1 PETRUS 4:4 - Susula Malalaok Hehelu Palak Ma Hehelu Beuk

⁴ Besak ia, hataholi fo ta lalelak Lamatua ka, dodoo doa kana de bekola lae, emi ta tunga sila so'da na, fo tao sala-singok ta pake too-lane so'on. Hu ndia de, ala tao lalutu emi na'de ma.

1 PETRUS 4:4 ပူးပေါင်းရင်းမြစ်များ

MATEOS 23:25

Soe ba'eneu emi, fo mese agama la ma hataholi Farisi la lemin! Emi ia hataholi mana dea-dale kala. Emi safe balisi emi pinga-mangom dea nala, te see ko na dale na soona manggenggeo na seli ninik hata-hata fo emi hapun no nalaka-nasetik ma tenepeta ka.

LUKAS 15:13

Basa faik de'ubee boema, ni'iana mulianak ndia nase'oheni ndia hata baba'e na de neu leo nusa dook neu. Nai naa, ana didilo-dodolo tali doi na ninik so'da lena-lena ka.

HATAHOLI 13:45

Lelek fo hataholi Yahudi la lita hataholi makadotok sila la boema, dale nala he'di lanseli. Lakamumulu-lakamamaek Paulus, ma ala la'ban ana kokolak dede'a kala.

HATAHOLI 18:6

Tehu, hu ka nde hataholi la ka'da ala la'ban lakandoon ma lakamumulu-lakamamae kana boema, ana ngganggafuheni daesopuk manai bua-lo'a papake na, fo ana da'di neu ta'du-tana soaneu ana fe nasanene'dak neu hataholi sila sala-singo nala. Paulus nae, “Metema emi hapu susa-soe soona emi salam ndia! Te au po'i au lima nga! Mulai besak ia, au sanga u leo hataholi ta Yahudi la.”

ROMA 13:13

Ita muse tao tatao-nono'i nanakoa-kiok sama leo mandoofai hataholi a tao-no'in nai fai lele'do na; boso tao feta-dote lena neme dae too mai, do mafuk ala-lalu. Boso sosoa-piao, do matu'du ha'da-tatao ha'da tak. Boso mahote, do mape'da dalek neu hataholi.

EFESUS 5:18

Boso mafuk angol, nana ndia nde tao nalutu emi a. Dede'a nasafali na, ela leo bee na, Manetualain Dula Dale na koasa na emi.

1 PETRUS 2:12

Matu'du emi ha'da-palii malole ma, neu hataholi fo beita lalelak Lamatua ka, fo ela metema lakamumulu-lakamamaek emi, sama leo hataholi mangalauk, tehu no emi ha'da-palii malolem ndia de, neukose ala koa-kio Manetualain nai faik fo Ana fali ma'i na.

1 PETRUS 3:16

Tehu emi tao-no'i sila la no nakaloe aok ma ha'da-holomata. Ela leo bee na, emi dale bobongo ana ma ndoos, fo ela metema hataholi nakamumulu-nakamamaek emi, hu ka nde emi so'da ma malole, sama leo hataholi mana tunga Kristu sa, soona neukose hataholi mana makamumulu-makamamaek emi ndia, ana mae.

2 PETRUS 2:12

Tehu mesen masapepekok sila la su'di selin! Sila sama leo bana fo bongi naan soona, ho'u nan fo do'don henin. Ala tao hata esa soona, ala ta dodoo fa, te ala tao tunga ka'da sila dale hihii nala, nalosa ala laban dede'ak fo ta lalela kana, ninik dede'a nakamumulu-nakamamaek. Hu ndia de, mopo-mates sama leo bana makaa-makisu ka, nana tatao-nono'i mangalaun sila la.

2 PETRUS 2:22

Hataholi sila tatao-nono'in, natetu-nandaa no dede'a lasi ka nae, “Neukose busa na'a seluk muta na”, ma “Ladiu basa bafi oe so, tehu neukose neu loli seluk nai tane dale.”

YUDAS 1:10

Tehu no dede'a-kokola nakamumulu-nakamamae ka, de hataholi sila la fe salak neu hata fo ta lalela kana fa. Hataholi sila sama leo bana aafi ta ka, fo ala tao tunga ka'da dale hihii mesa nala, nalosa sila nde tao lakalulutuk seluk ao ina nala.