MATEOS 6:24 - Susula Malalaok Hehelu Palak Ma Hehelu Beuk

²⁴ “Ta hapu hataholi esa tao-no'i fe tuan dua la'iesa fa. Nanahu neukose ana sue-lai esa lenaheni esa ka. Boema neukose ana lilineka nahele tuan esa, tehu esa ka soona ta. Leondiak boe, ba'eneu emi. Emi ta hapu tao-no'i soaneu Manetualain, ma soaneu hata-heto daebafa ka fa.

MATEOS 6:24 ပူးပေါင်းရင်းမြစ်များ

KEJADIAN 47:17

Boema ala fe bana-manun-nala leo Yusuf neu, fo ana fes nana'ak da'dileo ngganggatik neu sila ndala, bi'ilopo, bi'ihiik, sapi ma keledein-nala. Nai teuk ndia dalen-na, Yusuf fes nana'ak, fo ala bae lenik bana-manu.

1RAJA-RAJA 18:21

Boema Elia neu deka no laun sila-la de nafa'das nae, “Emi dalem-ma naba'e nahele losa faihi'da? Metema Amak ndia Manetualain soona, sene-do'ok Manetualain leona! Metema Baal-la ndia Manetualain soona, sene-do'ok Baal-la leona!” Laun mana lakabubua lai ndia, ka'da bedenge.

2RAJA-RAJA 17:41

Da'di, ala sene-do'ok neu Manetualain, tehu ala sene-do'ok neu sila sosongo-tatangon boe. Losa faik ia boe, sila tititi-nonosin bei tao tataos ndia.

YESKIAL 20:39

Manetualain Fo Mademaina nafa'da nae, “Hai hataholi Israel-la lemin! Besak ia, tunga emi dale hihiim-ma, fo esa-esak neu sene-do'ok neu ndia sosongo-tatangon! Tehu mafandendelek te, basa ndia soona, emi muse tunga Au, ma boso boe tao maggenggeo Au na'de malalao-malalafung-nga, nenik emi meni tutunu-hohotuk fe emi sosongo-tatangom sila-la.

ZEFANYA 1:5

Neukose Au sapu balisi su'di see, fo ana kae leo uma kalan lain neu, fo ana sene-do'ok neu le'do-a, bulak-ka, ma nduuk-kala. Neukose Au tao amopo-amate sila, fo ala sene-do'ok neu Au, ma ana soo-supa lilineka nahele Au, tehu ana soo-supa nenik lamatua daebafak Milko na'den-na boe.

MATEOS 4:10

Boema Yesus nataa nitu nae, “Hei mana dudungu-papau ko nei! O la'o leona. Te nai Susula Malalok dale nanasulak nae, Makaluku-makatele neu Lamatuak fo o Manetualai ma, ma malalau-maoonon!”

LUKAS 16:11

Da'di, metema la'eneu su'i-bete daebafak ia, emi ta hapu nananamahelek seluk fa soona, see nau fe namahehelek neu emi soaneu ito-ato su'i-bete samane ka?

LUKAS 16:13

Ta hapu hataholi esa boen fo naue-nale'di soaneu tuan dua fa, nana neukose ana sue-lai esa lenaheni esa ka mai, do neukose ana lilineka neu tuan esa lenaheni esa ka mai. Leondiak boe no emi. Emi ta hapu maue-male'di soaneu Manetualain, ma soaneu su'i-betes boen.”

LUKAS 16:9

Boema Yesus kokolak seluk nae, “Mamanene leona! Pake su'i-bete daebafak ia, soaneu hapu tia-laik, fo ela metema su'i-bete daebafak ia ta nabeli so'on soona, neukose emi nanasipok nai mamanak fo matea-mahele ka.

GALATIA 1:10

Ade no enok ndia fo meten soona, nonoo ka bai de, au amahena hataholi daebafa ka, manaku au do? Ta leondiak fa! Au amahena ka'da Manetualain nde manaku au a. Ade au bei sanga enok fo, au ho'i hataholi daebafa ka dale na, fo ela ala manaku au do? Metema au bei tao leondiak soona, Kristu satan ta au fa.

1 TIMOTIUS 6:17

Ba'eneu hataholi kamasu'ik manai daebafak ia la, ela leo been-na, mafa'das fo ala boso koao ma boso lamahena neu hata-heto mana sapu-lalok sama leo su'i-bete sa. Sila muse lamahena neu ka'da Manetualain fo mana po'a-ngganga basa hata lala'ena fe ita, fo ta'a pake.

2 TIMOTIUS 4:10

te Demas la'oela au nana, ana sue daebafak ia. Neu leo Tesalonika neu so, ma Kreskes neu leo Galatia neu, boema Titus neu leo Dalmatia neu.

YAKOBIS 4:4

Emi nde bee na, hataholi ta mana lilinekak fa! Ade emi ta bubuluk fa te, metema emi tao tia-laik mo daebafak ia soona, emi da'di Manetualain musu noon fa do? Hu ndia de, metema see tao tia-laik noo daebafak ia soona, hataholi ndia tao ao ina na da'di, Manetualain musu noon.

YOSUA 24:15

Leounik-ka, emi ta nau mamahele neu Manetualain fa soona, faik ia boe, ho'i nakeketuk, emi nau mamahele neu see: neu lamatua daebafak, fo makahulun-na emi bei-ba'i kaim-mala sene-do'ok-kasa neme Mesopotamia, do neu hataholi Amori, fo besak ia emi leom-ma nusan-na, lamatua daebafan-nala. Tehu ami – au ma au teidaleng-ngala – neukose mamahele ka'da neu Manetualain.”

SEMUEL SUSULAK-KA ESAN-NA 7:3

Boema, Semuel nafa'da hataholi Israel-lala nae, “Metema, emi sanga fali leo Manetualain meu, fo sene-do'ok-kana no dalek-katematuak soona, emi muse tu'u-tapa heni basa nusa dea-la lamatua daebafan-na, ma lamatua daebafak inak Asytoret-ta dodoki-dudulan. Fe la'iesak emi aoinam-ma neu Manetualain ma ka'da sene-do'ok neun soona, neukose Ana soi-po'i emi neme hataholi Filistin-nala mai.”