IBRANI 7:28 - Susula Malalaok Hehelu Palak Ma Hehelu Beuk

²⁸ Agama Yahudi a hoholo-lalanen so'u hataholi fo ta matetu-mandaak da'di imam matua ina. Tehu makabui na, neme hoholo-lalanek ndia mai, de Manetualain tao hehelu-balataak ninik soo-supak nae, Ana so'u Ana na da'dileo Imam Matua Ina, fo nananakadada'di basak da'di Mana Soi-tefa fo matetu-mandaak, losa dodoo na.

IBRANI 7:28 ပူးပေါင်းရင်းမြစ်များ

MAZMUR 110:4

Manetualain soo basa so, de neukose, “Ana ta hela falik hehelu-balataan fo nae, O nde imam losa dodoon-na, sama leo Melkisedek.”

IMAMAT 4:3

Metema manatao sala-singok-ka nde Imam Matuaina, nalosa basa leoina Israel-la tao salak soona, muse ana tunu-hotu fe Manetualain, sapi maneanak esa, ta lu'u-la'ak fa, fo ela sala-singon hapu do'o do ampon.

LUKAS 13:32

Yesus nataa nae, “Mu mafa'da hataholi fo ana hii ka'da tao nakalulutuk ndia mae, ‘Faik ia ma balahaa, Au usiheni dula dale mangalau kala, ma Au akahahaik hataholi kamahe'dis ala, tehu neu fai katelu na, neukose Au tao akababasak Au tatao-nono'ing.’

YOHANIS 19:30

Yesus nalamei nita oe angol ndia, boema nafa'da nae, basa basan “Dai so!” Tutika Ana pelu neu de maten.

IBRANI 1:2

Tehu nai le'do fai mate'ek ia, Ana kokolak no ita tunga Ana na. Tunga Anan ia nde, Manetualain nakadada'dik lalai ma daebafa ka no basa oe isin lala'ena. Ma Manetualain naketu basa, nae Anan ndia boeo nde nanuu hak nanuu basa hata lala'ena.

IBRANI 2:10

Memak nandaa Manetualain fo mana makadada'dik basa hata lala'ena soaneu dale dudu'a na mesa kana, Ana tao Yesus manasoi-tefa fo matetu-mandaak, tunga doi-doson. No enok ndia, fo Manetualain nalo hataholi ba'u ka, soaneu ala tunga nananamatutua-namadedemak sama-sama lo Yesus. Nanahu Ndia nde manasoi enok ba'eneu sila soaneu bisa nanasoi-tefak.

IBRANI 2:17

Ia sosoa na, nae Ana muse da'di sama no tolanoo nala nai basa dede'ak lala'ena dalek. Ma no enok ndia, Ana hapu da'di Imam matua ina fo mana lilinekak ma madale susue-lalaik. No lau-onon ndia, de hataholi daebafa ka sala-singo nala, hapu do'o do ampon.

IBRANI 3:1

Tolano-tolanoo kamahehelek esa fo Manetualain nalo basa kala lemin! So'ba dodoo matalolole la'eneu Yesus ia dei! Manetualain nadenu hehelin Ana da'di Imam Matua ina nai ita agama na dalek.

IBRANI 3:6

Tehu Kristus lilineka da'dileo Anak fo nde nataa Manetualain Uma na. Ma ita ia nde Manetualain Uma na, metema ita manggate tahele ma tamahele tahele soona ita hapu hata fo ita tamahena ka.

IBRANI 4:14

Hu ndia de, ita muse ho'u tahehele neu ita manaku namahele ka. Nanahu ita tanuu Imam Matua ina esa, ba'u na seli, fo Ana masok basa losa leo Manetualain mata na neu so. Ndia nde Yesus, fo Manetualain Ana na.

IBRANI 5:5

Leondiak boe Kristus. Ana ta so'u aon ao ina na mesa kana da'di Imam Matua ina fa. Te Manetualain mesa kana nde so'u nana. Manetualain nafa'dan nae, “O nde Au Ana nga; nai faik ia, Au da'di O Amam.”

IBRANI 7:21

Tehu Yesus nanaso'uk da'di imam, pake soo-supak, nai lelek fo Manetualain nafa'da neun nae, “Au soo-supa basa so, de neukose Au ta asafali Au nakeketu nga fa, ‘O nde bee na imam losa dodoo na.’ ”

IBRANI 7:24

Tehu Yesus naso'da losa dodoo na, da'di nangatutuun da'dileo ima ma, ta lali leo hataholi fe'ek neu fa.

IBRANI 7:3

La'eneu Melkisedek ia, ta hapu tutui mangale'dok nai bee a boen, nae nanuu ina amak, do bei-ba'ik; ta hapu tutui mangale'dok boen la'eneu, bobongi na do mamate na fa. Melkisedek ia, sama leo Manetualain Anan, fo nde ana da'di imam losa dodoo na.