ROMA 12:1 - Susula Malalaok Hehelu Palak Ma Hehelu Beuk

¹ Tolano-tolanoo ngala lemin! Manetualain malole na ba'u na seli neu ita. Hu ndia de au oke anseli fo ela leo bee na, emi fe emi so'da ma da'dileo tutunu-hohotu maso'da hehelik soaneu Manetualain fo nandaa no dale na. Emi huhule-haladoim neu Manetualai na, muse leondiak.

ROMA 12:1 ပူးပေါင်းရင်းမြစ်များ

MAZMUR 116:12

Au fe Manetualain beek, fo balas dale malolen-na ba'eneu au?

MAZMUR 19:14

Madook au neme sala-singok fo au taon no nameme'dak, boso po'ilotak sala-singok ndia, ana koasa-na au. Soona au da'di hataholi sala tak, ma au atapo'i eme sala matuaina mai.

YESAYA 56:7

“Neukose Au o emi leo Sion, leo Au pupukung fo, malalao-malalafuk-ka neu, ma Au fe namahoko-seteleek, nai Au uma mamasong-nga Tutunu-hohotuk fo, emi tunu-hotun nai Au mei tunu-hotung lain-na, neukose Au sipok-kana. Neukose loke Au Umang-nga soona lae, uma huhule-haladoik soaneu leoina lala'en-na.”

YEREMIA 6:20

Sosoak hata, sila leni fe Au boomenik neme Syeba mai, do bumbu-bumbu-la leme nusa dook mai? Au daleng-nga ta hii sipo sila tunu-hotun fa. Au ta hii sila tutunu-hohotu nanatunun-na fa.

HOSEA 14:2

Hai leoina Israel-la lemin, fali me'um-ma leo emi Manetualaim-ma meu leona! Emi sala-singom tao-na emi kosik, de emi tu'u meu.

LUKAS 7:47

Te'e-te'e, susue-lalain fo matuainan ndia, natu'du nae sala-singo makadoto nala, nanafe do'o do ampon so! Metema hataholi a nanafe do'o do ampon faa anak soona, neukose susue-lalain faa anak boe.”

ROMA 12:2

Boso tunga daebafak ia, ha'da-tataon. Neme na fo Manetualain tao na emi ha'da paliin da'di beuk, fo ela emi tukatei-saledale. No enok ndia, besa ka emi malelak matalolole Manetualain hihii-nanaun, fo nde, bee ka nde malole ma bee ka nde nandaa no dale na ma matetu-mandaa ka.

ROMA 15:16

Ana tao au da'di Kristus malalau-maoonon fo nadenu au u leo leoina ta Yahudi la u. Ma au alalau-aoono da'dileo imam fo tui-benga Manetualain Hala Malole na neu hataholi ta Yahudi la fo ala da'di tutunu-hohotuk neu Manetualain fo Ana sipo kasa. Ela leo bee na, Manetualain Dula Dale na tao nalalao-nalalafus fo ala da'di tutunu-hohotu malalaok soaneu Manetualain.

ROMA 15:30

No ita Lamatuan Yesus Kristus na'de na, ma no Manetualain Dula Dale na fe susue-lalai ka, au oke anseli neu emi, ela leo bee na emi hule-haladoi te'e-te'e sama-sama mo au neu Manetualai soaneu au.

ROMA 2:4

Do emi ka'da makadadaek Manetualain dale malole na ma nggange loa na boema dudu'a manalu matuaina na ta nde ndia fa do? Tao leo beeo emi bubuluk basa, Manetualain natu'du susue-lalain nana Ana nau fo ela emi tukatei-saledale meme emi sala-singo mala mai.

ROMA 6:13

Boso fe emi ao paa ma neu sala-singo ka fo ana paken, soaneu tao-no'i tatao-nono'i mangalau ka. Te fe emi so'da ma leo Manetualain neu, sama leo hataholi manalali neme mamate sa leo maso'da ka dalek neu. Fe la'iesak emi so'da ma leo Manetualain neu, fo Ana paken soaneu makalala'ok hihii-nanaun.

ROMA 6:16

Emi bubuluk basa, metema hataholi esa paleta emi tunga hataholi ndia dale hihii na soona, emi da'di ata neu hataholi ndia so, ta bubuluk emi da'di sala-singo ka atan fo no emi leo mamate sa dalek meu, do emi da'di ata fo tunga Manetualain, fo no enok ndia, emi malole falik mo Manetualain.

ROMA 6:19

Hu ka nde emi malela ma beita dai fa de, au pake dede'a ata ndia, fo ana da'di natutu'duk esa soaneu emi, fo sue kande emi malelak sosoa-ndandaan lai-lai. Makahulu na tatao-nono'i manggenggeok ma tatao-nono'i mangalau kala, ala tao emi da'di ata soaneu tao tatao-nono'i mangalau kala. Leondiak boe besak ia, ela leo been-na emi fe la'iesak emi so'da ma neu Manetualain fo da'di ata soaneu tunga hihii-nanaun.

ROMA 9:23

Manetualain boeo dodoo soaneu natu'du ita ua-nale manasasi kao-kao ka Ana po'an neu ita fo Ana sue-lai ka. Ana sadia basa ita soaneu sipo ua-nalek ndia so.

1 KORINTUS 1:10

Tolano-tolanoo ngala lemin! No ita Lamatuan Yesus Kristus na'de na, au oke fo ela emi basa-basa mala teikesa dalekesa; fo ela nasi'da-naba'e ka, boso da'di nai emi dalek. Ela leo bee na emi da'di esa, teikesa dalekesa, ma dudu'a-aafik esa.

2 KORINTUS 10:1

Besak ia, au fo Paulus nau uni hata esa soaneu emi. Au ia, tunga hataholi a nafafa'da na au mangana'uk metema au asasalematak o emi, tehu au apalani, metema ita komododoon. Naa, hu ka nde Kristus mangana'u na ma Kristus dale malole na,

2 KORINTUS 4:1

Ami ho'u ue-le'dis ia nanahu Manetualain dale malole na. Hu ndia de ta ketu ami namahehena ma fa.

2 KORINTUS 4:16

Hu ndia de, ta ketu ami namahehena ma fa. Leomae tunga ao paa ka soona, boetai nakalulutuk, tehu tunga samane ka soona, ami nanatao nabebeuk tunga faik.

2 KORINTUS 5:20

Da'di ami ia nde bee na, Kristus hataholi nadedenun. Manetualain nanduku-nalosak hala hehelu na, tunga ami. No Kristus na'de na, ami dokodoe manseli neu emi, fo sipo ma Manetualain dale susue na, fo nini fe emi malole falik mon.

2 KORINTUS 6:1

Hu ka nde ami maue-male'di sama-sama mo Manetualain de ami dokodoe manseli fo emi boso makamiminak Manetualain dale malolen ndia.

EFESUS 4:1

Hu ndia de au hataholi nanatahan esa, fo nanatahan, hu ka nde au alalau-aoono Lamatua ka au oke alan seli neu emi: fo ela emi so'da ma natetu-nandaa no emi nangatutuu ma, da'dileo hataholi fo Manetualain nalo basan so.

EFESUS 5:10

Sanga enok fo malelak hata fo nandaa no Lamatua ka dale na.

ULANGAN 14:2

Emi nde been-na, emiManetualaim-ma nuun emi; neme basa leoina fo manai daebafak ia lala'en-na, emi nde, Manetualain helen, soaneu da'di Ndia anan-nala.”

FILIPI 1:20

Fo au ahiik ma au amahena ka nde, fo ela au ue-osang nini buna-boak. Dede'a nasafali na, au amahena fo ela tunga faik, lena-lenak besak ia, au apalani, nalosa no au ao paa samaneng nai lelek fo au aso'da do au mate boeo Kristus nanakoa-kiok.

FILIPI 2:17

Fafa'kama neukose ala taolisa au, fo daenga au daa nga da'di sama leo tutunu-hohotuk fo nanapo'ak neu hata fo emi fen neu Manetualai na, fo ana da'dileo ta'du-tana nae, emi mamahelen. Metema memak muse leondiak soona, au oke makasi neu dede'ak ndia ma au amahoko o emi.

FILIPI 4:18

Au sipoalas te see ko na dai ma lena! Emi haitua fe au basa tutulu fafali kala, au sipo alas neme Epafroditus mai so. Besak ia, au hapu basa hata fo au paluu ka so. Emi fe feem sila la, sama leo tutunu-hohotu kaboo minik esa, fo ala fen leo Manetualai na neu de, Manetualain sipo nan no namahokok.

1 TESALONIKA 4:1

Tolano-tolanoo ngala lemin! Mate'e na, ami fe basa emi natutu'duk la'eneu emi muse maso'da tao leo beek fo, nandaa no Manetualain dale na. Memak emi maso'da leondiak so. Tehu besak ia, no Lamatuak Yesus koasa na, ami moke manseli, ma ami makaseti emi, fo ela emi boetai sanga enok seluk, nai basa dede'ak sila la dalek.

1 TESALONIKA 4:10

Nana emi matu'du basa susue-lalaik ndia neu emi tolanoom manai Makedonia la so. Tehu tolano-tolanoo ngala lemin, ami moke manseli, fo ela emi so'da ma, ana da'di malole seluk bai.

1 TESALONIKA 5:12

Tolano-tolanoo ngala lemin! Ami manoli-mafa'da emi, fo daenga emi fe ha'da-holomta neu hataholi mana maue-male'di fe emi, fo nde hataholi fo Lamatua ka hele basas, soaneu lauli-lalanga ma lanoli-lafa'da emi a.

1 TIMOTIUS 2:3

Ndia nde malole ma nandaa no Manetualain, fo ita mana Soi-Tefa na, dale na.

1 TIMOTIUS 5:4

Tehu metema inafalu bee maupu-anak soona, manoli-mafa'da upu-anan sila fo ala taoafik matalolole ina-ama bei ba'in sila la so'da na, nana sila muse balas sila ina ama bei ba'in, dale malole na. Tatao-nono'i leondia ka nde nandaa no Manetualain dale na.

FILEMON 1:10

Au fo Paulus, au oke dede'ak esa ia, neme o mai, la'eneu Onisimus fo au ana susueng nai Kristus dalek. Nana nai tahanan ia dalek, au da'di ndia ama mana hela-nolen, nai namahehelek soaneu Kristu sa.

FILEMON 1:9

Tehu, hu ka nde au sue-lai tolanoo ka de, ka'da au oke mesan ia. Au lasik esa, ma besak ia au nanatahan nai bui dale, nana au tui-benga Kristus Yesus.

IBRANI 13:22

Au dokodoe, fo ela emi taoafik neu au nanoli-nafadang ia, no boso haelai mamanasa, nanahu au susulang ia, ta manalu nanseli fa.

1 PETRUS 2:20

Nanahu, ade malole na nde bee, metema emi makatatakak nai huhukuk fo emi lu'a-lepak ndia, nanahu emi sala ma? Tehu metema emi doidoso, hu ka nde emi tao ndoos, soona neukose Manetualain fe emi baba'e-papalak.

1 PETRUS 2:5

Emi sama leo batu maso'dak. Hu ndia de, ela leo bee na emi nau nanapakek soaneu mafofo'a Manetualain Uma samane na. No enok ndia, emi da'di imam, fo emi maso'da hehelik soaneu Manetualain, ma tunga Yesus Kristus, de emi fe tutunu-hohotu samanek neu Manetualain, fo nandaa no Manetualain dale na.