DANIAL 5:23 - Susula Malalaok Hehelu Palak Ma Hehelu Beuk

²³ Ama Manek namatutua-namadedema aoinan-na soaneu Manetualain nai nusa so'dak-ka, ma Ama Manek napalani nadenu hataholi neni mango fo Ama Manek aman loso nenis neme Manetualain Uman dale mai, leo feta dale mai. Boema Ama Manek noo basa hataholi matua-madema-la saoinan-nala, ma sao ka dua ka telun-nala minu pake mango sila-la. Ama Manek koa-kio lamatua daebafak fo nanataok neme lilopilas, lilofulak, liti, besi, ai ma batu, lamatua daebafak fo ta hapu lita do lamanene do lalelak hata-hata ndia fa. Ama Manek ta fe ha'da-holomata neu Manetualain fo manamaketu-mala'di Ama Manek maso'dan-na ma mamaten-na.

DANIAL 5:23 ပူးပေါင်းရင်းမြစ်များ

KEJADIAN 14:19

boema ana fe Abram baba'e-papalak nae, “Sa'di leo been-na Manetualain Fo Mademaina, fo nakadada'dik basa lalai ma daebafak-ka, ba'e-pala Abram!

KEJADIAN 2:7

Basa boema, Manetualain ho'i-na dae faa anak, de Ana taon-nan, nalupa hataholi esa, boema Ana fuu, ani hahaek fo maneni maso'dak-ka leo pana bolon dale neu; boema hataholi ndia, naso'da leona.

2RAJA-RAJA 14:10

O, fo Amazia, manako'ao-ndaeaok, nanahu o sengi hataholi Edom-mala so. Nah, ade sesengik ndia, dai so hetu? Malole lenak, o meme ka'da uma! Sosoak hata, sanga dede'ak, fo neukose, ka'da nini soe fe o, ma o laum-mala?”

AYUB 12:10

Ndia nde, ito-ato basa mahahaek lala'en-na, so'dan-na; Ndia nde koasa, hataholi daebafak-ka ani hahaen-na.

AYUB 31:4

Tao leo bee-o, Manetualain bubuluk basa, au tatao-nono'ing lala'en-na; ma nita basa au ei nggangganing lala'en-na.

MAZMUR 104:29

Metema O lepos masadea soona, ala bii; metema O ho'i falik ani hahaen-na soona, ala mopo-mate fo ala da'di falik dae, sama leo makasososan-na.

MAZMUR 115:16

Manetualain nanuu ka'da lalai, tehu Ana fe daebafak-ka, leo hataholi daebafak-ka neu.

MAZMUR 139:3

O mita au nau au nai ue-le'dis dale, do au hahaeaong boe, O bubuluk basa hata fo, au tao-no'in.

MAZMUR 146:4

Metema, mates soona, ala fali leo dae-a leu; faik ndia boe, sila dale tutun-nala mopok-kana.

AMSAL 20:24

Manetualain naketu basa, hataholi daebafak-ka maso'dan-na eno-dalan nai daebafak ia so; hu ndia de, hataholi daebafak-ka, ta bubuluk maso'dan-na, eno-dalan fa.

YESAYA 13:11

Manetualain nafa'da nae, “Neukose, Au huku daebafak-ka nanahu tatao-nono'i mangalaun-na, ma hataholi tatao-nono'i mangauk-kala nanahu sala-singon-nala. Neukose, Au akadadaek basa hataholi manakoao-ndaeaok-kala, ma neukose Au huku hataholi fo namatutua-namadedema aoinan-na, ma hataholi fo ha'da hataholi taak-ka.

YESAYA 14:13

O maketu basa nai o dalem dale, kae leo lalai muu, fo o pe'da o kandela manem-ma, neu nduuk mademaina lain! O maedaenga o hapu mangatuuk da'di leo manek nai letek kii lain, fo lamatua daebafak-kala mamana nakabubuan-na.

YESAYA 2:12

Nai faik ndia, Manetualain Fo Manakoasa, neukose nakadadaek basa hataholi fo namatutua-namadedema aoinan-na, ma Ana huku basa hataholi manakoao-ndaeaok-ka, ma mananamatutua-namadedema aok-ka.

YESAYA 33:10

Manetualain nafa'da leoina ndia nae, “Besak ia, neukose Au fo'a, fo Au atu'du Au koasang-nga.

YESAYA 37:19

Ala hotuheni, ma ala tao lakalulutuk lamatua daebafan-nala boe, nana lamatua daebafak sila-la, ta lanuu koasa makandondook fa. Sila ka'da ai-batu nanadoki-dulak, fo hataholi daebafak-ka nde taon-nana.

YESAYA 37:23

Ade, o bubuluk see kande o dodoki-aalin, ma o makamumulu-makamamaek-kana ndia do ta? Au, fo Israel Manetualain-na, Manetualain fo malalao-malalafuk-ka.

YESAYA 42:5

Amak Manetualain nakadada'dik, ma nakapepela lalai-a; Ana nakadada'dik daebafak-ka, ma basa manamolik manai lain lala'en-na. Ana fe hataholi daebafak-ka, ani hahae maso'dak ma samanek. Ana nanduku-nalosak hala heheluk ia, neu atan-na.

YEREMIA 10:23

Manetualain, au bubuluk ta hapu hataholi esa boen nanuu koasa fo ana naketu ua-nalen do lelepos nalelak so'dan-na eno-dalan.

YEREMIA 48:26

Manetualain nafa'da nae, “Tao-ma Moab da'di manamafuk, nanahu ana koao-ndaeao nai Au matang. Neukose ana lololi-oe nai mutan dale ma hataholi-la hika-humen.

YEREMIA 50:28

Basa hataholi mana malai leo Yerusalem fo mana neme Babel-la ala tui ita Amak Manetualain balas hataholi Babel-la tatao-nono'i neu Manetualain Uman-na.)

YEREMIA 50:29

Manetualain nafa'da nae, “Mafa'da basa manakou-la sapu-la Babel. Mafa'da neu basa manakou malelak-kala okofefeo kota ndia ma boso ela esa nala deak boen. Fe falik sila tatao-nono'in ma taon sama leo ndia ha'da palin-na hu ka nde ndia ta fe ha'da-holomata neu Au, Israel Manetualain fo Malalao-malalafuk-ka.

YESKIAL 28:17

O mata makeem-ma, ana tao-na o koao-ndaeao, ma o na'de nanakoa-nanakiom-ma, ana tao-na o, tao tunga o nggoam-ma. Hu ndia de, Au bala o muu dae lain, fo Au taon da'di nasanene'dak ba'eneu mane fe'ek-kala.’ ”

YESKIAL 28:2

“Hai hataholi daebafak fo, manasapu-manalalok-konei, mafa'da mane Tirus-sa, hata fo Au, Manetualain Fo Mademaina nafa'da neun, ‘No koao-ndaeaok, o mafa'da mae o nde been-na lamatua daebafak, fo o mangatuuk nai kandela manek-ka, nai tasi-a tala'da heon. O bole tao o aoinam-ma, da'di leo lamatua daebafak, tehu mafandendelek leona te, o ka'da hataholi daebafak biasa mesak-kana.

YESKIAL 28:5

Memak o dangan malelak, de besak ia, o mamasu'i hatu-hatu so, de o su'i-betem ndia, ana tao-na o koao-ndaeao!’ ”

YESKIAL 31:10

Hu ndia de Au, Manetualain Fo Mademaina, afada o hata fo, neukose ana da'di neu ai fo pe'dan-na losa ko'as-sa ndia. Nana ana boetai namademak-ka, ana boetai koao-ndaeao.

DANIAL 11:12

Basa boema, neukose namahoko nanseli, nanahu ana sengi ma hu kande ana taonisa solda'du musu makadotok, tehu neukose ana ta koasa nakandoo fa.

DANIAL 4:37

Da'di besak ia, au fo Nebukadnezar, koa-kio ma au tao amadedema Mane Nusa so'dak-ka. Basa tatao-nono'in lala'en-na ndoos ma matetuk, ma nakadadaek hataholi manakoao-ndaeaok-ka.

DANIAL 8:11

Nakalenak naheek no solda'du nusa so'dak-kala malangain manai lain-na, ma ta bole tunu-hotu tutunu-hohotu su'di faik fo ala tunu-hotu fen neu malanga solda'du manai lain ndia, ma ana tao natu'u uma mamason-na.

HABAKUK 2:4

Mafandendelek te, hataholi mangalauk-ka, neukose ta naso'da fa, tehu hataholi manatao tunga Manetualain hihii-nanaun-na, neukose naso'da, nanahu ana lilineka neu Manetualain.”

HATAHOLI 17:25

Ndia boeo ta paluu hataholi daebafa ka tutulu-fafalin fa, nana Ndia nde mana fe maso'da ka, ani hahae ka, ma basa hata lala'ena neu hataholi daebafa ka.

1 KORINTUS 8:4

La'eneu na'a nana'ak fo nanafe basak neu sosongo-tatango ka, ita bubuluk tae, tunga ndo na sosongo-tatangok ta. Boema ita boeo bubuluk basa, Manetualain ka'da esa; ta hapu fe'ek so'on.

1 TIMOTIUS 3:6

Hataholi mauli-malanga salanik esa, ta bole hataholi fo, besa ka ana da'di hataholi salanik fa, nana neukose hataholi ndia, ana da'di hataholi mana koaok, fo nanasoo-supak, sama na leo makahulu na Nitu a boe.

IBRANI 4:13

Ta hapu mahahaek esa boen, fo nanafunik neme Manetualain mata memete na mai fa. Basan lala'ena makaholak ma nanabukak nai mata na. Hu ndia de, ita muse fe natataak neun.

NINITAK 9:20

Tehu ela hataholi fo susa soe katelu kala ta taolisa fas ala, ala ta nau hahae tao batu sosongo-tatangok. Ala ta hahae sene-do'ok neu dula dale mangalau kala ma songo-tango lilopilas, lilofulak, liti, batu ma ai, fo ta hapu lita do lamanene, do la'ok boen.

HAKIM-HAKIM 16:23

Faik esa boema, manakoasa Filistin-nala lakabubua, fo ala sanga tao feta, fo tunu-hotu tutunu-hohotuk matuaina fe Dagon, fo sila lamatua daebafan-na. Lakamee lae, “Ita lamatua daebafan-na, ana fe ita sengi Simson, fo ita musun-na!”

SEMUEL SUSULAK-KA ESAN-NA 17:26

Boema Dauk nae, “Hataholi Filistin dinitiu ndia, napalani nanseli nahee Manetualain fo maso'dak-ka solda'dun-nala!” Basa boema, natane solda'du esa nae, “Ala fe hataholi fo ana bisa taonisa hataholi Filistin ndia beek, fo lose heni nakamumulu-nakamamaek-ka neme Israel mai?”

SEMUEL SUSULAK-KA ESAN-NA 17:36

Atam-ma taonisa, nau singa do meoasu boe, de hataholi Filistin dinitiu ndia boeo, neukose sama-na leo bana sila-la, nanahu napalani nakamumulu-nakamamaek Manetualain fo maso'dak-ka, solda'dun-nala.