MAZMUR 62:10 - Susula Malalaok Hehelu Palak Ma Hehelu Beuk

¹⁰ Hataholi daebafak-ka, ka'da ani hahaek esa mesan, ana matua, beli tak mesa-mesan. Metema tain soona, emi da'uk-ka, da'uk-ka lena heni, ani hahaek esa.

MAZMUR 62:10 ပူးပေါင်းရင်းမြစ်များ

AYUB 20:19

Nana ana tuni-ndeni, ma ana taon-na, hataholi nuu-taak-ka natofa-natalak; ana loso-na uma fo, ndia ta nde taon-nana fa.

AYUB 20:29

Hataholi mangalauk-ka, ua-nalen nde ndia, ua-nalek fo, Manetualain naketun ba'eneun.”

MAZMUR 39:6

O maketu au teung-nga, keke'uanak nanseli! Ba'eneu O soona, au so'dang-nga sosoa-ndandaan ta. Tete'ek-ka, hataholi daebafak-ka sama leo ka'da ani hahaek-ka,

MAZMUR 4:3

Hai hataholi-la lemin, bei doo bee seluk bai, fo emi makadadaek au Manetualaing-nga? Emi sue-lai hata mana da'di tak-ka ma usi hata fo, ta ndoos-sa fa, losa fai hi'da?

MAZMUR 49:6

Au tabii-amata'u nai lelek au nai toto'a-tataak-ka dalek, ma nai lelek musu mangalauk-ka nakahapi-na au.

MAZMUR 52:7

Tehu neukose, Manetualain tao namopo-namate o, losa dodoon-na; o nanaho'u-nak ma nanalele'a-lolosok neme o umam mai, ma nanatao namopo-namatek neme hataholi maso'dak-ka, daebafan-na mai.

MAZMUR 91:14

Manetualain nafa'da nae, “Hataholi manasue-lai Au-a, neukose Au soi-tefan, ma manamanaku Au-a, neukose Au asulu-ahapan.

AMSAL 23:5

Nana o hata-hetom, bisa mopok-kasa, ka'da nai hatematak esa mesak-kana, nono'kabai malidak, de ana laa sama leo manupui kaka'ka laa leo lalai neu.

YESAYA 28:15

Emi mafa'da basa, mae emi tao hehelu-balatak mo mamates-sa, ma emi mala halak mo hataholi manamatek-kala, daebafan-na. Emi mame'da mae tao leo bee-o, soe fo manamaik ndia, neukose ana ta tuni la'e emi fa, nanahu emi pake eno tipu-daik, soaneu masulu-mahapa emi aoinam-ma.

YESAYA 30:12

Hu ndia de, Israel Manetualain malalao-malafun-na, nafa'da nae leo ia, “Emi ta sipok Au dede'a-kokolang fa, de emi masalai emi deam-ma neu tuni-ndenik-ka, ma tipu-daik-ka.

YESAYA 40:15

Ba'eneu Manetualain soona, leoinak-kala, sama leo oe titik esa nai haik dale, sama leo afu faa anak nai tatais lain; nusak-kala, da'uanak sama no afu sopuk-ka.

YESAYA 40:17

Basa leoinak-kala, sosoa-ndandaan ta, ba'eneun, nono'kabai, hata ta nai matan-na fa.

YESAYA 47:10

O mame'da, o dalem-ma tesa-tama nai o tatao-nono'i mangalaum-ma dalek, o dodoo mae, o tatao-nono'im, nanataoafi tak. O manatee-tenom-ma, ma o malelam-ma, ana taon-na o, matofa-matalak, o maedaenga, ta hapu hata, fo sama leo o fa.

YESAYA 59:4

Emi kalaak dede'ak, te ne'ek ta, ma maketu-mala'di no ta ndoos ma matetuk fa. Emi masapepeko-masandandali ma emi matea-mahele neu hata fo, manada'di tak-ka; emi manuu dale tutu'uk, soaneu tao soe hataholi fe'ek, ma tao tatao-nono'i mangalauk.

YESAYA 61:8

Manetualain nafa'da nae, “Au sue-lai ndoos ma matetuk-ka, ma akamuu-akadau tuni-ndenik, boema tatao-nono'i magalauk-ka. Neukose Au bae o ngga'dim-ma, no lilinekak, ma tao hehelu-balataa manaketu basa taak-ka o emi.

YEREMIA 13:25

Au aketu basa emi ua-nalem-mala leondiak so, nanahu emi mamahele neu lamatua daebafak masapepekok-kala.

YEREMIA 17:11

Nonokabai manupui lu'u tolok fo ndia nuun ta ndia fa, hataholi fo ta manatao ndos-sa fa hapu hata-heton soona, tatao-nono'in leondiak. Ka'da nai fai keke'uanak mesak-kana neukose namopo basa hata-heton-nala. Nai so'dak fai makabuin-na te butin-na nae ndia hataholi fo nggoak nanseli.

MARKUS 10:23

Boema Yesus mete ana mana tunga nala de nafa'das nae, “Sosotak la'iesa kana soaneu hataholi kamasu'i ka, ana da'di Manetualain hataholi kamahehelen!”

1 TIMOTIUS 6:10

Nana neme dale he'di doi ka mai de, basa tatao-nono'i mangalau mata-mata kala, ala da'di. Hapu hataholi nggelok, ala usi ka'da doi ka de, ala ta nau tunga hataholi Salani ka nanoli nala so'on. Hu ndia de, doidoso ka tao nakalulutuk dale nala.

1 TIMOTIUS 6:17

Ba'eneu hataholi kamasu'ik manai daebafak ia la, ela leo been-na, mafa'das fo ala boso koao ma boso lamahena neu hata-heto mana sapu-lalok sama leo su'i-bete sa. Sila muse lamahena neu ka'da Manetualain fo mana po'a-ngganga basa hata lala'ena fe ita, fo ta'a pake.