1 YOHANIS 4:7 - Susula Malalaok Hehelu Palak Ma Hehelu Beuk

⁷ Tolano susue-lalai ngala lemin! Mai fo tasue-talai ao leona, nana susue-lalaik ndia, ana da'di neme Manetualain mai. Hataholi mana sue-lai ka, ana da'di Manetualai nanan, hu ndia de nalelak Manetualain.

1 YOHANIS 4:7 ပူးပေါင်းရင်းမြစ်များ

YOHANIS 13:34

Au fe emi paleta beuk esa nae leo ia: Masue-malai ao leona. Sama na leo Au sue-lai emi basa-basa mala. Leondiak boe, emi muse masue-malai ao.

YOHANIS 17:3

Ndia nde maso'da matetu ka ma manaketu basa ta ka, fo ela hataholi la lalelak Ama ka nde Manetualain, fo mesa-mesa kana nde ndo sa, ma lalelak Yesus Kristus nde bee na, Ama ka nde nadenu nana.

1 KORINTUS 8:3

Tehu hataholi fo te'e-te'e ana sue-lai Manetualai na, Manetualain nalelak hataholi ndia.

2 KORINTUS 4:6

Manetualain fo nafa'da nae, “Ela leo bee na neme makahatuk dale mai, mangale'do ka tii,” Manetualain ndia nde nakatitiik mangale'dok ndia nai ita dalen dale, fo ela ita dudu'a-aafin da'di mangale'dok fo ita talelak matalolole Manetualain mandela-masa'an fo nandela-nasa'a neu Kristus mata-panan.

GALATIA 4:9

Tehu besak ia, emi malelak Manetualain so, do la'e selu kana bai soona, Manetualain nalelak emi so. Naa, tao le'e de emi nau fali seluk leo dula dale daebafak ia la, fo tapandoes ma nuu taa-hata tak sila meu? Tao le'e de emi nau da'di ata seluk neu dula dalek sila la bai?

GALATIA 5:22

Dede'a nasafali na nae, metema Manetualain Dula Dale na hela-nole hataholi soona, buna-boan nde: ala lasue-lalai ao, ala lamahoko-setelee, ala lanuu dale mana tesa-tamak, ala ta haelai lamanasa, ma ha'da-tataon malole, ala malole lo hataholi fe'ek, ala lilineka,

ULANGAN 30:6

Neukose Ana tao nabebeu emi dalem-ma, nalosa emi sue-lai emi Manetualaim-ma no emi dalek-katematuam-ma, ma emi leo mahele meme nusak ndia.

2 TIMOTIUS 1:7

Nana Manetualain fe ita Dula Dale ka, ana ta tao na ita da'di hataholi mana bii-mamata'uk fa. Te Manetualain Dula Dalen ndia nde, tao na ita tatea-tahele, ana tao na ita dale na henuk no susue-lalai ka, ma ita takatatakak ta ita ao ina na.

1 PETRUS 1:22

Hu ka nde emi tao tunga Manetualain nanoli nala, de emi tao balisi emi ao ina mala, ma emi sue-lai hataholi fo emi namahehelek esa, no dale ndoos. Hu ndia de, ela leo bee na emi masue-malai ao no dale katema tuak.

1 YOHANIS 2:10

Hataholi mana sue-lai tolano na, hataholi ndia naso'da nai mangale'dok dale, de hataholi ndia ta tao na hataholi fe'ek, tu'da leo sala-singok dale neu fa.

1 YOHANIS 2:29

Emi bubuluk basa, nai Kristus maso'da na dalek, Ana tunga ka'da Manetualain hihii-nanaun. Hu ndia de emi muse bubuluk te, hataholi fo naso'da tunga Manetualain hihii-nanau na, hataholi ndia nde been-na Manetualai nanan.

1 YOHANIS 2:3

Metema ita tuga Manetualain paleta na soona, ndia nafa'da nae, ita talelak Manetualain.

1 YOHANIS 2:4

Hataholi fo nafa'da nae, “Au alelak Manetualain,” tehu ana ta tunga paleta na fa soona, hataholi ndia masapepeko-masandandalik, nana Manetualain ta nai dalen dale fa.

1 YOHANIS 2:7

Tolano susue-lalai ngala lemin! Au ta sulak paleta beuk fe emi ia fa, te paleta ia la paleta palaak fo lafa'dan neu emi, ndek emi mulai mamahele Yesus; paleta maneme Manetualain mai a. Fo halak ndia, emi mamanenen so.

1 YOHANIS 3:9

Metema Manetualai nanan see soona, hataholi ndia ta bole tao sala-singok nakandondoo henin fa, nana Manetualain ha'da-tataon nai hataholi ndia dalen dale. Boema hu ka nde hataholi ndia aman nde Manetualain, de ana boso boe tao sala-singok nakandondoo henin bai.

1 YOHANIS 4:11

Tolano susue-lalai ngala lemin! Metema Manetualain sue-lai ita tao leondiak soona, ita boeo muse tasue-talai ao.

1 YOHANIS 4:12

Beita hapu hataholi esa boen, hapu nita Manetualain fa, tehu metema ita tasue-talai ao soona, Manetualain naso'da no ita, fo susue-lalain natetu-nandaa nai ita dalek.

1 YOHANIS 4:16

Ita nde bubuluk ma tamahele Manetualain susue-lalain neu ita. Manetualain ndia nde, susue-lalai ka huu na. Hu ndia de, metema susue-lalai ka nai see dalen dale soona, hataholi ndia naso'da no Manetualain ma Manetualain naso'da no hataholi ndia.

1 YOHANIS 4:20

Metema hataholi esa nafa'da nae, “Au sue-lai Manetualain”, tehu ana ta sue-lai tolano na fa soona, hataholi ndia masapepeko-masandandalik. Nana leomae hataholi ndia memetek tolano na boeo, ana ta sue-lai fan, na neme bee mai a, ana hapu sue-lai Manetualain fo nananita tak ndia.

1 YOHANIS 4:8

Hataholi dale susue-lalai taa ka, ta nalelak Manetualain fa, nana Manetualain ndia, susue ka huu na.

1 YOHANIS 5:1

Metema see namahele Mane Mana Fe So'dak fo Manetualain helu ka, fo nde Yesus soona, Manetualai nanan hataholi ndia. Boema metema hataholi a ana sue-lai amak esa, soona ana sue-lai ana na boe.

2 YOHANIS 1:5

Hu ndia de, au oke anseli neu Ina, fo daenga ita basa-basa tala, tasue-talai ao. Au ta afa'da paleta beuk ia la fa; lafa'da basa paleta ia la neu ita, ndek ita tamahele makasososa na so.