IBRANI 2:14 - Susula Malalaok Hehelu Palak Ma Hehelu Beuk

¹⁴ Hu ndia de, basa hataholi fo noken nae anak ndia, nde bee na mahahae hataholi daebafak fo hapu maten, soona Yesus mesa kana sama hataholi sila, ma leo naso'da nai ha'da-tatao hataholi daebafa ka dalek. Ana tao leondiak, fo ela no mamate na, Ana hapu tao nakalulutuk Nitu fo mana koasa mamate sa.

IBRANI 2:14 ပူးပေါင်းရင်းမြစ်များ

KEJADIAN 3:15

O ma inak ndia, neukose esa musu no esa, ma tititi-nonosin ma o tititi-nonosim, neukose esa musu no esa. Neukose tititi-nonosin, tutu lakabebelak o langam-ma, ma neukose, o kaan neu sila eitingan-nala.”

YESAYA 25:8

Manetualain Fo Manakoasa, neukose tao namate-namopo mamates-sa, losa dodoon-na! Neukose Ana loseheni luuoe-a neme basa mata-panak lala'en-na mai, ma nadook nakamumulu-nakamamaek fo, anan manai daebafak-ka lala'en-na, lu'a-lepak-ka. Manetualain kokolak basa so, de tao leo bee-o, dede'ak ndia ana da'di.

YESAYA 53:12

Ana fe heni so'dan-na, no dale hihii-nanau mesan-na, de nanalekek nai hataholi mangalauk-kala, dede'un-na dalek. Ana nasaa, hataholi makadotok sala-singon, ma ana hule-haladoi, fo ela hataholi sila, hapu do'o do ampon. Boema Au fen hataholi makadotok, da'di leo bua palsen, ma ana hapu baba'ek sama-sama no hataholi ndoos-sala.”

YESAYA 7:14

Besak ia, neukose Manetualain nde fe o ta'du-tana. Anafe'oana kailus esa, neukose ana bongi-na ni'iana touanak esa, fo ana foin na'de Imanuel.

HOSEA 13:14

Neukose, Au ta soi-tefa leoina ia, neme hataholi manamatek-kala daebafan-na mai fa. Hai mamates, nggali o he'di-laum mai leona! Makalala'ok o tatao-nono'im fo maneni nakalulutuk ndia leona! Nana, Au ta sue-lai leoina ia so'on.

MATEOS 16:17

Boema Yesus naen nae, “O maua-manale manseli Simon, fo Yona anan! Nana hataholi daebafak ta nde nafa'da dede'ak ndia neu o fa, tehu Au Amang manai nusa so'da ka.

MATEOS 25:41

Basa ndia boema, neukose Manek ndia nafa'da hataholi manai boboa kii na nae, ‘La'o heok meme ia mai, hei hataholi mangalau kala lemin! Masok leo ha'i mana mate ta ka dalek meu, te mamanak ndia nanasadia basak soaneu nitu a no basa lima ein lala'ena!

YOHANIS 1:14

Dede'a-kokola ka, Ana da'di hataholi daebafak, de Ana leo nai ita tala'da, boema ita tita matua-mademan so. Matua-mademan ndia, Ana sipo kana da'dileo Ama ka Ana kisa na. Tunga Anan ndia, de ita tita Manetualain, ma susue-lalain neu ita.

YOHANIS 12:24

Au dede'ang ia, tete'e ka la'en: Makanaema ha'de de'ek esa, ta selen leo dae dale neu, fo ha'de de'ek ndia po'o fan, soona neukose ana da'di de'ek esa nahele. Tehu makanaema ha'de de'ek ndia po'on nai dae dale, soona besa ka ana moli, fo nabuna-naboa ha'de de'e ba'u.

ROMA 14:9

Kristus mate de naso'da falik so. Hu ndia de Ana da'di Lamatuak soaneu hataholi maso'da kala ma soaneu hataholi manamate basa kala boe.

ROMA 8:3

Hata fo agama hoholo-lalanen ta hapu tao nala fan, hu ka nde ita hataholi daebafa ka tapandoe na, Manetualain tao basan so. Manetualain sengi sala-singo ka koasa na nai hataholi daebafa ka ha'da-tatao na dalek, ninik Ana haitua Ana na mai no heheo-hihilun sama na leo hataholi daebafa masala-masingo ka, fo Ana kokaheni sala-singo ka.

1 KORINTUS 1:28

Manetualain hele hata fo lafa'da lae, nai daeanak, nananakamumulu-nakamamaek, lena-lenak daebafa ka nafa'da nae, sosoa-ndandaan ta, fo ela Manetualain tao nakalulutuk hata fo daebafa ka nafa'da nae, paluu nanseli.

1 KORINTUS 15:50

Tolano-tolanoo ngala lemin, au dudu'a nga nde bee na: ao paak fo nananakadada'dik neme daak ma paa ia, ana ta hapu masok leo Manetualain Daebafa Beu na fa; ma ao paak fo hapu maten ia, ana ta hapu da'di matea-mahelek fa.

GALATIA 4:4

Tehu losa fai na nandaa te, Manetualain nadenu Ana na mai leo daebafa ka mai. Inak esa naso'da nai agama hoholo-lalanen dalek, nde bongi ni'iana ndia.

KOLOSE 2:15

Nai ai nggangek lain, Kristus tao nala dula dalek fo ala paleta ma ala koasa, basa-basas male henis. Ana tao na basa daebafa ka lita, Ana hela nos, sama leo hataholi nanatahan ala, nai lelek fo Ana tao feta fai sesengi na, nono'ka bai hataholi nanahuku kala, fo Ana taos da'di natutu'duk esa nai lea matan.

1 TIMOTIUS 3:16

Ta hapu hataholi esa boen, hapu nalelesi nae, basa nanolik fo Manetualain natu'du kala nde bee na, tete'e ka: Natu'du ao ina na, sama leo hataholi daebafa ka. Manetualain Dula Dale na nafa'da nae, ndoos, boema basa ata nusa so'da kala litan. Tutui na, nanatui-bengak nai basa nggileo-bobongi kala tala'da, boema basa daebafa ka lamahelen, ma nanaso'uk leo nusa so'da ka neu.

2 TIMOTIUS 1:10

Boema besak ia, Manetualain natu'du susue-lalain ndia neu ita, ninik ita Mane Mana Fe So'da na fo Kristus Yesus mamai na. Yesus sengi mamate sa koasa na, de nini so'da mana ketu basa ta ka, tunga Hala Malole ndia.

IBRANI 10:10

Yesus Kristus tao-no'i Manetualain hii-nanaun, nde Ana fe aoina na da'dileo tutunu-hohotuk so. Ana tunu-hotu aoina na, ka'da la'iesa mesakana, soaneu losa dodoo na. No enok ndia Ana tao nalalao-nalalafu ita basa-basa tala neme sala-singo ka mai.

IBRANI 10:5

Hu ndia de, nai lelek fo Kristus mai leo daebafa ka mai a, nafa'da Manetualain nae, “O ta mahiik tutunu-hohotuk ma fee feek fa; nasafali na nae, O sadia basa ao paak ba'eneu Au so.

IBRANI 2:17

Ia sosoa na, nae Ana muse da'di sama no tolanoo nala nai basa dede'ak lala'ena dalek. Ma no enok ndia, Ana hapu da'di Imam matua ina fo mana lilinekak ma madale susue-lalaik. No lau-onon ndia, de hataholi daebafa ka sala-singo nala, hapu do'o do ampon.

IBRANI 2:18

Ma hu ka nde mesa kana doidoso hai, ma nanaso'ba-su'dik, de Ana hapu tulu-fali hataholi fo mana la'e soso'ba-susu'di ka, nana Ndia boeo nanaso'ba-su'dik haik ma mana doidosok.

IBRANI 4:15

Ita Imam Matua inan ndia, ta nde imam fo ta hapu name'da nita ita tapandoe nala fa. Nasafali na, nanaso'ba-su'di basak, nai basa dede'ak lala'ena dalek, sama leo ita boe, ka'da Ana ta tao sala-singok fa!

IBRANI 9:15

Hu ndia de, Kristus da'di lelete neu hehelu beuk esa, fo ela ita fo Manetualain nalo basa ka, hapu baba'e-papala mana ketu basa tak, fo Manetualain helu ka. Basa sila la ala da'di, hu ka nde hataholi esa mamate na, fo nde Kristus. Fo no Kristus mamaten ndia, de Ana soi-tefa na hataholi a neme sala-singon, fo ala tao-no'in nai lelek fo ala bei pake hehelu-balataa makasososak ndia.

1 PETRUS 1:20

Manetualain hele Kristus, te daebafak ia, nananakadada'di beitak. Ma nai faik-faik fo le'do-fai a sanga basan ia, Ana mai leo daebafa ka mai, fo daenga Ana soi-tefa na emi.

NINITAK 1:18

Au nde Ndia fo maso'da ka! Au mate so, tehu mete leona te, Au aso'da losa dodoo na. Au koasa mamate sa, ma daebafa hataholi manamate ka.

NINITAK 12:9

Ala tapa naga matuaina ndia leo deak neu! Naga ndia nde menge lasik fo nana'de Nitu do Dula Dale Mangalauk fo manake'dindiu basa daebafa ka lala'ena. Ala tapan no ana manatunga nala leo daebafa ka.

NINITAK 2:10

Boso bii neu doidosok fo ta doo ka soo'on te emi muse la'ola'din. Mafandendelek, te neukose Nitu tao emi nggelok leo bui dale neu soaneu emi nanaso'ba-su'dik. Neukose emi doidoso faik sanahulu dale na. Ela leo bee na emi lilineka neu Au losa mate, soona neukose Au fe emi so'da matetu ka ma manaketu basa ta ka da'dileo bua palsen sesengik.

NINITAK 20:2

Boema ana ho'u na naga fo menge lasik ndia, fo Nitu do dula dale mangalauk ndia de ana feo puputun soaneu teuk lifun esa dale na.