ROMA 9:4 - Susula Malalaok Hehelu Palak Ma Hehelu Beuk

⁴ Tolanook sila nde bee na Manetualain hataholi kamahehelen nanahele kala ma Manetualain taos da'di ana mesa nala boema natu'du koasa na neus. Ana tao hehelu-balataak nos, ma Ana fes agama hoholo-lalanen. Manetualain nafa'das tao leo beek fo ala maso kasasi, ma ala sipo hehelu-balataa nala boe.

ROMA 9:4 ပူးပေါင်းရင်းမြစ်များ

KEJADIAN 15:18

Nai lelek ndia boe, Manetualain tao hehelu-balataak no Abram. Manetualain nae, “Au helu ae neukose, Au fe dae ia lala'en-na neu o tititi-nonosim, mulai neme too no nusa Masir-ra, losa Lee Efrat-ta,

KEJADIAN 17:10

O ma basa o tititi-nonosim-mala, muse sunat-tasa.

KEJADIAN 17:2

Neukose, Au tao hehelu-balataak no o, ma Au fe o tititi-nonosik makadotok.”

KEJADIAN 17:7

Neukose, Au tao atetu Au hehelu-balataang neu o, ma neu o tititi-nonosim-mala, neme bobongik leo bobongik neu, ma hehelu-balataak ndia, manaketu-basa taak. Neukose, Au da'di o Manetualaim-ma, ma o tititi-nonosim Manetualain-na.

KEJADIAN 32:28

Hataholi ndia, nataa nae, “O na'dem-ma, ta na'de Yakob so'on. Nana o maho'uk basa moo Manetualain ma moo hataholi daebafak-ka, de o sengi so; hu ndia de, o na'de Israel.”

1RAJA-RAJA 8:11

Ko'as ndia nandela-nansa'a neme Manetualain matua-mademan mamai na, nalosa basa imam sila-la ta hapu leo dalek leu seluk soaneu lakalala'ok sila bela-ba'un.

NEHEMIA 13:29

Au hule-haladoi ae, “Ou Manetualain, mafandele, tao leo beek de, hataholi sila-la tao langgenggeo na'de Imam-ma ma O hehelu-balataam no basa imam-mala ma hataholi Lewi-la!”

MAZMUR 147:19

Ana nanduku-nalosak hala hehelun-na neu anan-nala, nanduku-nalosak nakeketun ma hoholo-lalanen, neu ana hehelen-na.

MAZMUR 63:2

Ou Manetualain, au Manetualaing-nga nde O, au sanga ma ahiik O. Sama leo dae tokotik-ka, ana maa ma'da oe, leondiak boe, au maa ma'da neu O.

MAZMUR 73:1

Asaf Kokoa-kikion. Tete'ek-ka, Manetualain malole ba'eneu anan-nala, ba'eneu hataholi fo, dalen-na neuisik.

MAZMUR 78:61

Ana po'ilotak, musu nook-ka loso neni Peti Hehelu-balataan; ma Ana po'ilotak musu nook-ka loso-na ta'du-tana mandela-masa'an-na.

MAZMUR 89:3

Nana au bubuluk, O susue-lalaim manaketu-basa tak, losa dodo-na, O lilinekam matea-mahelek sama leo lalai-a.

MAZMUR 89:34

Tehu neukose, Au sue-lai ahele Dauk, ma neukose, Au ta alelesi Au lilinekang fa.

MAZMUR 90:16

Matu'du O tatao-nono'im neu ami fo atam-mala, ma O koasam fo neni namahoko-seteleek fe ami tititi-nonosim.

KELUARAN 12:25

Metema emi masok nusak fo Manetualain helu basan neu emi soona, emi muse tao feta ia.

KELUARAN 34:27

Manetualain nafa'da Musa nae, “Sulak-ma dede'a-kokolak sila-la, nanahu no dede'a-kokolak sila-la de Au tao hehelu-balataak no o ma no leoina Israel-la.”

KELUARAN 4:22

Boema, mafa'da manek ndia mae Au, Manetualain, helu ae leo ia, ‘Israel nde been-na Au ana ulung-nga,

KELUARAN 40:34

Basa boema, ko'as-sa kona mai, de ana potiketu Manetualain Lalaa Teman-na, de Lalaa Temak ndia henuk no Manetualain ndela-sa'an.

YESAYA 41:8

Tehu o, Israel, Au atang, fo Au ana heheleng-nga, o tititi-nonosik neme Au tia-laing Abraham mai.

YESAYA 46:3

Mamanene Au, hai Yakob tititi-nonosin-nala, emi basa-basam fo Au anang bei elak-kala lemin. Au akaboboi emi neme lelek bongi emi mai so.

YESAYA 5:2

Ana foi daen-na de ana tu'u heni batun-nala. Ana sele angol nanahehelek neun ana tao lalaa naneak Ana kali-na, bolok esa soaneu mamana hehe'e angon-na, boema nahani boan-na namalatu, tehu angol-la, boan-na makeis.

YESAYA 60:19

Ta paluu le'do mahaak-ka, la'e o nai fai lele'don-na fa, ma ta paluu bulak-ka, nasalaa la'e o, nai fai le'odaen-na. Nana Au fo Manetualain nde da'di mangale'do manaketu basa tak, ba'eneu o, Au asala ala o, nenik Au matua-mademang.

YEREMIA 31:20

Israel, o nde been-na Au anang susueng, anan fo nanasue-laik nai Au dale bobongo anang-nga. Tunga faik Au dodoki-aali O, tehu Au hii ka'da afandele neu o tatas esa. Neukose Au tao-a O henuk no susue-lalaik.

YEREMIA 31:33

Hehelu-balatak beuk-ka nde ia fo neukose Au taon neu hataholi Israel-la: Neukose Au tao Au hoholo-lalaneng nai sila dale bobongoanan-nala dalek ma Au sulak-kana neu sila dalen-nala. Neukose Au da'di sila Manetualain-na, ma neukose sila da'di Au anang-ngala.

YEREMIA 31:9

Ala la'ok no luu oen-nala titi beboto, Au tao amahokos ma Au le'a-noles. Au os tunga mamanak-mamanak fo oen-na ba'uk-ka, tunga mamanak fo enon-na matetuk fo neukose ala ta lakatunu fa. Ba'eneu Israel, Au soona nonokabai Amak-ka; Efraim nde been-na Au ana tou ulung-nga.”

YESKIAL 1:28

ma dula-na mata-matak, sama leo elus-sa. Mandela-masa'ak ndia, nde natu'du Manetualain mamain-na. Au ita manada'dik ndia boema, au tu'u atotonokala u dae lain. Boema au amanene halak-ka nafa'da nae,

HOSEA 11:1

Manetualain nafa'da nae, “Au sue-lai Israel neme lelek bei anan-na mai, Au aloo Au anang sila-la, kalua leme Masir mai.

BILANGAN 7:89

Metema Musa neu leo Manetualain Lalaa Teman dale neu, fo ana kokolak no Manetualain soona, namanene Manetualain kokolak non neme Peti Hehelu-balataak-ka tatanan lain mai, fo Peti Hehelu-balataak ndia, nai mahahae nusa so'da ka duak-kala dodoki-dudulan tala'da.

MATEOS 21:33

Boema Yesus nafa'das nae, “Mamanene seluk nakandandaak esa ia bai, dae lamatuak esa, ana sele osi angol esa. Ana pa'a feon, ma ana kali na bolok esa fo ala ka'bi ango la, oe na leo dalek neu, mate'e na, ana tao na lopo naneak esa. Basa ndia boema, ana fe osi angol ndia neu hataholi mana'a ngga'di nala seban, de ana la'o leo nusa fe'ek neu.

YOHANIS 1:17

Ita sipo Manetualain Hoholo-lalanen tunga Musa. Tehu lafa'da Manetualain susue-lalain, ma liinekan, tunga Yesus Kristus.

YOHANIS 1:47

Yesus nita Natanael mai boema, nafa'dan nae, “Mete mitak hataholi Israel matetu ka nde ndia. Ta nanasese'do-babalik fa.”

HATAHOLI 2:39

Nanahu hata fo Manetualain helu basan ndia nde bee na soaneu emi mo emi tititi-nonosi mala, boema soaneu hataholi manai mamana doo kala, fo nde hataholi fo ita Lamatuan Manetualain nalo basa kala.”

ROMA 3:2

Tao leo beeo, sosoa-ndandaan ba'uk-ka! Makasososa na, hu ka nde Manetualain fe dede'a-kokolan neu hataholi Yahudi la.

ROMA 8:15

Nana Manetualain fe emi Dula Dale ka, ana ta tao emi da'di ata fo emi maso'da nai ka'da bibii-namata'u ka dalek fa. Dede'a nasafali na, Manetualain Dula Dale na, ana tao emi da'di Manetualain anan. Boema no Manetualain Dula Dale na koasan ndia de, ita talo Manetualain soona tae, “Ama, ou au Ama nga!”

ROMA 9:6

Au ta dudu'a ae, Manetualain hehelu-balataa na, ta paken so'on; tehu Manetualain ta hele basa hataholi Israe la, da'di hataholi kamahehelek fa.

2 KORINTUS 11:22

Metema sila lamatutua-lamadedema ao nala da'dileo hataholi Ibrani soona, au boeo hataholi Ibrani. Metema sila lamatutua-lamadedena ao nala da'dileo hataholi Israel soona, au boeo hataholi Israel. Metema sila lamatutua-lamadeema ao nala da'dileo Abraham tititi-nonosin soona, au boeo leondiak!

GALATIA 3:16

Manetualain tao hala hehelu nala soaneu Abraham, ma basa hataholi fo Abraham tititi-nonosi nala. Nai Susula Malalaok dale, ala ta sulak lae, “ma soaneu hataholi-hataholi fo Abraham tititi-nonosin fa”, fo sosoa na nae, hataholi makadotok. Te nai Susula Malalaok dale, nanasulak nae leo ia, “ma soaneu o tititi-nonosim”, fo sosoa na nae, ka'da hataholi esa mesa kana, fo nde Kristus.

EFESUS 2:12

Nai lelek ndia, emi ta da'di esa mo Kristus fa. Emi nde bee na, hataholi manamai, fo emi ta masok nai Manetualain hataholi kamahehele nala dalek fa. Emi ta masok nai Manetualain hehelu-balataan fo Ana taon no hataholi kamahehele nala dalek fa. Emi maso'da nai daebafa ka, ta no namahehenak ma ta no Manetualain.

ULANGAN 14:1

“Emi nde been-na, Manetualain anan. Da'di, nai lelek emi hataholim esa mate, fo emi falu soona, boso tao makahina emi aoinam-ma, do emi nggeuheni emi langadoom manai emi dedeim-ma nisi lain-na, sama leo leoina fe'ek-kala tataon-na.

ULANGAN 29:1

Dede'a-kokolak hehelu-balataak ia-la nde, no Manetualain paletan-na de, Musa taon no leoina Israel-la, nai lelek bei leme dae Moab-pa. Hehelu-balataak sila-la, nalupa tatamak neme hehelu-balataak fo Manetualain taon no leoina Israel-la, neme Letek Sinai-a.

ULANGAN 29:14

Manetualain tao hehelu-balataak ndia no basa bela-ba'un, ta ka'da no emi mesam-ma fa,

ULANGAN 31:16

Manetualain nafa'da Musa nae, “O mamatem-ma deka so. Mate o soona, leoina Israel-la, ta lilineka neu Au so'on, ma lafandeleheni hehelu-balataak fo, Au taon no sila. Neukose, ala la'oela au, fo ala sene-do'ok neu lamatua daebafak manai nusak fo, ta dook-ka so'on te, emi masok mala dalek ndia.

ULANGAN 4:13

Ana po'a-benga neu emi, neme naa mai, la'eneu hata fo emi muse tao-no'in, soaneu emi tao matetu hehelu-balatak fo Ana taon no emi-a. Ana sulak basa Paleta ka 10-kala, neu batu lei ka duak-kala lain ndia, emi muse tao tungan.

ULANGAN 7:6

Emi muse tao basa sila-la, nanahu emi Manetualaim-ma, nuun emi. Ma neme basa leoina manai daebafak-ka lala'en-na, emi Manetualaim-ma, Ana helek-ka nde emi, soaneu emi da'di Ndia anan, fo malalao-malalafuk.

IBRANI 9:1

Hehelu-balataa makasososa ka nanuu mamaso-kasasi nakanenete nala, ma la'eneu mamana hule-haladoik fo hataholi daebafa ka tao ka boe.

IBRANI 9:10

Nanahu basa ito-atok sila la, nandaa no ka'da nana'a-nininuk, ma tao nalalao ao mata-mata kala mesa kana. Basa sila la ka'da nakanenete ao paak, fo nanapakek ka'da losa fai na Manetualain tao nabebeun.

IBRANI 9:3

Nai dalek, fo nai tema maloa kama kadua dea na, hapu kama esa nai ndia, fo ala foi kama ndia na'de, Kama Malalao-Malalafuk.

IBRANI 9:5

Nai Peti ndia lain, hapu mahahae mali'dak dua, fo duas da'di neu ta'du esa nae, Manetualain nai mamanak ndia. Mahahae kaduak sila la, li'da nala lakapepela ketu basa Peti ndia tatana na, fo sala-singo kala nanafe do'o do ampon nai mamanak ndia. La'eneu dede'ak ia, besak ia ita beita hapu tafa'da mangalele'do dede'ak ndia fa.

IBRANI 9:6

Ala ito-ato tao uma mamasok ndia dale na leondiak. Tunga-tunga faik, ima mala leu leo uma lopo ndia kaman manai mata dalek leu, fo lakalala'ok sila bela ba'un nai ndia.