KOLOSE 1:14 - Susula Malalaok Hehelu Palak Ma Hehelu Beuk

¹⁴ Nanahu Anan ndia nde soi-tefa nala ita, boema Ana fe do'o do ampon neu ita sala-singo nala so.

KOLOSE 1:14 ပူးပေါင်းရင်းမြစ်များ

MAZMUR 130:4

Tehu O nau fe do'o do ampon, fo ela hataholi-a, da'di hataholi kamahehelek.

MATEOS 20:28

Sama na leo Ana Hataholik ndia boe. Ana mai fo ta soaneu hataholi la lalalau-laoono fan, te Ana mai soaneu nalalau-naoono ma Ana fe heni so'da na, soaneu Ana soi-po'i hataholi ba'u ka.”

LUKAS 5:20

Lelek fo Yesus nita hataholi sila la namahehele na ba'una seli, boema nafa'da hataholi lu'uk ndia nae, “Tolanoo ei, o sala singom hapu do'o do ampon so.”

HATAHOLI 10:43

Basa nabi la kokolak la'eneun. Lafa'da lae, basa hataholi fo lamahele neu Yesu sa, neukose sala-singon hapu do'o do ampon ninik Yesus koasa na.”

HATAHOLI 2:38

Boema Petrus nafa'das nae, “Tukatei-saledale meme emi sala-singom mai leona, ma ela leo bee na salani emi ninik Yesus Kristus na'de na; fo ela emi sala-singom hapu do'o do ampon. Soona neukose Manetualain fe hiik Dula Dale na neu emi.

HATAHOLI 20:28

Ela leo bee na emi manea emi aoina mala, ma manea basa hataholi salanik fo Manetualain Dula Dale na ana fes neu emi, fo emi maneas; nana emi nanaso'u basak da'di mana manea hataholi salanik so. Ela leo bee na emi manea Manetualain hataholi salanin sila la, sama leo manafoo a nanea bi'ilopo nala, hu ka nde Manetualain nakadada'dik basa hataholi salanik sila la da'di neu Ndia nuun, tunga Ana na mamate na so.

HATAHOLI 26:18

fo tao ma mata nala lalaak, fo daenga ala kalua leme makahatuk dale leo mangale'do ka dalek, ma latapo'i leme Nitu dudungu-papaun mai, fo ela Manetualain koasa nalas. Fo no namahehelek neu Au ndia, Au fe do'o do ampon neu sala-singo nala, fo ala da'di Manetualain hataholi kamahehele nanahelek.’ ”

1 KORINTUS 1:30

Hu ka nde Manetualain de nalosa emi da'di esa mo Kristus Yesus. Tunga Kristus, de Manetualain tao na ita da'di manatee tenok, ma tunga Ndia boe, de Manetualain tao na ita malole falik to Manetualain, nakadada'dik ita da'di Ndia hataholi kamahehele hehelin, ma Ana soi-tefa na ita.

GALATIA 3:13

Tehu Kristus soi-po'i ita teme agama hoholo-lalanen soo-supan mai so. Ana tao dede'ak ndia tunga, Ana po'i lotak ao ina nanasoo-supak, hu ka nde ita. Nana nai Susula Malalaok dale, nanasulak nae, “Sosoo-susupak ba'eneu hataholi fo maten nanalonak nai dii ai lai na.”

EFESUS 1:7

Nana, hu ka nde Kristus mamate na de, Manetualain se'i po'i ita, fo dede'ak ndia sosoa na nae, Ana fe do'o do ampon neu ita sala-singon so.

EFESUS 4:32

Dede'a nasafali na, ela leo bee na, emi dale ma malole, masue-malai ao, ma esa fe do'o do ampon neu esa, sama leo Manetualain boeo, Ana fe do'o do ampon neu emi, tunga Kristus.

EFESUS 5:2

Ela leo bee na, susu'e ka koasa emi so'da ma, sama leo Kristus boeo, Ana sue-lai emi. Ana fe heni ao ina na soaneu ita, da'dileo tutunu-hohotu kaboominik esa fo ana tao namahoko Manetualain dale na.

KOLOSE 2:13

Makahulu na emi mate tunga samane ka, nanahu emi masala-masingo ma hu ka nde emi ta nanasunat tunga ao paa ka fa. Tehu besak ia, Manetualain tao naso'da falik emi sama-sama moo Kristus. Ana fe do'o do ampon neu ita sala-singo nala so,

KOLOSE 3:13

Esa boso hae lai namanasa esa boen, esa fe do'o do ampon neu esa, metema esa bei nape'da dalek no esa. No namahokok. Lamatua ka ana fe do'o do ampon neu emi so.

1 TIMOTIUS 2:6

Yesus Kristus ia, hataholi daebafak esa, fo Ana fe heni ao ina na, soaneu Ana soi tefa na basa hataholi lala'ena, leme sala-singo nala mai. No enok ndia, Manetualain naketu la'e fai na nae, Ana nau basa hataholi lala'ena, hapu so'dak.

TITUS 2:14

Ana tunu-hotu basa ao ina na soaneu ita, ma Ana se'i-po'i ita teme mangalauk lala'ena mai, fo Ana tao ita da'di Ndia hataholi kamahehele malalao-malalafuk ma mana manggate tao tatao-nono'i malole.

IBRANI 9:12

Kristus masok leo Kama Malalao Malalafuk manai uma lopo ndia dalek, ka'da la'iesa mesa kana, soaneu losa dodoo na. Nai lelek ndia, Ana ta nini bi'i mane daa, do sapi ana daa soaneu tutunu-hohotuk fa, tehu nini daa na mesa kana, ma no enok ndia, Ana soi-po'i ita losa dodoo na.

IBRANI 9:22

Memak tunga agama Yahudi a hoholo-lalanen soona, hihii nae basa hata lala'ena, ala tao lalalaos linik daak; sala-singo ka hapu do'o do ampon, metema hapu daa ka ana faa.

1 PETRUS 3:18

Nanahu Kristus mate ka'da la'i esa mesa kana, losa dodoo na. Hu ka nde hataholi daebafa ka sala-singon de hataholi sala tak esa, Ana mate soaneu hataholi masala-masingo ka. Kristus tao-no'i basa sila la, fo ela Ana hapu hela-nole emi leo Manetualain mai. Ala tao lisan tunga ao paa ka, tehu nanatao naso'da falik tunga samane ka.

1 YOHANIS 1:9

Tehu metema ita manaku ita sala-singon neu Manetualain soona, neukose Ana tao natetu hala hehelu na, ma naketu-nala'di tunga matetu na. Neukose Ana fe do'o do ampon neu ita sala-singon, ma Ana safe balisi ita tatao-nono'i masala-masingo nala.

1 YOHANIS 2:12

Ana ngala lemin! Au sulak fe emi susulak ia nana hu ka nde Kristus de, emi sala-singom hapu do'o do ampon so.

1 YOHANIS 2:2

No Yesus Kristus tunu-hotu ao ina na, de ita sala-singon hapu do'o do ampon. Tehu ta ka'da ita mesa tala sala-singon hapu do'o do ampon fa te, basa hataholi daebafa ka sala-singon boeo, hapu do'o do ampon.

NINITAK 1:5

ma neme Yesus Kristus, sakasii fo manalilineka ka. Ndia nde makasososa naso'da falik neme mamate sa mai, ma Ndia nde manakoasa neu mane-mane daebafa kala. Yesus sue-lai ita, ma no mamate na de Ana soi-po'i ita teme ita sala-singon mai,

NINITAK 14:4

Hataholi sila la nde bee na hataholi isi matetuk lahele sama leo anafe'oana matatema, nanahu ala beita sungu-langape'uk lo ina anafe'ok la'iesa boen. Ala tunga Bi'ilopo Ana ndia su'di leo bee neu. Neme basa laun manai daebafa ka lala'ena dalek, sila nde nanasoi-po'i basak da'dileo tutunu-hohotu makasososak neu Manetualain ma neu Bi'ilopo Ana.

NINITAK 5:9

Lakamee nakamee beuk esa nae: “O mandaa ho'i susulak ndia fo siiheni segen nala. Nana O nanataonisak so, ma no O mamate ma de, hataholi daebafa ka neme basa leoanak lala'ena, dede'a kala, nusaina la ma leoina lala'ena, O asa basan soaneu Manetualain so.