MATEOS 6:9 - Susula Malalaok Hehelu Palak Ma Hehelu Beuk

⁹ Hu ndia de, metema emi hule-haladoi soona mae leo ia, ‘Ou, Ami amam manai nusa so'da ka: O nde Manetualain fo Kisak Ela leo bee na. Lakaluku-lakatele ma ala fe ha'da-holomata neu O.

MATEOS 6:9 ပူးပေါင်းရင်းမြစ်များ

2 SEMUEL 7:26

Neukose, hataholi-la lamatutua-lamadedema O na'dem-ma tataas esa, su'di nai mamanak bee boe, ma lafa'da lae, ‘Manetualain Fo Manakoasa nde been-na, Manetualain soaneu Israel.’ Boema, hataholi esa neme au tititi-nonosing mai, neukose ana paleta da'di leo manek neu leoina ia, losa dodoon-na.

1RAJA-RAJA 8:43

ela leo been-na, neme O mamana leleom manai nusa so'dak-ka, O mamanene hule-haladoin ma O sipok nonoken-na. No enok ndia, basa leoina manai daebafak-ka lala'en-na lalelak O ma ala tunga O sama leo O anam Israel. Neukose ala bubuluk lae uma fo au afofo'ak ia nde been-na mamanak soaneu hule-haladoi neu O.

1 TAWARIKH 17:24

Su'di nai bee boe, neukose hataholi a namatutua-namadedema O na'dem ma tataasesa ma nafa'da nae, ‘Manetualain Fo Manakoasa, ndia nde Manetualain neu Israel.’ Soaneu losa dodoona, hataholi esa neme au tititi-nonosing mai, neukose ana paleta da'di leo manek.

2TAWARIKH 20:6

de ana hule-haladoi no napane'e hala-na nae, “Ou Amak, fo ami bei-ba'i kaim-mala Manetualain-na! O Manetualain manai nusa so'dak-ka, ma manapaleta basa leoina lala'en-na nai daebafak-ka. O manakoasa ma mabe'i-balakai; ta hapu hataholi esa boen fo nabe'i la'ban O.

NEHEMIA 9:5

Hataholi Lewi-la nde mulai nakaluku-nakatelek ndia. Hataholi Lewi sila-la nde: Yesua, Kadmiel, Bani, Hasabneya, Serebya, Hodia, Sebanya ma Petahya. Lafa'da lae, “Fo'a mapadeik fo koa-kio Manetualain fo ita Manetualain-na! Fe kokoa-kikiok neun losa dodon-na neu! Koa-kio na'den fo henuk no mandela-masa'ak, na'dek fo maneni-mafa'dak, lena heni basa koa-kiok lala'en-na!”

MAZMUR 111:9

Ana soi-po'i anan-nala, de Ana tao hehelu-balataak manaketu-basa tak nos. Ndia nde Manetualain fo malalao-malalafuk, ma makadelek!

MAZMUR 115:3

Ita Manetualain-na, nai nusa so'dak-ka, Ana tao hata fo, nahiik-kana.

MAZMUR 72:18

Kokoa-kikiok ba'eneu Amak, fo Israel Manetualain! Ka'da Ndia nde manatao dede'a matuaina-la.

YESAYA 37:20

Ou, ami Manetualain po'i ami neme hataholi Asyur sila-la mai, fo ela basa leoina manai daebafak-ka lala'en-na, ala bubuluk lae ka'da O mesa-mesam-ma nde Manetualain-na.”

YESAYA 57:15

Nana Manetualain Fo Mademaina, ma malalao-malalafuk, fo manakoasa losa dodoon-na, nafa'da nae leoia, “Au leo nai mamana mademaina, ma malalao-malalafuk, tehu, nai hataholi dale taidaek-kala, tala'da, ma nai hataholi manatukatei-saledale leme sala-singon-nala mai, fo daenga tao labebeu sila manggaten, ma namahehenan-na, tala'da boe.

YESAYA 6:3

Esa naloo bou-bou neu esa nae, “Malalao-malalafuk, Malalao-malalafuk, Malalao-malalafuk. Manetualain Fo Manakoasa, malalao-malalafuk. Daebafak-ka, henuk no mandela-masa'an.”

YESAYA 63:16

Ade, O ta nde ami Amam fa do? Abraham ma Yakob, ta lalelak ami fa. Tehu O, ou Manetualain, O nde been-na, ami Amam, ami Manasoi-manatefam, neme makahulun eli mai.

YESAYA 64:8

Tehu O, ou Manetualain, O nde been-na, ami Amam, ami ka'da dae manuteik mesan, ma o nde fe lupak neu ami; ami basa-basam-mala nde been-na, O lima tataam.

YESAYA 66:1

Manetualain nafa'da nae, “Lalai-a nde been-na, Au kandela maneng-nga, ma daebafak-ka, Au ei tata'bung-nga. Da'di, uma matak leo beek-ka nde, o sanga mafofo'an soaneu Au, ma mamana matak leo beek-ka nde, o sanga taon da'di Au mamana leleong-nga?

YESKIAL 36:23

Neukose Au atu'du Au na'de malalao-malalafung matuainang ndia, na'dek fo emi tao manggenggeon nai leoina-kala tala'da, soona besak-ka ala bubuluk, Au nde Manetualain-na. Au, Manetualain Fo Mademaina, nde manakokolak-ka. Neukose Au pake emi, fo emi matu'du leoina-kala, mae Au ia, malalao-malalafuk, Manetualain Fo Malalao-malalafuk nanseli.

YESKIAL 38:23

No enok ndia, neukose Au atu'du neu basa leoina lala'en-na, ae Au ia matua-madema, ma malalao-malalafuk. Soona besak-ka ala bubuluk, lae Au nde Manetualain-na.”

IMAMAT 10:3

Boema Musa nafa'da Harun nae, “Manetualain dale dodoon-na nde ndia, nai lelek nafa'da nae, ‘Basa manamalalau-maoono Au-a, muse fe ha'da-holomata neu Au malalao-malalafung. Neukose, Au atu'du Au matua-mademang neu basa Au leoinang-nga lala'en-na.’ ” Tehu, Harun ka'da denge-denge.

HABAKUK 2:14

Tehu sama leo oe henu tasi-a, leondiak boe daebafak-ka, neukose henuk no malelak la'eneu Manetualain, ma koasan-na.

ZAKHARIA 14:9

Boema neukose, Manetualain Ana paleta da'dileo manek neu basa daebafak-ka lala'en-na; basa hataholi-a, neukose sene-do'ok neun, da'di leo Manetualain, ma lalelak-kana nenik na'dek sama.

MALEAKHI 1:11

Basa leoina manai daebafak-ka lala'en-na, ala fe ha'da-holomata neu Au. Ala tunu boomenik, su'di nai bee-bee boe, fo ala fe ha'da-holomata neu Au na'deng-nga, ma ala tunu-hotu tutunu-hohotuk-ka nandaa, nana basa leoina-la, ala fe ha'da-holomata neu Au!

MATEOS 10:29

Hapu asa manupui daiana dua ninik doi sen kome'do ana esa. Tehu leomae leondiak boe, manupui anak sila la, esa boeo, ana ta tu'da leo dae neu fa, metema emi Amam manai nusa so'da ka, Ana ta nau fa.

MATEOS 23:9

Ma emi boeo boso maloo hataholi esa nai daebafak ia mae, ‘Ama’, nanahu emi Amam ka'da esa mesa kana, fo nde Amak manai nusa so'da ka.

MATEOS 26:29

Mamahele leona: te neukose Au ta inu angol ia seluk so'on, losa lelek fo Au inu angol beu ka, sama-sama o emi nai Au Amang Daebafa Beu na dalek.”

MATEOS 26:42

Boema Yesus neu hule-haladoi la'i esa seluk nae, “Ama, metema doidosok ia, Au muse la'o la'din, ma ta hapu tao nadoo kana fa soona, neme na fo Ama hihii-nanaun da'di leona.”

MATEOS 5:16

Leondiak boe emi muse da'di mangale'dok nai hataholi a matan, fo ela lita emi tatao-nono'i malole ma, fo no enok ndia, hataholi a hapu koa-kio emi Amam manai nusa so'da ka.”

MATEOS 5:48

Emi Amam ma nai nusa so'da ka boeo, Ana sue-lai basa hataholi lala'ena no matetu-mandaak. Hu ndia de emi boeo muse tao leondiak.”

MATEOS 6:14

Makanaema emi fe do'o do ampon neu hataholi mana tao salak neu emi soona, neukose emi Amam manai nusa so'da ka boeo, Ana fe do'o do ampon neu emi sala-singo mala.

MATEOS 6:6

Tehu metema emi hule-haladoi soona, meu leo kama dale meu, fo kena lelesu a neu, fo hule-haladoi neu emi Amam fo nananita tak ndia. Soona emi Amam fo manai nusa so'da ka, nita emi tatao-nono'i nafunim ndia, de neukose Ana fe emi ngga'di.

MATEOS 7:11

Leomae emi ia, hataholi mangalau kala boe, tehu emi boeo bubuluk fe hata malole neu emi ana mala boe. Muda hata no emi Amam manai nusa so'da ka bai! Neukose Ana fe hata malole neu hataholi manoke neu na.

LUKAS 15:18

Malole lenak au fali no lai-laik fo au afa'da au amang ae, Ama, au asala-asingo basa neu Manetualain ma neu Ama so.

LUKAS 15:21

Boema ni'iana ndia nafa'da aman nae, ‘Ama, au asala-asingo basa neu Manetualain ma neu Ama so. Au ta andaa da'di Ama anan so'on.’

LUKAS 2:14

“Koa-kio Manetualain, fo manai lalai mademaina! Ma nai daebafa ka poi na, mole-dame ba'eneu hataholi daebafak, fo mana tao lamahoko Manetualain dale na!”

YOHANIS 20:17

Boema Yesus naen nae, “Boso taila'e Au dei, te Au beita kae leo Ama ka u fa. Tehu fali mu'u ma leon, fo mafa'da Au tolanoon gala mae, besak ia Au kae falik leo Au Ama nga ma o Amam, ma Au Manetualai nga ma o Manetualai ma.”

ROMA 1:7

Hu ndia de, au sulak fe emi susulak ia. Ela leo bee na, ita Aman Manetualain ma Lamatuak Yesus Kristus, fe emi baba'e-papalak ma mole-dame.

ROMA 8:15

Nana Manetualain fe emi Dula Dale ka, ana ta tao emi da'di ata fo emi maso'da nai ka'da bibii-namata'u ka dalek fa. Dede'a nasafali na, Manetualain Dula Dale na, ana tao emi da'di Manetualain anan. Boema no Manetualain Dula Dale na koasan ndia de, ita talo Manetualain soona tae, “Ama, ou au Ama nga!”

GALATIA 1:1

Tolano-tolanoo kamahehelek manai kota Galatia la lemin! Au, fo Paulus, ma basa tolanoo kamahehelek fo mana lo au a, ami mamahena ela leo bee na, ita Aman Manetualain ma Lamatuak Yesus Kristus fe baba'e-papalak ma so'da-molek neu emi. Au da'di Lamatua ka hataholi nadedenun, ta hu ka nde hataholi daebafa ka, lele'a-nonolen do hu ka nde, hataholi daebafa ka nde so'u au da'di Lamatua ka hataholi nadedenun fa te, Yesus Kristus fo ita Aman Manetualain tao naso'da fali kana neme mamate sa mai ndia, nde so'u au a.

GALATIA 4:6

Hu ka nde emi ia Manetualai nana nala, de Manetualain nadenu Ana na Dula Dale na masok leo emi dalem dale ma au daleng dale, fo nde Dula Dalek fo nalo bou-bou nae, “Ama, ou au Amang.”

1 TIMOTIUS 6:16

Ka'da Ndia mesa kana nde, mamate sa ta koasa nala fan; Naso'da nai ndela-sa'a ka dalek, fo ta hapu hataholi esa boen, deka no fan. Ma hataholi daebafak esa boeo, beita nitan la'iesa boen, do hapu nita hai son. Basa ha'da-holomata ma koasa ba'eneun, losa dodoo na! Tete'e ka.

1 PETRUS 1:17

Emi maloo Manetualain ndia mae Amak, nai lelek fo emi hule-haladoi neun. Na, Manetualain ndia nde naketu-nala'di hataholi daebafa ka, nandaa no esa-esak tatao-nono'in, nana Manetualain ta metematak fa. Hu ndia de, nai lelek fo emi bei maso'da nai daebafak ia, ela leo bee na, emi mamatutua-mamadedema Manetualain, nai emi maso'da ma dalek.

NINITAK 4:11

“Ou, Lamatuak, ou ami Manetualaim! Ka'da O nde mandaa sipo kokoa-kikiok, ha'da-holomata, ma koasa. Nana O nde makadada'dik basa hata lala'ena, ma no O hihii-nanaum boe de basa hata lala'en sila la, ala da'di ma laso'da so.”

NINITAK 5:12

Ma lakamee lapane'e lae, “Bi'ilopo Ana fo nanado'do basak ndia, nandaa sipo koasa, su'i-betes, manatee tenok ma be'ibalakaik; Ndia nandaa nanafe ha'da-holomata, nananan matutua-namadedemak ma nanakoa-kiok!”