DANIAL 12:10 - Susula Malalaok Hehelu Palak Ma Hehelu Beuk

¹⁰ Neukose hataholi ba'uk-ka nanaso'bak ma nanatao neuisik. Sila fo manatao tatao-nono'i mangalauk-ka, neukose ta lalelak ma ala tao tatao-nono'i mangalauk lakandoo; ka'da sila fo manatee-tenok-kala nde neukose lalelak.

DANIAL 12:10 ပူးပေါင်းရင်းမြစ်များ

MAZMUR 107:43

Ela leo bee-na, hataholi manatee tenok-ka, dudu'a-dodoo basa dede'ak sila-la, ma ana manaku, nae Manetualain sue-lai nahele.

MAZMUR 51:7

Tete'ek-ka, au hataholi mangalauk neme lelek bongi au-a, ma au inang nailu au-a nai sala-singok-ka dalek.

AMSAL 1:5

No nanoli-nafa'dak ia-la, de hataholi manatee-tenok-ka boeo, neukose malelan-na boe tama, ma hataholi manasakola basak-ka, neukose ana hapu hehela-nonolek.

YESAYA 1:18

Manetualain nafa'da nae, “Mai fo ata taketu-tala'di dede'ak ia. Leomae emi sala-singom pilas sama leo kaisuma, te neukose Au safe-a emi da'di fulak sama leo abas-sa. Leomae emi sala-singom makadotok ma belak-ka, te neukose Au fe do'o do ampon neu emi.

YESKIAL 36:25

Basa ndia soona, neukose Au pisi oe neuk neu emi, fo ela emi malalaok neme basa emi sosongo-tatangom lala'en-na mai, ma neme basa hata lala'en fo, manatao nanggenggeo emi.

YESKIAL 47:11

Tehu puuk ma dano manandolo tasi su'uk ndia oen-nala, neukose ala ta da'di oe mamis fa, te ala da'di oemasik lahele.

DANIAL 11:33

Hataholi manatee-tenok fo lauli-lalanga laun-nala, neukose ala tao-la hataholi makadotok lalelak. Tehu soaneu faik de'ubee dalen-na, neukose ala taolisa sila de'ubee hu kande natee-natatik-ka, do hu kande ha'i-a, ma hataholi de'ubee seluk bai soona, neukose nakodaa-la lamanako uman-nala, ma ala foo lenis.

DANIAL 11:35

Mauli-malangan manatee-tenok sila-la nggelok, neukose nanataonisak, tehu ndia ka'da nalupa soso'ba-susu'dik ba'eneu Manetualain anan-nala, fo ala da'di neuisik. Neukose dede'ak ndia ana da'di losa tepo-lelek mate'ek-ka, fo nde tepo-lelek Manetualain naketu basak-ka.

DANIAL 12:3

Basa mauli-malangan manatee-tenok-kala, neukose landela-lasa'a sama leo lalai-a mangale'don-na. Ma ba'eneu sila fo lanoli hataholi makadotok soaneu tao-no'i hata malole, ndoos ma matetuk-ka, neukose landela-lasa'a sama leo nduuk-kala losa dodoon-na.”

HOSEA 14:9

Hataholi Israel-la neukose tu'u-tapa heni dodoki-dudula sosongon-na, Au akabobois ma Au sipok huhule-haladoin-nala. Sama leo ai fo doon-na makadotok tataas esa, Neukose Au asulu-ahapas. Au nde ai huuk neme sila baba'e-papalan lala'en-na. Au, Manetualain nde manakokolak-ka.”

ZAKHARIA 13:9

Neukose maso'dak ka'da baba'ek esa neme baba'ek 3 mai. Ma neukose, Au tao alalao-alalafu hataholi sila, sama leo ha'i tao namaneu lilofulak-ka. Neukose Au so'bas, sama leo hataholi-a, ana fola lilopilas-sa. Boema neukose, ala hule-haladoi neu Au, fo neukose, Au ataa huhule-haladoin-nala. Neukose Au afa'das ae, sila nde been-na, Au anang, ma sila boeo, neukose manaku lae, Au nde Manetualain fo sila Manetualain-na.”

MALEAKHI 3:3

Ana mai fo naketu-nala'di, sama leo hataholi manatao balisi, ma manapoli lilofulak-ka. Sama leo tuka liti esa, ana tao namaneu lilopilas ma lilofulak-ka, leondiak boe, Manetualain hataholi nadedenun-na, neukose ana tao namaneu basa imam-mala, fo ela ala tunu-hotu tutunu-hohotuk nenik enok fo Manetualain nahiik-kana.

MARKUS 4:11

Boema Yesus nafa'das nae, Manetualain fe basa emi baba'e-babati malole fo ela emi bubuluk bibila babaak la'eneu “Manetualain paleta tao leo beek. Tehu nanoli hataholi dea kala soona, Ana pake nakandandaak,

LUKAS 24:25

Boema Yesus nafa'das nae, “Hei, emi ia beita malelak ma emi dale ma tea na seli soaneu mamahele basa hata fo nabi la lafa'da basa ka so!

YOHANIS 18:37

Boema Pilatus natane Yesus nae, “Metema leondiak soona, manek O do?” Yesus nae, “O nde mafa'da mae, Au ia manek. Au ia, nanabongik boema Au mai leo daebafa ka mai, no dudu'ak ka'da esa mesa kana, fo nde Au tui-benga eno ndo sa. Hataholi see da'di neme ndoos ndia mai soona, namanene Au.”

YOHANIS 7:17

Hataholi fo ana tunga Manetualain hihii-nanau na, neukose ana bubuluk, ade Au nanoling sila la neme Manetualain mai, do neme Au a mai.

YOHANIS 8:47

Hataholi fo ana da'di neme Manetualain mai soona, neukose namanene Manetualain dede'a-kokolan. Tehu emi ta da'di meme Manetualain mai fa, hu ndia de, emi ta nau mamanene fan.”

1 KORINTUS 6:11

Makahulu na, hapu hataholi de'ubee nai emi dalek, bei lanuu ha'da-palii leo sila kala. Tehu besak ia soona emi malalaok neme sala-singo ka mai so. Emi dadi Manetualain nuu hehelin so. Emi malole falik mo Manetualain, nana emi mamahele neu Lamatuak Yesus Kristus, ma hu ka nde ita Aman Manetualain Dula Dale na koasa na.

2 KORINTUS 7:1

Tolanoo susue ngala lemin! Basa hala heheluk sila la ala fen neu ita. Hu ndia de ela leo bee na tao talalao aoina tala neme basa hata fo tao nanggenggeo ita ao paa samanen. Ela leo bee na ata fe ha'da-holomata neu Manetualain, ma sanga enok fo taso'da mateu-mandaak sama na leo Ndia.

TITUS 2:14

Ana tunu-hotu basa ao ina na soaneu ita, ma Ana se'i-po'i ita teme mangalauk lala'ena mai, fo Ana tao ita da'di Ndia hataholi kamahehele malalao-malalafuk ma mana manggate tao tatao-nono'i malole.

IBRANI 12:10

Ita ina aman fo manai daebafa ka, lanoli ita ka'da nai faik fo nanuu too-lane. Tehu Manetualain nanoli ita soaneu ita malole na, fo ela ita da'di malalaok sama-sama ton.

1 PETRUS 1:22

Hu ka nde emi tao tunga Manetualain nanoli nala, de emi tao balisi emi ao ina mala, ma emi sue-lai hataholi fo emi namahehelek esa, no dale ndoos. Hu ndia de, ela leo bee na emi masue-malai ao no dale katema tuak.

1 PETRUS 1:7

Dede'ak ia tetee-tutu'dan nde, fo ela ana da'di buti esa nae, ade te'e-te'e, emi mamahele Lamatua ka do ta. Lilopila sa hapu nalutun boeo, bei nanaso'bak ninik ha'i. Na, emi namahehele ma nde bee na, beli na lenaheni lilo pilasa, da'di muse so'ban boe, fo ela natea-nahele. Fo no enok ndia, neukose emi nanakoa-nanakiok, ma nanafe ha'da-holomata, boema nana namatutua-namadedemak nai faik fo Yesus Kristus fafali ma'i na.

1 YOHANIS 5:20

Ita bubuluk basa, Manetualain Ana na mai, de ana fe ita malelak fo daenga ita talelak Manetualain fo ndo sa. Fo ela ita taso'da to Manetualain fo ndo sa, ma taso'da to Anan fo Yesus Kristus. Ndia nde Manetualain fo ndo sa, ma Ndia nde so'da matetu ka mana ketu basa ta ka.

NINITAK 16:11

Boema ala supa-soo Manetualain nai nusa so'da ka, nanahu lame'da he'dis hu ka nde bisungguma nala. Tehu ala ta nau tukatei-saledale boen neme tatao-nono'i managalau nala mai fa.

NINITAK 19:14

Solda'du nusa so'da kala tungan no ala sa'e ndala fulak, ma ala pake bua fulak balisi.

NINITAK 19:8

Manetualain fe basan, bua papakek fo nanataok neme tema fula balisi ma mangadilak neu pengante na.” (Tema fula mangadilak ndia nde bee na, ta'du-tana neme Manetualain hihii-nanaun fo hataholi kamahehele nala nde tao nana.)

NINITAK 22:11

Hataholi manatao tatao-nono'i mangalau ka, neme na fo ana tao mangalauk nakandoo. Hataholi manatao nanggenggeo so'da na, neme na fo ana tao nanggenggeo aoina na; hataholi manatunga Manetualain hihii-nanau na, neme na fo ana tunga Manetualain hihii-nanaun nakandoo, ma hataholi fo naso'da hehelik soaneu Manetualai na, neme na fo naso'da hehelik soaneu Manetualain nakandoo.”

NINITAK 3:18

Hu ndia de Au anoli-afa'da emi fo ela asa lilopilas neme Au mai, fo nde lilopila isi ka, fo ela emi da'di kamasu'ik. Boeo asa bua-lo'a fulak neme Au mai, fo ela emi mabua-lo'ak fo babaketu emi ha'da-tatao makaholam ma manini mamae ka. Ma asa aidok boe, fo lose neu emi mata ma fo ela emi hapu mita.

SEMUEL SUSULAK-KA ESAN-NA 24:13

Sa'di leo been-na, Manetualain nde naketu ita dua, se kande nasala! Sa'di leo been-na, Manetualain nde balas Ama Manek tatao-nono'in la'eneu atam-ma, tehu neukose atam-ma, ta tao nahe'di Ama Manek faa anak boen