HOSEA 1:10 - Susula Malalaok Hehelu Palak Ma Hehelu Beuk

¹⁰ Leoina Israel-la, neukose de'u solokaek manai tasi su'un-na, nalosa ta hapu leke-nala fas. Besak ia, Manetualain nafa'das nae, “Au anang ta emi fa”, tehu neukose fain-na losa soona, nafa'das nae, “Au nde Manetualain fo maso'dak, ma Au anang emi!”

HOSEA 1:10 ပူးပေါင်းရင်းမြစ်များ

KEJADIAN 13:16

Neukose, Au fe o tititi-nonosik makadotok nanseli, nalosa ta hapu hataholi esa boen, hapu leke-nala fas. Sama leo hataholi-a, ta hapu leke-nala daesopuk manai dae-a fa, leondiak boe, o tititi-nonosim, neukose ta hapu leke-nala fas.

KEJADIAN 22:17

Neukose, Au ba'e-pala o nenik baba'e-papalak manasasi kao-kaok-ka, ma Au fe o tititi-nonosim de'u nduuk manai lalai-a, ma solokaek manai tasi su'un-na. Neukose, o upu-anam sengi musun-nala.

KEJADIAN 32:12

Mafandendelek te, Manetualain helu basa, nae neukose Amak-ka ito-ato basa hata lala'en-na no malole soaneu au, ma Amak-ka fe au tititi-nonosik makadotok. Ta hapu hataholi esa boen, hapu leke-nala fan, nanahu dede'un-na sama leo solokaek manai tasi su'un-na.”

2 SEMUEL 7:24

O tao leoina Israel-la, da'di O ana mesam, losa dodoon-na, ma O, ou Manetualain, O da'di sila Manetualain so.

YESAYA 43:6

Au paleta kii ma kona, fo ela po'is no lai-laik. Nemen-na fo, o ana toum-mala fali ma'is leme dook-ka mai, ma o ana inam-mala, fali leme daebafak-ka bu'u-bu'un-nala mai.

YESAYA 48:19

Neukose o tititi-nonosim, de'u solokaek manai tasi su'uk-ka; Au apalani afa'da nana, tao leo bee-o, ta mate-mopo fas.”

YESAYA 63:16

Ade, O ta nde ami Amam fa do? Abraham ma Yakob, ta lalelak ami fa. Tehu O, ou Manetualain, O nde been-na, ami Amam, ami Manasoi-manatefam, neme makahulun eli mai.

YESAYA 64:8

Tehu O, ou Manetualain, O nde been-na, ami Amam, ami ka'da dae manuteik mesan, ma o nde fe lupak neu ami; ami basa-basam-mala nde been-na, O lima tataam.

YESAYA 65:1

Manetualain nafa'da nae, “Au aheheleaong, ataa Au anang-ngala, tehu ala ta hule-haladoi neu Au fa. Au sadia, soaneu ala mai latongo lo Au, tehu ala ta sanga Au fa. Leoina ndia, ta naloo Au fa, leomae Au aheheleaong soaneu Au ataa ae, Au nde ia!

YESAYA 66:20

Neme nusak sila-la mai, neukose ala loo falik emi tolano-tolanoom fo, leoina esa, da'di leo bua palsen soaneu Au. Neukose ala lo hataholi sila-la, leo Au pupukung fo malalao-malalafung-nga neu nai Yerusalem no ala sa'e ndala, keledei ma onta, ma no kaleta boema nggalobak, sama leo hataholi Israel-la biasa leni tunu-hotu gandum nai mamana balisi dale, leo Manetualain Uman neu.

YEREMIA 33:22

Neukose Au tama Au atang Dauk tititi-nonosin, ma leo Lewi-a imam-nala, de nalosa dede'un-nala boetai lamaba'uk-ka sama leo solokaek manai tasi su'un-na, ma nduk manai lalai-a fo ta hapu leke-na fan.”

DANIAL 6:26

Basa ndia boema, mane Darius-sa haitua susulak leo hataholi maleme leoina ma dede'ak manai daebafak-ka lala'en-na nae, “So'da molek!

HOSEA 1:9

Manetualain, nafa'da au nae, “Foi o anam ndia na'de, ‘Au Anang Ta Ndia fa’, nana Au anang ta hataholi Israel-la fa, ma sila Manetualain ta Au fa.”

HOSEA 2:23

Neukose Au tao-a Au anang-ngala, laso'da no tetu-temak ma ala leo lahele leme sila nusan-na. Neu sila fo loken lae, ‘Fo Ta Nanasue-laik-ka fa’ neukose Au atu'du ae, Au sue-lais, ma ba'eneu sila, fo lokes lae ‘Au anang ta sila fa’ neukose Au afa'da ae, ‘Au anang emi’. Neukose, lataa lae leo ia, ‘O nde ami Manetualaim-ma.’ ”

YOHANIS 1:12

Tehu hapu hataholi sipo kana, ma lamahelen boe; Hataholi sila, Ana fes hak fo ala da'di Manetualain anan.

ROMA 8:19

Basa daebafa ka lala'ena lahiik lanseli fai na losa leona, fo Manetualain natu'du ana nala nde see.

2 KORINTUS 6:18

Neukose Au da'di emi Amam, ma neukose emi da'di Au anang. Leondiak Manetualain fo Mana Koasa nafa'da.”

IBRANI 11:12

Leomae Abraham nai lelek ndia, sama leo hataholi fo mate ao paa na so, tehu ana hapu tititi-nonosik ba'u ka, fo dede'u na ta hapu leke nala fan, dede'u nala sama leo nduuk manai lalai a, ma solokaek manai tasi su'u na.