2TAWARIKH 34:5 - Susula Malalaok Hehelu Palak Ma Hehelu Beuk

⁵ Basa boema Yosia hotuheni basa imam fo manamalalau-maoono sosongo-tatangok sila-la dui-kalun nai mei tunu-hotuk sila-la lain. No enok ndia, ana taon-na Yehuda ma Yerusalem landaa seluk sene-do'ok neu Manetualain.

2TAWARIKH 34:5 ပူးပေါင်းရင်းမြစ်များ

1RAJA-RAJA 13:2

No Manetualain paleta-na, de nabi ndia naloo bou-bou neu mei tunu-hotuk ndia nae, “Hai mei tunu-hotuk, hai mei tunu-hotuk-ka nei! Manetualain nafa'da nae leoia, ‘Ni'iana esa neukose nanafoik na'de Yosia, neukose bongin nai Dauk teidalen-na dalek. Nai o lain, hai mei tunu-hotuk-ka nei, neukose ana taonisa imam-imam fo lalalau-laoono lai mamana hule-haladoik-kala neu lamatua daebafak-ka, ma manafe basa tutunu-hohotuk nai o lain so boe. Ma nai o lain boe, neukose ana hotu hataholi daebafak-ka dui nala.’ ”

2RAJA-RAJA 23:16

Basa boema, Yosia lipa leo dea neu, de nita lates de'ubee lai letek lain. Boema, nadenu hataholi, fo neu ofe heni lates sila-la, fo ana su-nala dui-kalun, fo ana hotus neu mei tunu-hotuk fo, bei manapila lo'a-lo'ak ndia lain. Ana tao nanggenggeo mei tunu-hotuk sila-la, eno-dalan leondiak. Boema hata fo, makahulun-na Manetualain nabin-nala lafa'da elak-ka, ana da'di, fo nai lelek Manek Yerobeam-ma, bei napadeik deka no mei tunu-hotuk ndia, la'e fai malole esa. Basa ndia boema, Manek Yosia, nita late fe'ek esa seluk.

2RAJA-RAJA 23:20

Basa imam-imam, fo lalalau-laoono nai mamana sene-do'ok neu lamatua daebafak-ka, ana taonisas lai sila lalalau-laoonon nai mei tunu-hotuk-kala, lain. Ma Yosia hotu hataholi-la dui-kalun, nai mei tunu-hotuk sila-la lain. Basa ndia boema, ana fali ne'un leo Yerusalem neu.

2TAWARIKH 34:33

Sosongo-tatangok nanamaluak manai basa mamanak-kala, fo nai hataholi Israel-la nusan-na boe, Manek Yosia tao nakalulutuk la'iesak-kasa. Boema nakaseti laun-na fo sene-do'ok neu Amak, fo sila bei-ba'i kain Manetualain-na. Boema nai Yosia fai maso'dan-na dalek, laun-na lilineka lahele neu Manetualain.

2TAWARIKH 34:7

Yosia tao nakalulutuk mei tunu-hotuk-kala ma lamatua daebafa Inak Asyera dodoki-dudulan nai basa Nusak Kii lala'en-na, ma ana tao nakalulutuk basa mei tunu-hotu boomenik-kala. Basa boema Yosia fali ne'un leo Yerusalem neu.

YEREMIA 3:10

Yehuda fo ta mana lilinekak ndia, ana tao basa sila-la boema, ana fali ma'in leo Au mai, tehu ta no dale katema tuan-na, nanahu dalen-na ta ndoos fa. Au, fo Manetualain nde manakokolak-ka.”

YEREMIA 4:14

Yerusalem, tu'u-tapa heni dudu'a-aafi mangalauk-ka, neme o dalem dale mai, fo ela o hapu maso'da. O sanga pe'da dudu'a-aafi mangalauk sila-la nai o dalem dale, losa faihi'da?

YESKIAL 22:24

“Hai hataholi daebafak fo, manasapu-manalalok-konei, mafa'da hataholi Israel-la, mae sila daen-na nanggenggeo, hu ndia de, Au amanasa de Au hukun.

BILANGAN 35:33

Metema ami tao leondiak soona, emi tao manggenggeo dae, fo emi leok-ka. Kanisak-ka tao nanggenggeo nusak-ka; da'di ta hapu eno fe'ek, soaneu tao balisi nusak ndia fa, te ka'da nenik, taonisa hataholi kanisak-ka.