2TAWARIKH 32:25 - Susula Malalaok Hehelu Palak Ma Hehelu Beuk

²⁵ Tehu hu kande ana koao-ndaeao, de ana ta noke makasi neu lelea-hahaik fo Manetualain fen neu-na fa. Hu ndia de Manetualain namanasa Yehuda ma Yerusalem.

2TAWARIKH 32:25 ပူးပေါင်းရင်းမြစ်များ

2 SEMUEL 24:1

Manetualain namanasa seluk Israel, boema Ana fufu'di-oodok Dauk no dudu'ak, fo ela neni toto'a-sosotak fe leoina ndia. Manetualain nafa'dan nae, “Leke hataholi Israel-la ma hataholi Yehuda-la dede'un-nala.”

2RAJA-RAJA 14:10

O, fo Amazia, manako'ao-ndaeaok, nanahu o sengi hataholi Edom-mala so. Nah, ade sesengik ndia, dai so hetu? Malole lenak, o meme ka'da uma! Sosoak hata, sanga dede'ak, fo neukose, ka'da nini soe fe o, ma o laum-mala?”

2RAJA-RAJA 20:12

Nai lelek ndia boe, manek Babel-la, fo nde Merodakh-Baladan, fo Baladan anan-na, namanene manek Hizkia, besak-ka lea-hai neme he'dis-sa mai so. Boema, nadenu hataholi, nini fe Hizkia susulak, ma bua palsen.

2RAJA-RAJA 20:13

Hizkia sipok hataholi nadedenuk sila-la, de natu'dus basa su'i-beten lala'en-na, fo nde lilopilas ma lilofulak, bumbu-bumbu, ma mina kaboomenik, ma basa solda'du-la, tafa-sisilon lala'en-na. Ta hapu hata esa boen, nai uma manek-ka, ma nai basa nusa-na lala'en-na, fo ta natu'du neu fas.

1 TAWARIKH 21:1

Nitu nahiik tao soe hataholi Israel-la; hu ndia de ana fufu'di-oo'dok Dauk fo ela ana sulak laun nala dede'un nala.

2TAWARIKH 19:2

nabi esa na'de Yehu fo Hanani anan-na ana mai nataa manek-ka. Nabi ndia nafa'dan nae, “Ade nandaa Ama Manek tulu-fali hataholi mangalauk ma mook hataholi manamamanasa Manetualain-na do? Ama Manek tatao-nono'in ndia nde taon-na Manetualain namanasa Ama Manek.

2TAWARIKH 24:18

Boema laun-na ta sene-do'ok nai Manetualain Uman, fo sila bei-ba'i kain Manetualain-na so'on, tehu ala sene-do'ok neu sosongo-tatangok ma lamatua daebafa Inak Asyera dodoki-dudulan. Sila sala-singon ndia taon-na Manetualain namanasa Yehuda ma Yerusalem.

2TAWARIKH 25:19

O, Amazia, o kokolak dede'a me'i-afek mae o sengi hataholi Edom-mala so, tehu malole lenak o mahele ka'da uma. Sosoak hata o sanga ka'da dede'ak fo neukose o tao soe o aoina-ma ma o laum-mala?”

2TAWARIKH 26:16

Lelek manek Uzia natea-nahele boema, ana da'di manakoao-ndaeaok, de koao-ndaeaon ndia nde tao nakalulutuk-kana. Ana la'o lena Manetualain paletan-na, nanahu neu leo Manetualain Uman dale neu fo ana hotu boomenik nai mei tunu-hotu boomenik lain.

2TAWARIKH 32:31

Ma nai lelek hataholi nadedenuk-kala leme Babel mai fo latanen la'eneu ana lea-hai no kaiboik, Manetualain po'ilotak Hizkia nataa tunga dale hihii-nanau mesan-na, fo ela Manetualain hapu fola dalen-na.

YESAYA 39:1

Nai lelek ndia, manek Babel-la, fo nde Merodakh, Baladan, fo Baladan anan-na, namanene lae Manek Hizkia besak-ka, ana lea-hai neme he'di-laus-sa mai Boema, nadenu hataholi neni susulak, ma bua palsen fe Hizkia.

YESAYA 39:2

Hizkia sipok hataholi basa hataholi nadedenuk sila-la no namahokok, ma natu'dus asa ndia su'i-beten lala'en-na, fo nde lilopilas, ma lilofulak, bumbu-bumbu, ma mina kaboomenik, ma basa ndia solda'dun-nala tafa-sisilon lala'en-na. Basa hata lala'en fo, manai uma manek-ka, ma nai basa ndia su'i-beten lala'en-na, natu'du la'iesak-kasa neus.

YESKIAL 28:17

O mata makeem-ma, ana tao-na o koao-ndaeao, ma o na'de nanakoa-nanakiom-ma, ana tao-na o, tao tunga o nggoam-ma. Hu ndia de, Au bala o muu dae lain, fo Au taon da'di nasanene'dak ba'eneu mane fe'ek-kala.’ ”

YESKIAL 28:2

“Hai hataholi daebafak fo, manasapu-manalalok-konei, mafa'da mane Tirus-sa, hata fo Au, Manetualain Fo Mademaina nafa'da neun, ‘No koao-ndaeaok, o mafa'da mae o nde been-na lamatua daebafak, fo o mangatuuk nai kandela manek-ka, nai tasi-a tala'da heon. O bole tao o aoinam-ma, da'di leo lamatua daebafak, tehu mafandendelek leona te, o ka'da hataholi daebafak biasa mesak-kana.

YESKIAL 28:5

Memak o dangan malelak, de besak ia, o mamasu'i hatu-hatu so, de o su'i-betem ndia, ana tao-na o koao-ndaeao!’ ”

YESKIAL 31:10

Hu ndia de Au, Manetualain Fo Mademaina, afada o hata fo, neukose ana da'di neu ai fo pe'dan-na losa ko'as-sa ndia. Nana ana boetai namademak-ka, ana boetai koao-ndaeao.

DANIAL 11:12

Basa boema, neukose namahoko nanseli, nanahu ana sengi ma hu kande ana taonisa solda'du musu makadotok, tehu neukose ana ta koasa nakandoo fa.

DANIAL 5:20

Tehu nai lelek ana koao-ndaeao, langa batu ma ana tao hataholi no dale susue-lalai tak boema, nanaloli henik neme kandela manen lain mai, nalosa mopo ndela-sa'an.

DANIAL 5:23

Ama Manek namatutua-namadedema aoinan-na soaneu Manetualain nai nusa so'dak-ka, ma Ama Manek napalani nadenu hataholi neni mango fo Ama Manek aman loso nenis neme Manetualain Uman dale mai, leo feta dale mai. Boema Ama Manek noo basa hataholi matua-madema-la saoinan-nala, ma sao ka dua ka telun-nala minu pake mango sila-la. Ama Manek koa-kio lamatua daebafak fo nanataok neme lilopilas, lilofulak, liti, besi, ai ma batu, lamatua daebafak fo ta hapu lita do lamanene do lalelak hata-hata ndia fa. Ama Manek ta fe ha'da-holomata neu Manetualain fo manamaketu-mala'di Ama Manek maso'dan-na ma mamaten-na.

HOSEA 14:2

Hai leoina Israel-la lemin, fali me'um-ma leo emi Manetualaim-ma meu leona! Emi sala-singom tao-na emi kosik, de emi tu'u meu.

HABAKUK 2:4

Mafandendelek te, hataholi mangalauk-ka, neukose ta naso'da fa, tehu hataholi manatao tunga Manetualain hihii-nanaun-na, neukose naso'da, nanahu ana lilineka neu Manetualain.”

2 KORINTUS 12:7

Tehu fo ela au boso koao-ndaeao anseli hu ka nde ninitak matuaina sila la, de au hapu he'dis matak esa nai au ao paa nga. Da'dileo Nitu nadedenu na, he'dis ndia nanahaituak soaneu ana tao na au doidoso fo ela au boso koao-ndaeao.

ULANGAN 32:6

Emi balas Manetualain dale malolen-na leondiak hai hataholi nggoak ma dudu'a-aafi tak-kala lemin? Ade, Ndia ta nde emi Amam, fo Manamakadada'dik emi, fo manatao emi da'di leoina esa fa do?

ULANGAN 8:17

Da'di, emi ta bole dudu'a-dodoo, mae no emi tutunga-sasangam-ma emi be'i-balakaim, de emi da'di hataholi kamasu'i-makabetek.

1 TIMOTIUS 3:6

Hataholi mauli-malanga salanik esa, ta bole hataholi fo, besa ka ana da'di hataholi salanik fa, nana neukose hataholi ndia, ana da'di hataholi mana koaok, fo nanasoo-supak, sama na leo makahulu na Nitu a boe.