manetualain natataan neu huhule-haladoik ndia, boema tutuik la'eneu sala-singok nai lelek ana beita tukatei-saledale fa, mamanak fo sene-do'ok neu sosongo-tatangok, ma ana taon-na lamatua daebafa Inak Asyera dodoki-dudulan-nala, ma sosongo-tatangok fo ana sene-do'ok neus-sala.

NEHEMIA 9:19

Tehu O ta la'oela fas, nai moo solokaek ndia fa, nanahu O henuk no susue-lalaik-ka. O ta fe'a heni dii ko'as-sa ma dii ha'ik-ka fa, manamatu'du sila enon-na nai fai lele'don-na ma fai le'odaen-na.

AYUB 33:17

Dudu'an-na nae, fo ela ala hahae tao sala-singok, ma ala tu'u-tapa heni, sila koao-ndaeaon-nala.

MAZMUR 103:2

Koa-kio Manetualain, hai au samaneng-nga, boso mafandele heni dale malolen lala'ena!

MAZMUR 106:7

Lelek ami bei-ba'i kaim-mala leme Masir-ra, ala ta lalelak fa; ala ta lalelak O tatao-nono'i matuainam-ma, sosoa-ndandaan fa. Ala lafandele heni, O susue-lalaim fo, manasasi kao-kaok-ka, ma ala la'ban Manetualain Fo Mademaina paletan-na, nai deka no Tasi Gelagah.

MAZMUR 136:16

Ana nauli-nalanga anan-nala, tunga moo solokaek-ka; susue-lalain manaketu-basa tak, losa dodoon-na.

MAZMUR 77:11

Boema au afa'da ae, “Ia nde nakahehe'dik au daleng-nga, nde nae Fo Mademaina, ta koasa so'on.”

MAZMUR 81:7

“Au so'uheni lelepa mabela neme emi alum lain mai so, ma se'iheni olik-ka neme emi limam-ma mai.

KELUARAN 15:25

Musa hule-haladoi te'e-te'e neu Manetualain, boema Manetualain natu'dun ai nggenggelok esa. Musa tapa ai ndia leo oe dale neu, boema oe ndia nasafali da'di oe mamis, nalosa bisa linun. Nai mamanak ndia, Manetualain fes nakanenetek-kala, ma Ana so'ba-su'dis nai mamanak ndia boe.

KELUARAN 16:35

Manna ndia, da'di hataholi Israel-la nana'an-na, nai teuk haahulu manamaik-ka, losa ala losa dae Kanaan, fo mamanak ala leo latea-lahele. (

KELUARAN 16:4

Manetualain nafa'da Musa nae, “Besak ia, neukose Au akona fe emi basa-basam-mala, nana'a-nininuk sasikao-kao, sama leo u'dan-na. Tunga faik, emi muse hele nana'ak sila-la dadaik faik esa dalen-na. No enok ndia, Au nau so'ba su'dik Au anang-ngala, ade ala tunga Au paletang-ngala do ta.

KELUARAN 20:20

Musa nataa nae, “Boso bii-mamata'u. Manetualain mai fo ka'da so'ba-sudi emi, fo ela emi tunga mahelen, ma ta tao sala-singok fa.”

AMSAL 17:3

Lilopilas ma lilofulak-ka, nanafolak nai ha'ikaak dale, tehu Manetualain fola hataholi-a dalen-na.

YESAYA 2:17

Hataholi manakoao-ndaeaok-ka, neukose nananakadadaek, ma hataholi fo namatutua-namadedema aon-na, neukose nanane'e nakatelek. Ka'da Manetualain mesak-kana, nde nananamatutua-namadedemak-ka.

YEREMIA 2:6

Au ta afaduli fa; Au fo, manahela-noles nai enok so, ma Au os kalua leme Masir mai la'ola'di moo solokaek-ka, dae tokotiik fo dopelele'un makadotok, boema tuuk, bai te henuk no soe-a – mook fo, nanaleo taak ma ta la'ok tunga fan!

YESKIAL 20:19

Au nde Manetualain, fo emi Manetualain-na. Tunga Au hoholo-lalaneng, ma Au paletang-ngala.

AMOS 2:10

Au o falik emi kalua meme dae Masir-ra mai so, ma Au hela-nole emi teuk haahulu dalen-na neme moo solokaek-ka. Au fe hataholi Amori-la daen-na neu emi fo da'di emi nusam-ma.

BILANGAN 14:33

Neukose, teuk haahulu dalen-na, emi anam-mala laleu-lalaak nai moo solokaek-ka. Hu kande, emi ta lilineka fa, de emi anam sila-la, neukose ala doi-doso losa hataholi mate'ek manai emi dalek-ka, maten so.

LUKAS 18:14

Yesus nae, “Mamahele leona, te nai lelek ala fali le'us leo uma leu te, Manetualain sipo ka nde manasusu bea ndia, te hataholi Farisi ndia fa. Nana basa hataholi fo namatutua-namadedema aoina na, neukose nananakaloloe-nakadadaek; ma basa hataholi fo nakaloe-nakadae aoina na, neukose nananamatutua-namadedemak.”

YOHANIS 2:25

Ta paluu hataholi nafa'da mangalele'do hataholi esa boen, la'eneu Yesus fa, nana Ana bubuluk basa hataholi daebafa ka dale na so.

ULANGAN 1:3

Nai hataholi Yahudi-la bula ka 11-na, fain esa nai teuk haahulu dalen, fo nai lelek leoina ndia la'oela Masir boema, Musa nanduku-nalosak basa hata fo Manetualain paletan soaneus.

ULANGAN 1:33

fo Ana la'ok nai emi uluk, soaneu Ana sanga fe emi mamana oofuk. Ana da'di manamatu'du enok ba'eneu emi, nai fai le'odaen-na, nai dii ha'ik dale, ma nai fai lele'don-na, nai dii ko'as dale.”

ULANGAN 13:3

boso taoafik neun. Nana emi Manetualaim-ma pake hataholi ndia, fo Ana mete, ade te'e-te'e, emi sue-lai Manetualain no emi dalek katematuam-ma do ta.

ULANGAN 2:7

Mafandendelek, tao leo beek de, emi Manetualaim-ma, fe emi baba'e-papalak nai basa hata lala'en fo emi tao-no'in. Nakaboboi emi, nai lelek emi maleu-malaak nai moo solokaek maloaina ia. Nasulu-nahapa emi, nai teuk haahulu ia dalen-na, ma Ana fe emi, basa hata lala'en fo emi paluun.

ULANGAN 29:5

Teuk haahulu dalen-na, Manetualain hela-nole emi, tunga moo solokaek-ka, tehu ta pulu-po'o emi bua papakem-ma, ma emi ta'bueim-ma fa.

ULANGAN 32:7

Mafandendelek le'do-fai makahulun-na, ma taoafik neu bobongik maneuk-kala. Matane emi ina-aman fo ela ala lafa'dan neu emi.

ULANGAN 7:18

Tehu emi boso bii-mamata'u leoina sila-la; mafandendelek, hata fo emi Manetualaim-ma nafa'da mane Masir-ra no laun-nala lala'en-na.

ULANGAN 8:16

Ana fe emi koki manna neme moo solokaek-ka, fo ana da'di emi nana'am, fo emi bei-ba'i kaim-mala, beita lalelak nana'ak ndia fa. Manetualain tao basa sila-la, fo Ana so'ba emi, ma Ana taon-na emi makaloe-makadae oam-mala, fo ela neu mate'en-na, Ana tao malole soaneu emi.

YAKOBIS 1:3

Nana emi bubuluk basa, metema emi mamahele mahele Lamatua ka, nai lelek fo emi matongo mo sosoba-susu'di ka soona, ninini na nde, emi makatatakak.

YAKOBIS 4:10

Ela leo bee na, emi makaloe-makadae ao ma, nai Amak Manetualain matan, fo besa ka Ana so'u namadedema emi.

YAKOBIS 4:6

Leomae leondiak boe, Manetualain susue-lalain fo Ana fen neu ita ndia, balakai na lena heni ita dale hihii na. Hu ndia de, nai Susula Malalaok dale boeo nanasulak nae, “Manetualain laban hataholi mana koao ka, tehu Ana sue-lai hataholi fo nakaloe-nakadae dale na.”

1 PETRUS 1:7

Dede'ak ia tetee-tutu'dan nde, fo ela ana da'di buti esa nae, ade te'e-te'e, emi mamahele Lamatua ka do ta. Lilopila sa hapu nalutun boeo, bei nanaso'bak ninik ha'i. Na, emi namahehele ma nde bee na, beli na lenaheni lilo pilasa, da'di muse so'ban boe, fo ela natea-nahele. Fo no enok ndia, neukose emi nanakoa-nanakiok, ma nanafe ha'da-holomata, boema nana namatutua-namadedemak nai faik fo Yesus Kristus fafali ma'i na.

NINITAK 2:23

Neukose Au taoisa la'iesak hataholi manatunga nala boe, fo ela basa salani kala lame'da lae, Au nde Ndia fo manabubuluk hataholi daebafa ka dudu'a-aafin ma dale nala. Neukose Au balas emi tunga emi esa-esak tatao-nono'in.

HAKIM-HAKIM 2:22

Neukose, Au pake leoina sila, fo Au fola leoina Israel-la, fo ela Au bubuluk, ade hataholi Israel-la, ana nau tunga Au paletang-ngala, sama leo sila bei-ba'i kain-nala do ta.”

HAKIM-HAKIM 3:4

Sila lai naa, soaneu da'di batu sak, ba'eneu leoina Israel-la. No enok ndia, besak-ka hapu bubuluk, ade leoina Israel-la tunga paleta, fo Manetualain fen tunga Musa, soaneu sila bei-ba'i kain-nala do ta.